Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 21 Bible Online

Nshuwau 21 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 21

¹Vikapite avyo, Yesu andílilodya kavili kwavakwoda vake nanyenje litanda lya Tibeliyade. Kulilodya kwake ko kuvé doni,

²mulyutu alyo vandípagwa pamo Simoni Patulu, Tome áshimanyika Didimu, Nataniyele wa ku Kanaa ya ku Galileya, vanavake Shebedeu na vakwoda vanji vavili.

³Simoni Patulu kutwala kuvaulila doni, “Mwanda ndaaka dyomba.” Vanavo kushidoni, “Tuke pamo.” Bai vakauka ndainjilanga mwingalava kanji ushilo uti havapatíle shinu shoeshoe.

⁴Paushwenge wiko, Yesu andípagwa nanyenje litanda ila vakwoda havashimmanya kenga aju Yesu.

⁵Nae kutwala kuvaudya, “Mmanavangu, hamuvenavo dyomba?” Vanavo do, “Um, mene.”

⁶Nae kushidoni, “Jalangila lungau kunkanakono ko, mundapata dyomba.” Vanavo pavautile lungau lwo, havaulwíle kumya kwamwaa wakujola dyomba dyoe namene.

⁷Napanelo nkwóda aijá áshinagwaleka namene namu Yesu andímwaulila Patulu kushidoni, “Aju UMU!” Bai Simoni Patulu paigwite davo, nae andítwala inguvo yake kugwala mwaa avele matakodavo kutwala kulijela mmedi.

⁸Vakwoda vanji vandyúka na ingalava vautanga lungau lùumbele dyomba mwaa havavéle kushu na kumwangu shivele shitamba shakuwikila kenga madodo tisini doni.

⁹Pavashulukangidile kumwangu, vandyona moto na yomba jumo vànjanikidile pamakala na shibadu shaligung'u popo.

¹⁰Yesu kutwala kushidoni, “Idanavo dyomba dinji dyamubyee ambi dyo!”

¹¹Bai Simoni Patulu andíinjila mwingalava kutwala kuutila lungau kumwangu. Lwanavo lundyúmbala dyomba ding'umene miya imo na amusini na tatu. Ata ikave davo lungau halupapwíke.

¹²Yesu kushidoni, “Idananga mulye!” Hapagwíte ata nkwóda jumo e alyalavéke kumudya do, “Da wako unyani?” mwaa vandímanya kenga avele UMU.

¹³Yesu andívavandika kutwala ligung'u alilá kuvaing'a na yomba yo, kutandela momo.

¹⁴Au uvele mwanda wantatu avaumililila vakwoda vake ling'oto lyakudyuka pakati pavakupela.

¹⁵Vakamalile kulya, Yesu andímudya Simoni Patulu, “Simoni mwanagwe Nshuwau, da wako unkungunagwaledya namene kuvapunda ava?” Nae doni, “Elo UMU, wako unkumanya kenga ninkukunagwaledya.” Yesu kushidoni, “Valishe vangandolo vangu.”

¹⁶Kavili Yesu kushidoni, “Simoni mwanagwe Nshuwau, da wako unkungunagwaledya?” Nae doni, “Elo UMU, wako unkumanya kenga ninkunkunagwaledya.” Yesu kushidoni, “Vashunge vangandolo vangu.”

¹⁷Kutwala kumudya mwanda wantatu, “Simoni mwanagwe Nshuwau, da wako unkungunagwaledya?” Patulu shindímwida shipalodi kwamwaa wakumudya mwanda wantatu doni, “Da wako unkungunagwaledya?” Napanelo anínjang'ula do, “UMU, wako undimanya vinu uti na undimanya kenga nangu ninkukunagwaledya.” Yesu kushidoni, “Valishe vangandolo vangu.

¹⁸Ninkukwaulila mwiu mwiu doni, wako pauvele unnemba ushindalyunga inguvo yako na kuka kwoekwoe kwaulota; napane paulota kuva unang'olo po, unanyalodya makono ako[66] kutwala munu junji kukunga na kukuukanavo kwaukalatile.”

¹⁹Yesu andítangola davo amba inamuna yashipalelo shake Patulu mwalota kumpela Nnungu lishangelo. Patangwele doni, animwaulila, “Ngwoda.”

²⁰Napanelo Patulu akashiliuka kutwala kumwona aijá nkwóda washinnagwaledya namene Yesu amwoda. Aju avele aijá e atapíle muwakati wavashilya shakulya shashilo na amuudídye UMU doni, “Nyani álota kukulimya?”

²¹Patulu pangwene andyúdya, “UMU, kushi aju?”

²²Yesu kushidoni, “Ikava kenga nangu ninkulota nae apagwe mpaka pangulota kwida, wako shako nyamani? Wako po, ngwoda!”

²³Ni ashi shitadídye dyandavale dyabali pakati pavanung'unumunu dyakushidoni, “Nkwóda aju, mwiko hapela.” Kanji hamwaulidíle doni, “Nae po, hapela,” ila amwaulidile doni, “Ikava kenga nangu ninkulota nae apagwe mpaka pangulota kwida, wako shako nyamani?”

²⁴Aju ni nkwóda jojo áumya ushuda wavinu avi na áandike. Wetu tunkumanya kenga ushuda wake wo, wìu.

²⁵Vipali vinji vyoe vyatandile Yesu. Leka kula shinu shàandikike, ngwona kenga mushilambo uti hainapagwe inapashi yakutosha kuvika mabuku akaandikíke.