Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 4 Bible Online

Nshuwau 4 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 4

¹Napanelo Yesu akaigwe kenga mapalishayo vandígwa doni, Yesu ankuvatenda vanu kuva vakwoda vake na kuvapa ubatisho kumpunda Nshuwau,

²ata ikava kenga jo mwene Yesu hashivapa vanu ubatisho ila vakwoda vake,

³bai nae andyúma pa Yudeya kuujila kavili ku Galileya.

⁴Mushimwanda shake inímmaikila apitile ku Shamaliya.

⁵Ko ku Shamaliya ko ankwinjila palikaja lyavashema Shikali livéle pepi na palyutu lyajawíle Yakobo kumupa mwanamunu Yoshe.

⁶Popo po shindípagwa shima shimwe Yakobo. Napanelo kwodamwaa Yesu andídabadabanga na shimwanda, andíikala pepi na pashima asho. Wakati wene uvele waliduva pamuti.

⁷Popo po ankwida nkongwe nshamaliya ndateka medi, Yesu kumwaulila doni, “Ngupa medi ngukumbile,”

⁸vakwoda vake muwakati wene wo vaukile kunjini ndashuma shakulya.

⁹Napanelo aijá nkongwe nshamaliya aijá kumudya, “Ivelé dashi wako ùvele umuyuda kungujugwa nangu medi ninkongwe nshamaliya?” Mwaa havashilyanila vayuda na vashamaliya.

¹⁰Yesu akanjang'ula kushidoni, “Wako leka ùmanyite inudyo ya Nnungu na ùmmanyite aijá átangola doni, ‘Ngupa medi ngukumbile,’ ukaninjugwa nae na nae akandikupa medi ashingumi.”

¹¹Nkongwe aijá do, “Nang'olo, wako hauvé shombo shakutakela na shima shindikadaleka, napane medi ashingumi lo, ulota kupata kwashi?

¹²Da wako po ùnang'olo kumpunda nakulugwetu Yakobo átupele muto au wakumbidile mwene, vanavake pamo na vanyama vake?”

¹³Yesu akanjang'ula kushidoni, “Kula munu álota kukumbila medi ala inankola kavili inyota

¹⁴kanji aijá álota kukumbila medi angulota kumupa nangu mwiko hainkola shinu kavili inyota. Medi angulota kumupa nangu lo andatadya nkati mwake mupandukange libububu lyamedi akumukanga auka kushingumi shíkamalilika.”

¹⁵Nkongwe kutwa kushidoni, “Bai nang'olo ngupa medi lolo lo kwambangidya hainangukole kavili inyota na hangunaide kavili apa ndateka medi.”

¹⁶Yesu kutwala kushidoni, “Wena ukansheme ntwavo, wide.”

¹⁷Nkongwe akajang'ula kushidoni, “Hanguve ntwangu.” Yesu do, “Unditangola shana paulivalangenge kenga ‘Hanguve ntwangu,’

¹⁸mwaa undívanavo vatavako mwanu na aju waunamanavo ambi apa, nanae hanava ntwavo. Mwiu, unditangola shinu shiu.”

¹⁹Nkongwe kutwala kushidoni, “Nang'olo ninkukwona wako kuva unkúlava.

²⁰Vanakuluvetu wetu vashilipudya palishinga ali. Mwenu napane muushidoni, palyutu pavaikidíle kulipudidya ni pa Yelusalemu.”

²¹Yesu kushidoni, “Ajala ngukulupila, unkwida wakati wamulota kulipudya kwa Tatamunu i palishinga ali na ata ku Yelusalemu.

²²Mwenu po munkulipudya kwa aijá wamukammanyite; wetu tunkulipudya kwa aijá watummanyite mwaa kwambola kunkwalakela kwavayuda.

²³Kanji napane unkuwika wakati na wakati wene wo uwikile wavalota vakulipudya vaiu kulipudya kumwe Tatamunu mwimumu na kwaumwiu. Ni vovo vavalambela Tatamunu valipudye kwake.

²⁴Nnungu ni imumu; avalá valipúdya kwake vandivaikila valipudye mwimumu na kwaumwiu.”

²⁵Nkongwe kushidoni, “Nangu ndimanya kenga Masiya ankwida, aijá wavanshema Klistu. Pawika andatuvalangangila vinu uti.”

²⁶Yesu, “Ni nene nangu, ngútangola namu wako.”

²⁷Bai muwakati wowo kutwala kuwika vakwoda vake. Vanavo vandíshanga namene kwamwaa wakumwona atangola na nkongwe kanji hapagwíte wakumudya doni, “Da ulambela nyamani?” kwali, “Mwaa shani unkutangola namu nae?”

