Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 5 Bible Online

Nshuwau 5 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 5

¹Ling'oto lyavinu avyo, shindípagwa shikukulu shavayuda na Yesu andyámboka kuka ku Yelusalemu.

²Napanelo ko ku Yelusalemu ko, pepi na Nnango Wavangandolo, lindípagwa litangi likumene, mushibalaniya vashishema Beteshada. Nnyenje mwake litangi lyolyo lyo, vindípagwa vitala mwanu.

³Muvitala vyovyo vyo, vashindalalanga valwele voe, vakuputala mevo, vakulamala na vakudidimanga madodo.

⁴[22]

⁵Napanelo popo po, andípagwa munu jumo wakudidimanga madodo auvauvénge vyaka salasini na nane.

⁶Yesu akamwone àlele na nae àmanyite kenga munu ajo andyuvauvanga muwakati woe, andyúdya kushidoni, “Da unkulota upone?”

⁷Wakudidimanga madodo jo kushidoni, “Nang'olo, hanguvé munu wakungutwala kungujela mmedi patindimbukanga. Kula wakati wangulingangila nangu kwinjila mmedi ninkodya junji àinjidile.”

⁸Yesu kushidoni, “Takatuka, twala litandiko lyako utwale mwanda uke!”

⁹Muwakati wowo munu jo kuponenneu na kutwala litandiko lyake kuka. Liduva lyene lyo livele liduva lyakupumula.[23]

¹⁰Vayuda napane vanímwaulila aijá munu wavamponídye kushidoni, “Nelo liduva lyakupumula, nkati mulilamulo haivaikidile wako kunyukata litandiko lyo.”

¹¹Munu jo kushidoni, “Munu ánguponidye jo ni ángwaulidile doni, ‘Nyukata litandiko lyako uke.’ ”

¹²Vayuda kumudya, “Da munu ajo ákwaulidile wako doni, ‘Twala litandiko lyako uke,’ ni nyani?”

¹³Munu wakupona aijá kanji nae hashimmanya nyani ámponidye mwaa Yesu andítivaniva mulyutu alyo kutwala kuma kwamwaa wakupagwa imbumba yoe yavanu.

¹⁴Ling'oto lya apo, Yesu anínkodya munu wamponídye aijá mwing'ande ya Nnungu kutwala kumwaulila doni, “Wako! Wako apa undipona, nadoni haunatege kavili pakulota hashinakuumililile shakupunda ashi.”

¹⁵Bai munu aijá andyúka ndavavalangangila vayuda kenga, Yesu ni ámponidye.

¹⁶Napavedoni vayuda vandítunduvanga kumpapata Yesu mwaa ashindatenda vinu avyo muliduva lyakupumula.

¹⁷Napane Yesu kuvaulila doni, “Atata ankukola madengo mpaka ambi, nadoni nanangu momo ninkukola.”

¹⁸Bai kwamwaa wamalove ala vayuda vashindamamodya kulambela mwakummalididya Yesu, i kwamwaa wakutimbanga liduva lyakupumula gweka kanji namomo yakunshema Nnungu tatake alilinganianga jo mwene na Nnungu.

¹⁹Yesu akavajang'ula kushidoni, “Nangu ninkumwaulila mwiu mwiu doni, Mwana hanaulula kutenda shinu shoeshoe shakubuni jo mwene ila ashilá shamwona Tatake atenda. Kula shinu shatenda Tatamunu nanae Mwana ankutenda shosho.

²⁰Mwaa Tatamunu ankunnagwaledya Mwanamunu na ankunnodya kula shinu shatenda jo mwene, ata mpaka anannodya vinu vyakupunda avi pakulota mwenu po mushange.

²¹Doni, mo mwavadyuwidya Tatamunu vakupela kuvapa shingumi, nimumo momo avalá vávalota Mwana, ankuvapa shingumi.

²²Ata jo Tatamunu hanamuukumu munu ila ukumu uti ankamudidyé Mwana

²³kwambangidya vanu uti vamwishimu Mwana kenga mwavamwishimila Tatamunu. Ákamwishimu Mwana hanamwishimu shinu Tatamunu, aijá ántumididye.

