Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 7 Bible Online

Nshuwau 7 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 7

¹Ling'oto lyavinu avyo Yesu ashipita awena mumakaja a ku Galileya bai. Nae hashilota kupita awena mumakaja a ku Yudeya mwaa vayuda vashindalambela dindila dyakulota kummalididya.

²Napanelo Shikukulu Shamakuta[29] shavayuda shishindavandikanga

³kutwala vanung'unuvake kumwaulila doni, “Twala mwanda uke ku Yudeya pakulota vakwoda vako vone shimadengo shako shautenda.

⁴Hapali ánatenda vinu kwashipii ikava kenga ankulota amanyike ngala. Napane ikava kenga unkutenda vinu avi, bai kalilodye kwashilambo.”

⁵Mwenu, ata vo vanung'unuvake ava, havashinkulupila.

⁶Yesu napane kuvaulila doni, “Isaa yangu hainava kunguwikila ila mwenu isaa yenu yakutenda vyenu ngwengwe ivelé tayali.

⁷Shilambo, mwenu mwiko hashimmangedya ila nangu shinkunguvangedya mwaa nangu ninkumya ushuda nguvalanganga kenga vitendo vyake, vindinyata.

⁸Wena mwenu po kushikukulu ko. Nangu apa, kushikukulu ashi, hanguka mwaa wakati wangu haunava kunguwikila.”

⁹Bai nae akatangole malove alo andíikala ku Galileya.

¹⁰Napane vanung'unuvake vakauke kushikulu ko, nanae andyúka kanji haukíle ngala, aukile shipiipii.

¹¹Po pashikukulu po, vananangalaledi vavayuda vashinannambela Yesu vaashidoni, “Da munu wene avelé kwashi?”

¹²Pakati paimbumba yavanu andípagwa manyinyi oe. Vanji vashishidoni, “Munu aju, wambone.” Vanji do, “Ata padyoko, aju ankuvaashadyanga venentete.”

¹³Kanji napane hapali áshitangola ngala mwaa wakuvajopa vananangalaledi vavayuda.

¹⁴Napanelo shikukulu shìvele shing'ati, Yesu andíinjila mulugwani lwaing'ande ya Nnungu kutwala kutunduvanga kupundisha.

¹⁵Bai vayuda vandíshanga vaashidoni, “Munu aju amanyité dashi Maandiko ákapundishigwe?”

¹⁶Yesu akavajang'ula kushidoni, “Mapundisho ángumya nangu, hanava shinu angu nimwene; amwe aijá ángutumididye.

¹⁷Munu woewoe akalota kutandedya malotelo ake jo mwene, andamanya kenga mapundisho ala, a Nnungu kwali ninkutangola yangu nimwene.

¹⁸Munu ánatangola yake jo mwene, alambela alipatile lishangelo jo mwene kanji aijá ánalambela lishangelo kwa aijá ántumididye, aju ni munu waumwiu na jojo jo nkati mwake, ushwang'a haupali.

¹⁹Da mwenu Musha hampele Lilamulo? Pakati penu Lilamulo alyo, hapali ata jumo átandedya. Mwaa shani munkulota mungumalidye?”

²⁰Venentete kutwala kushidoni, “Wako majini andikudulumbuwa! Da wakwashi apa álota kukumalidya?”

²¹Yesu akavajang'ula kushidoni, “Nangu ngutandilé lidengo limo kutwala mwenu kushanga.

²²Musha andyumya lilamulo lyalikumbi,[30] ata ikava kenga lilamulo ali halyalakadile kwake nae, lyaleke kwavanyakala. Na kwamwaa au mwenu munkunkumula munu likumbi muliduva lyakupumula.[31]

²³Ikava kenga munkunkumula mwana likumbi muliduva lyakupumula pakulota Lilamulo lyake Musha halinatimbikange, mwaa shani munkunguvikila shitundi mwaa wakumponia nangu munu mili wake uti muliduva lyakupumula?

²⁴Leka kuukumu kwakupamapama kanji ukumu mutumila ishaliya.”

²⁵Vayelusalemu vanji kutwala kushidoni, “Da aju i jojo wavannambela vammalidye?

²⁶Alo! I aju apa átangola ngala, vanavo me havanatangola shinu? Da vakutawala vankumanya kenga munu aju mwiu ni jo Klistu?

²⁷Kanji aju wetu tunimmanya kwalakadile. Napane Klistu jo, palota kwida hapali munu álota kummanya kwalakela.”