²⁸Nkongwe jo kuleka shilongo shake popo kutwala kuka kulikaja, koko ko andívaulila vanu doni,

²⁹“Ida munnole munu ánguvalangenge vinu uti vyangutandile kanji kwali Klistu?”

³⁰Vanu vandyúma palikaja apalá kumuukila koko kwavéle.

³¹Napanelo pavishitandeka avyo vakwoda vake vashinankanyilidya, “Labi, lyaa!”

³²Kanji Yesu kushidoni, “Nangu ninkuvanavo shakulya shamukamanyite mwenu.”

³³Vakwoda vake kutwa kuudyania, “Da apali munu áidile ndamupa shakulya?”

³⁴Yesu kuvaulila doni, “Shakulya shangu ni kutandedya malotelo ake aijá ángutumididye na kulinganianga shimadengo shake.

³⁵Da shi vanu vandátangola doni, ‘Vibakidile myedi nsheshe kuwika wakati wamapuno’? Napane mwenu, nangu ninkumwaulila doni, ng'amula mevo enu, mulole mmagwelu mo! Vinu vinditandeka pakulota kupunigwa.

³⁶Ata mpaka ambi apa ápuna ankupata nshala wake na ankukushania mapuno áuka kushingumi shíkamalilika kwambangidya ápanda na ápuna uti kwaunapamo vave na lipuwilo.

³⁷Kwaing'ano ai shitangaléka sho shiu, ‘Nkúpanda junji na nkúpuna junji.’

³⁸Nangu nintumidya mwenu mukapune shamukaumidile lyuduku; vanji ni vaudukidíle kutwala mwenu kupata paida yalyuduku lyave.”

³⁹Bai vashamaliya voe vapalikaja alyo vanínkulupila kwamwaa waushuda waumídye nkongwe doni, “Aninguvalanganga vinu uti vyangutandile.”

⁴⁰Napanelo pavamuukidile Yesu vashamaliya avalá, vanínjugwa vaikalenavo, nae kwikala kwanavo maduva mavili

⁴¹kutwala vanji voe kunkulupila kwamwaa wamalove ake.

⁴²Vanavo vanímwaulila nkongwe kushidoni, “Munu aju wetu hatunankulupila shinu kwamwaa wamalove ako wako mwaa ata wewe tuvene tundimwigwa na tunkumanya kenga aju mwiu ni Mwamboli wamushilambo.”

⁴³Akapite maduva mavili alalá, Yesu andyúma palyutu alyo kutwala kuukanavo mushu shimwanda shake shakuka ku Galileya.

⁴⁴Napane jo mwene Yesu andyúmya ushuda kenga nkúlava hanaishimika mushilambo shake.

⁴⁵Napavedoni akawike ku Galileya, vagalileya vanímpwashalela kanji kwamwaa wakwona vinu vyatandíle ku Yelusalemu pashikukulu kwoda navanavo po pashikukulu po vandípagwa.

⁴⁶Yesu napanelo kutwala kuka kavili ku Kanaa ya ku Galileya kulyutu lyajalulénge medi kuva vinyu. Koko ko andípagwa ndyoko jumo umwe umu e avénavo mwana nnwele ku Kapalanaumu.

⁴⁷Jojo jo akaigwe kenga Yesu andiwika pa Galileya aalakela ku Yudeya, anímuukila na anínkanyilidya auke akamponie mwanagwe mwaa mwana jo avele nnwele matapata.

⁴⁸Yesu kutwala kushidoni, “Yani mwenu apa mukanona vimanyikilo na vyakutikinikanga mwiko hamunakulupila.”

⁴⁹Nanangalaledi jo kushidoni, “Nang'olo, tuke mwanangu akanava kupela.”

⁵⁰Yesu do, “Wena! Mwanavo jo mumi,” kutwala munu aijá kukulupila lilove lyatangwéle Yesu, nae kuka.

⁵¹Pashaalela auka, andíkadyania na vatumika vake shing'ati indila vamwidila kutwala vanavo kumwaulila doni, “Mwanavo mumi.”

⁵²Nae kuvaudya, “Da aponilé wakati shani?” Vanavo do, “Shilwele aponilé lido muwakati wasasaba yamui.”

⁵³Bai tatamunu andíkumbukilinneu kenga uvele wakati wowo wasasaba wamwaulidile Yesu kushidoni, “Mwanavo mumi.” Nadoni nae pamo na vanu uti vapaing'ande pake kutwala kukulupila.

⁵⁴Ashi ni shimanyikilo shambili shatandíle Yesu, shosho sho atandile paujite ku Yudeya kuka ku Galileya.