²⁴“Nangu ninkumwaulila mwiu mwiu doni, aijá áigwilila lilove lyangu na kunkulupila aijá ángutumididye, ankuvanavo shingumi shíkamalilika. Munu aju hanaukumigwa shinu, tayali vandimumya mukupela kummika mushingumi.

²⁵Nangu ninkumwaulila mwiu mwiu doni, wakati unkuwika na wakati wene ni wowo au wavalota vakupela kwigwa lidi lya Mwana wa Nnungu na avalá vaígwa vo, vandanama.

²⁶Doni, mo mwavalelenavo Atata shingumi shimpandukánga jo mwene, anintadya Mwanamunu momo avenavo shingumi shimpandukánga jo mwene

²⁷na andimupa madalaka akuukumu mwaa nae ni Mwana Wamunu.

²⁸“Malove ala mwenu hamunashange mwaa unkwida wakati wavalota vanu uti vavéle muvyonga kwigwa lidi lyake

²⁹kutwala kuma; avalá vatandadídye wambone mukudyuka kwashingumi, avalá vatandadídye vyakunyata mukudyuka kwaukumu.

³⁰“Nangu hangunaulula kutenda shinu shoeshoe shakubuni nene nimwene. Mwangwigwidya nangu ni mwanguukumila na kuukumu kwangu kunkuvanavo shaliya mwaa hangunatenda shinu mwangulatela nimwene ila ninkutenda mwalatela aijá ángutumididye.

³¹“Ikava kenga nangu apa ninkulivalanganga nene nimwene, bai ushuda au haunava wiu.

³²Napane kanji apali junji ánguvalanganga nangu na nangu ninkumanya kenga ushuda waumya nae anguvalanganga nangu, wìu.

³³Mwenu mundivatuma vanu kumwe Nshuwau, nae kutwala kumya ushuda waumwiu.

³⁴Nangu napane hangunagambela shinu ushuda wamunu ila vinu avi ninkutangola kwambangidya mwenu mwambolegwe.

³⁵Nae jo avele ikalaboi íshikalela na íshilangadya; mwenu muwakati padyoko, mundyámuwa kupuwanga mulilangadyo alyo.

³⁶Kanji napane ushuda wangu nangu unkupunda aulá umwe Nshuwau mwaa madengo angupele Atata ngumalile, madengo ala angutenda ankunguvalanganga kenga nditumigwa namu Atata.

³⁷Atata ángutumididye jo, nae andyumya ushuda anguvalanganga nangu. Mwenu ata lidi lyake hamwigwite, ata mwavalalele mo, hamumwanite

³⁸na lilove lyake nae halinaikala shinu mmitima myenu mwaa aijá wantumididye, jojo aju, mwenu hamunkulupidile.

³⁹Mwenu munkulambela mumaandiko mwaa nkati mwake mo mwona doni mundivanavo shingumi shíkamalilika; lolo lo ankunguumidya nangu ushuda,

⁴⁰napane mwenu munkwita kwida kwangu nangu pakulota shingumi sho, mupate.

⁴¹“Nangu lishangelo kwavanu nagambela shinu

⁴²kanji nangu ninkummanya shana mwenu kenga linagwaledyo kwa Nnungu hamuvenavo.

⁴³Nangu ngwídile palina limwe Atata, hamunangupwashalela shinu. Akaida junji palina lyake jo mwene, ajo munampwashalela.

⁴⁴Mwenu mulota kukulupila dashi ikava kenga munkuupana lishangelo shivenevene na lishangelo lyalakéla kwa Nnungu ávele jumo jojo,[24] hamunalambela shinu?

⁴⁵“Hamunakumbukile kenga nangu nanshitaki kumwe Atata. Apali jumo ánshitaki mwenu, ni jo Musha kwamuvikile mwenu lilindilililo.

⁴⁶Mwenu leka munkulupidile Musha, mukaningukulupila nangu momo mwaa nae andyandika vingwamba nangu.

⁴⁷Napane ikava kenga hamunakulupila shinu vyandike Musha, mulota kukulupila dashi malove angu?”