Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 6 Bible Online

Nshuwau 6 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 6

¹Ling'oto lyavinu avyo Yesu andyámboka litanda lya Galileya, kwali lya Tibeliyade, kuka mwangu unji

²kutwala imbumba yavanu kupita imwoda mwaa vashindalaledya vimanyikilo vyashitenda muvalwele.

³Yesu kutwala kukwela palishinga pamo na vakwoda vake ndaikalanga.

⁴Napanelo shikukulu sha Pasaka shavayuda shishindavandikanga.

⁵Yesu pamyangamyenge akona imbumba yavanu immandika nae kumudya Pilipo, “Tushuma kwashi magung'u akuvatosha vanu ava valye?”

⁶Andímudya davo anninga ila mwene àmanyite avi shashilota kutenda.

⁷Pilipo kujang'ula doni, “Ata magung'u adinali[25] dimiya mbili hayulukika kuvatosha vanu ava, kula munu apate kadonji.”

⁸Nkwóda junji Andaleya, nung'une Simoni Patulu akaashidoni,

⁹“Apali apa nnemba jumo ávenavo magung'u mwanu autani na dyomba mbili. Kanji na vinu avi vilota kuntosha nyani?”

¹⁰Yesu kutwala kushidoni, “Valamulile vanu vaikalange.” Palyutu lyolyo lyo undípagwa ukoka woe namene, bai vanu uti vandíikalanga. Pakati pavanu vovo vo, vandípagwa valume vakuwikila shikonda shadyalupu mwanu doni.

¹¹Yesu akatwala magung'u alalá kunnambwalela Nnungu, kuvajavila avalá vaikalénge na dyomba adilá kutandela momo kwodana na kenga mo mwashilatela kula munu.

¹²Bai vanu vakaikutange, Yesu andívaulila vakwoda vake doni, “Kushania makombo uti, hamunaleke ata ingalamwamwa ijaika.”

¹³Vakakushanie makombo avalakíle mumagung'u mwanu alalá, vandyúmbadya makalala kumi na mbili.

¹⁴Napanelo vanu pavagwene shimanyikilo shatandile Yesu vandítangola kushidoni, “Aju mwiu ni jo nkúlava watushinnindila aide mushilambo.”[26]

¹⁵Yesu akamanye kenga vankwida nantwala kwadimongo vauke vakankamudye shiumu, nae andítila kavili kuka gweka kumashinga.

¹⁶Napanelo pauwikile wakati wayalyulo, vakwoda vake vandyálela mpaka kulitanda.

¹⁷Vakainjila mwingalava kutwala mwanda kulodya ku Kapalanaumu. Muwakati awo liduva lindídimba na Yesu avele akanava kuwika mulyutu alyo.

¹⁸Napanelo mo mulitanda mo, andílipuka mawimbi kwamwaa waimepo íshipunga na dimongo.

¹⁹Bai vanavo vakatukushe na ding'wau shitamba shavyuluta mwanu kwali sita doni, vanímwona Yesu awena pashanya medi avandikila paingalava kutwala vanavo kujopa namene.

²⁰Yesu napane kuvaulila kushidoni, “Ni nangu, hamunajope!”

²¹Bai vanavo vanímpwashalela mwingalava amulá na muwakati wowo ingalava indíwikinneu kumwangu kwavashuka.

²²Palyamba lyake imbumba yavanu ibakidíle mwangu unji walitanda aulá vandímanya kenga palyutu alyo ìpagwite ingalava imo bai na pavakwadile vakwoda vake mwingalava ayo kuka, Yesu haukíle pamo na vanavo.

²³Napanelo dingalava dinji dyakwalalakela ku Tibeliyade dindívandika palyutu lyavavéle venentete na lyavalyaladíle magung'u ling'oto limwe UMU kunnambwalela Nnungu.

²⁴Bai imbumba yavanu ikone kenga Yesu pamo na vakwoda vake havapagwite mulyutu alyo, vanavo vandíinjilanga mudingalava kuka ku Kapalanaumu vannambela.

