Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 3 Bible Online

Nshuwau 3 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 3

¹Napanelo andípagwa mpalishayo walina Nikodemu nkútawala jumo wavayuda.

²Munu aju andímuukila Yesu shilo ndamwaulila doni, “Labi, wetu tundimanya shana kenga wako apa walakadilé kwa Nnungu, gwegwe umwalimu. Vimanyikilo vyautenda wako avi, hapali munu wakuulula kutenda bila Nnungu kupagwa pepi-pepi namu nae.”

³Yesu akanjang'ula kushidoni, “Ninkukwaulila mwiu mwiu, munu akanavalekwa kwakuwa[16] haulula shinu kwona utawala wa Nnungu.”

⁴Nikodemu kutwala kushidoni, “Da munu alota kuvalekwa dashi àvele nang'olo? Da ankuulula kwinjila kwamwanda wambili mmunda mwanyoke kutwala kuvalekwa?”

⁵Yesu kunjang'ula, “Ninkukwaulila mwiu mwiu, munu akanavalekwa kwamedi na Imumu[17] haulula kwinjila muutawala wa Nnungu.

⁶Doni, shivalékwa kwamili, mili na shivalékwa kwa Imumu, imumu.

⁷Haunashange mwaa wakukwaulila doni, inimmaikila muvalekwe kwakuwa.

⁸Imepo indápunga palyutu lyoelyoe lyailota yene; wako kwigwa kunyonya kwake kanji haunamanya kwaipandukanga na kwayenda. Nimumo momo kwakula munu ávalekwa kwa Imumu.”

⁹Nikodemu akajang'ula, “Na doni po inkuululika dashi?”

¹⁰Yesu akanjang'ula kushidoni, “Wako umwalimu wavanaishilaeli, napane haunamanya shinu vinu avi?[18]

¹¹Ninkukwaulila mwiu mwiu, shatumanyite ni shatutangola, shatugwene ni shatumya ushuda kanji ushuda wetu hamunakulupila shinu.

¹²Ikava kenga nditangola vyamushilambo mwenu hamukulupidile, napane nikatangola vyakuwa mulota kukulupila dashi?

¹³Hapali munu ákwadile kuwa ila ni aijá áalweke kuwa, Mwana Wamunu.[19]

¹⁴Ni kenga momo mwannyanyulidile Musha nyoka munnandi kushimbweshe[20] nanae Mwana Wamunu inimmaikila anyanyuligwe

¹⁵pakulota vanu uti vankulupíla nae vavenavo shingumi shíkamalilika.

¹⁶“Amu ni mwanagwaladidye Nnungu shilambo, ata mpaka nae kumumya mwanagwe ávele jumo jojo pakulota uti vankulupíla nae havanajaike kanji vavenavo shingumi shíkamalilika.

¹⁷Mwaa Nnungu hantumididye mwanagwe mushilambo aukumu shilambo kanji shilambo sho shambwalegwe kwaindila yake nae.

¹⁸Aijá ánkulupila nae hanaukumigwa shinu, aijá napane ákankulupila andyukumigwa tayali kwamwaa úkave wakukulupila lina lya Mwana wa Nnungu, mwana jo ávele jumo jojo.

¹⁹Ukumu yo ni ai: lilangadyo lindida mushilambo kutwala vanu kunagwaledya shii kuleka lilangadyo mwaa vitendo vyave vivele vyakunyata.

²⁰Kula munu ánatenda vyakunyata andávangedya lilangadyo na hanavandika kulilangadyo pakulota vitendo vyake vyo havinalale panda.

²¹Napane aijá ánatenda vyaumwiu aida kulilangadyo pakulota vitendo vyake vyaneke kuva vitendo vitandéke mu Nnungu.”

²²Ling'oto lyavinu avyo Yesu andyúma panjini pamo na vakwoda vake kuka mushilambo shosho sha Yudeya. Ako nae andípagwa na vanavo avapa vanu ubatisho.

²³Nanae Nshuwau momo ku Enoni pepi na pa Salimu ashindavapa vanu ubatisho mwaa kwanavo ko wakupagwa medi oe, napane vanu vashindamuukila na vashindabatishwa.

²⁴Doni, wakati awo Nshuwau vakanava kunjela nkalaboshi.

²⁵Napanelo vakwoda vake Nshuwau vandítaukananganavo munu jumo muyuda kwaing'ano yakulyushanianga ushapu.

²⁶Vanavo vandyúka ndatangola namu Nshuwau kushidoni, “Labi,[21] munu avéle namu wako mwangu unji wa Yudani, waumidye ushuda ummalanganga nae, gwe, aijá apalá ankuvapa vanu ubatisho na vanu uti vankumuukila.”

²⁷Nshuwau akajang'ula kushidoni, “Munu haulula kupata shinu, shinu asho pakapatile kuwa.

²⁸Ata mwemwe mmene ni mmashuda kwa ashilá shangutangwele, ‘Nangu apa hangunava shinu Klistu, nangu ni aijá ngútumigwe kulangalela.’

²⁹Mwene nkúlombwa ni nkúlomba. Napane mbwadigwe wapantima wankúlomba ni aijá ánannindila nkúlomba. Panamwigwa, nae andápuwanga namene mwaa wakwigwa lidi lyake. Nadoni lipuwilo lyangu ali lindiwikila popo.

³⁰Nae ni ávaikidile aanjadyeke nangu ngupungulike.

³¹“Aijá áalakela kushanya avelé pashanya pavanu uti. Aijá wamushilambo, wamushilambo na jojo jo atangola vyamushilambo. Napane jo áalakela kuwa jo avelé pashanya pavanu uti.

³²Nae ankumya ushuda wavinu vyagwene na vyaigwite kanji hapali munu áitikila ushuda wake.

³³Aijá áitikila ushuda wake ankuntaa namakong'o kenga Nnungu ni ávenavo umwiu.

³⁴Aijá wantumididye Nnungu atangola malove ake Nnungu mwaa nae andimupa Imumu íkave shipimo.

³⁵Tatamunu ankunnagwaledya Mwana na vinu uti aninkamudya.

³⁶Aijá ánkulupila Mwana ankuva na shingumi shíkamalilika kanji aijá áita kunkukulupila Mwana, shingumi sho alota kwigwa lyatu na shitundi shake Nnungu shinkupagwa pamili pake.”