²⁵Napanelo vanavo vakamwone mwangu unji walitanda, vandímudya, “Labi, da wako akuno ko widilé duvani?”

²⁶Yesu akavajang'ula kushidoni, “Nangu ninkumwaulila mwiu mwiu doni, mwenu munkungulambela i kwamwaa wakwona vimanyikilo ila mwaa wakulya magung'u mpaka kwikuta.

²⁷Hamunakole madengo kwamwaa washakulya shúnda kanji kola kwamwaa washakulya shipágwa mukwing'a shingumi shíkamalilika. Shakulya asho Mwana Wamunu andamupa mwaa jojo jo, Nnungu Atata anintaa namakong'o.”

²⁸Vanavo napane kumudya, “Napanelo wetu tutende nyamani pakulota tutandedye shimadengo sha Nnungu?”

²⁹Yesu akavajang'ula kushidoni, “Shimadengo shalota Nnungu munkalele ni kunkulupila aijá wantumididye.”

³⁰Vanavo kutwala kumudya, “Wako po ulota kutenda shimanyikilo shani pakulota wetu tukukulupile? Ulota kutenda nyamani?

³¹Vanakuluvetu, shakulya shamanaa[27] vashindalya kushimbweshe kwakulinganana kenga mwavaandikidile doni, ‘Ligung'u lyakwalakela kuwa, andivapa valye.’ ”

³²Yesu kutwala kuvaulila doni, “Ninkumwaulila mwiu mwiu doni, Musha i ámpele mwenu ligung'u lyakwalakela kuwa kanji Atata ni ámupa mwenu ligung'u liu lyakwalakela kuwa

³³mwaa ligung'u lyake Nnungu ni aijá áalakadile kuwa kwing'a shilambo shingumi.”

³⁴Vanavo kutwa kumwaulila, “Nang'olo, ligung'u lyo, bai twing'a ngwengwe!”

³⁵Yesu kushidoni, “Nangu ni Ligung'u Lyashingumi. Aijá áida kwangu, hainkola shinu kavili indala na aijá ángukulupila nangu, mwiko hainkola shinu kavili inyota.

³⁶Kanji napane ndimwaulila doni, mwenu muningwona na hamunakulupila shinu.

³⁷Kula munu wangupa Atata andaida kwangu na aijá áida kwangu nangu, mwiko haninkumulanga.

³⁸Nidoni, ngwaleké kuwa i kwida ndatandedya malotelo angu ila ngwidilé ndatandedya malotelo ake aijá ángutumididye.

³⁹Napanelo malotelo amwe aijá ángutumididye ni ala, vanu uti vangupele, hanapagwe ata jumo wakungujaika kanji muliduva lyamwisho, ndivadyuwe.

⁴⁰Mwaa malotelo amwe Atata ni ala, kula munu ámwona Mwana na kunkulupila apate shingumi shíkamalilika na nangu nandyuwa muliduva lyamwisho.”

⁴¹Napanelo vayuda vaníntangadikanga shintimatima mwaa wakutangola nae doni, “Nangu ni ligung'u lyalakadíle kuwa.”

⁴²Vanavo vandítangola vaashidoni, “Da aju i Yesu mwanagwe Yoshe? Tatake na anyoke, wetu tundivamanya. Napanelo atangola dashi doni, ‘Ngwaleké kuwa’?”

⁴³Yesu akavajang'ula kushidoni, “Hamunatangole shivenevene mungutangadikanga nangu!

⁴⁴Hapali munu wakuulula kwida kwangu bila Atata ángutumididye kunnangalalela aide kwangu. Nangu munu ajo, nandyuwa muliduva lyamwisho.

⁴⁵Mumabuku avakulava vandyandika doni, ‘Vanavo uti vandava vakupundishigwa na Nnungu.’[28] Nadoni kula munu ámwigwite Atata na álipundishidye kwake nae ankwida kwangu nangu.

⁴⁶I kenga apali munu ángwene Tatamunu ila aijá áaleke kwa Nnungu, aju ni ángwene Tatamunu.

⁴⁷Nangu ninkumwaulila mwiu mwiu doni, aijá ákulupila ankuvanavo shingumi shíkamalilika.

⁴⁸Nangu ni ligung'u lyashingumi.

⁴⁹Lo manaa alalá, vanakuluvenu vandilya kushimbweshe kutwala kupela.

⁵⁰Ali ni ligung'u lyalóka kuwa kwambangidya woewoe alye na hanapele.

⁵¹Nangu ni ligung'u lingumi lyalakadíle kuwa. Munu woewoe akalya ligung'u ali andanama ngwengwe. Ligung'u lyene lyo ni wo mili wangu au wangulota kujaula pakulota shilambo shipate shingumi.”

⁵²Napanelo vayuda vandítunduvanga kutaukananga shivenevene vaashidoni, “Ilota kuva dashi nae kutupa mili wake tumamene?”

⁵³Yesu kutwala kuvaulila doni, “Ninkumwaulila mwiu mwiu doni, mwenu mukanamamena mili wa Mwana Wamunu na kukumbila myadi vyake hamuvanavo shingumi nkati mwenu.

⁵⁴Aijá álota kumamena mili wangu na kukumbila myadi vyangu ankuvanavo shingumi shíkamalilika. Nangu munu ajo, nandyuwa muliduva lyamwisho.

⁵⁵Mwaa mili wangu ni shakulya shiu na myadi vyangu ni shakukumbila shiu.

⁵⁶Aijá ámamena mili wangu na kukumbila myadi vyangu, ajo ankunama nkati mwangu na nangu kunama nkati mwake.

⁵⁷Ni kenga momo Atata mumi aningutumidya na nangu ninkunama kwamwaa wake nae, nimumo momo aijá ángumamena nangu, ajo andanama kwamwaa wangu nangu.

⁵⁸Mwenu! Ali ni ligung'u lyalakadíle kuwa. I kenga mwavalyalalele vanakuluvenu kutwala kupela; aijá álya ligung'u ali andanama ngwengwe.”

⁵⁹Vinu avi Yesu atangwele ku Kapalanaumu apundisha mushitala shakulipudidya.

⁶⁰Napanelo vakwoda vake voe vakaigwe vinu avyo vandítangola kushidoni, “Lilove ali lindikamadyanga. Alota kuulula nyani kulyunga ntima kwigwilila?”

⁶¹Yesu amanya shintimatima kenga vakwoda vake vankutangadikanga kwamwaa wavinu avyo, andívaudya, “Da vinu avi vinkunnyatila?

⁶²Ilota kuva dashi mukamwona Mwana Wamunu akwela auka kulyutu lyavéle patandi?

⁶³Imumu ni átadya shinu shivenavo shingumi, mili hashipali shatenda. Malove animwaulidile ni imumu na ni shingumi.

⁶⁴Kanji vapali vanu pakati penu vákakulupila.” Yesu andívamanya tangu kunantandi avalá vákakulupila na kummanya aijá wakunnimya nae

⁶⁵kutwala kushidoni, “Ni ashi shitadídye nangu nimwaulile mwenu doni, hapali wakuulula kwida kwangu Atata akampele litala.”

⁶⁶Kutunduvangila apo vakwoda vake voe vandyújila kunyuma, havashimwoda kavili.

⁶⁷Napanelo Yesu andívaudya avalá kumi na mbili kushidoni, “Da namwenu momo mulota mungwambukange?”

⁶⁸Simoni Patulu kutwala kunjang'ula aashidoni, “Nang'olo, wetu tuka kumwe nyani? Wako ni úvenavo malove ashingumi shíkamalilika.

⁶⁹Wetu tundikulupila na tundimanya kenga wako ni Wakwilimyanga wake Nnungu.”

⁷⁰Yesu kuvajang'ula kushidoni, “Da nangu hanintandwele mwenu kumi na mbili? Bai munu jumo pakati penu ankuva Ndamoni.”

⁷¹Yesu pashitangola davo ashimwamba Yudashi mwanagwe Simoni Shikaliyote mwaa jojo jo, avele jumo pakati pa avalá kumi na mbili, ni jojo akaukíle nannimya Yesu mushumwake.