²⁸Napanelo Yesu apundisha mwing'ande ya Nnungu, andítangola pashanya po, “Elo, mwenu muningumanya na kwetu mundimanya. Kanji nangu hangubunidye nimwene kwida akuno ila aijá ángutumididye ni waumwiu. Mwenu nae hamummanyite,

²⁹napane nangu nimmanya mwaa ngwalakadilé kwake na jojo ni ángutumididye.”

³⁰Vanavo napane kulota vankamule kanji hapali alyalavéke kundabunya mwaa wakati wake uvele ukanava kuwika.

³¹Ata ivé davo, vanu voe pakati paimbumba vanínkulupila vaashidoni, “Da na Klistu palota kwida po, andalodya vimanyikilo vinji vyakupunda vyatenda aju avi?”

³²Napanelo mapalishayo vakaigwe imbumba ing'ung'ulanga vantambulanga Yesu, vanavo pamo na vanang'olo vavakulangalalela-shadaka vandívatuma vakushunga vauke vakankamule.

³³Yesu kutwala kuvaulila doni, “Ndapagwa kavili namu mwenu muwakati padyoko, kutwala apo ndauma kuujila kumwe aijá ángutumididye.

³⁴Mwenu munangulambela kanji hamungupata na apalá pangulota kupagwa nangu, mwenu po hamuulula kwida.”

³⁵Venentete kutwala kuudyania shivenevene, “Da munu aju alota kuka kwashi kwatukalota wetu kumpata ko? Alota kuka kwavayuda vavé kwavamidi ndavapundisha vamidi?

³⁶Amba nyamani patangola doni, ‘Munangulambela kanji hamungupata na apalá pangulota kupagwa nangu mwenu po, hamuulula kwida’?”

³⁷Napanelo muliduva lyashidududu, liduva likumene lyakumalilanga shikukulu, Yesu andítakatuka kwimila kutwala kutangola pashanya po aashidoni, “Akapagwa ínkadile inyota, aide kwangu akumbile.

³⁸Aijá ángukulupila nangu, munu ajo Maandiko ankummalanganga doni, ‘Muntima mwake dindapandukanga dyundi dyamedi ashingumi.’ ”[32]

³⁹Napane nae ashimwamba Imumu áshilota vampate avalá vankulupidíle mwaa muwakati awo Imumu jo vavele vakanava kumpata kwoda Yesu avele akanava kupata lishangelo.

⁴⁰Nadoni vanu vanji pakati paimbumba vakaigwe malove alo vandítangola vaashidoni, “Aju mwiu ni nkúlava watushinnindila aide.”

⁴¹Vanji vashishidoni, “Aju ni Klistu!” Napane vanji kushidoni, “Mene. Klistu jo, inkuululika nae kwalakela ku Galileya?

⁴²Da Maandiko hatangwele aashidoni, muudukulu umwe Daudi na mulikaja lya Beteleemu, likaja lyake Daudi, andaalakela Klistu?”

⁴³Napavedoni kwamwaa wake nae kundípagwa kujavanikana.

⁴⁴Vanji pakati pave vashindalota vankamule kanji hapagwíte wakulyalaveka kundabunya.

⁴⁵Kudabanga vila avalá vakushunga kuujila kwavanang'olo vavakulangalalela-shadaka na kwamapalishayo kutwala vanavo kuvaudya, “Mwaa shani hamumwidinavo?”

⁴⁶Vakushunga kushidoni, “Mwiko, hapali wakumanya kutangola kenga munu aijá.”

⁴⁷Mapalishayo kushidoni, “Da namwenu mundiduwangika?

⁴⁸Da apali nkútawala jumo kwali mpalishayo ánkulupidile nae?

⁴⁹Bai vanu ava vákamanyite Lilamulo, vandilanika.”

⁵⁰Napanelo Nikodemu aijá e amuukidíle Yesu, munu wamushipinga shosho shavananangalaledi, andítangola aashidoni,

⁵¹“Da mulilamulo lyetu inkupagwa aki yakumuukumu munu ukanava kumwigwa na kumanya shatandile?”

⁵²Vanavo vakanjang'ula doni, “Da nawako momo ungalileya? Wena ukalalyange shana mumaandiko; undaanalalela kenga ku Galileya, mwiko hanaaloka nkúlava ata jumo.” [

⁵³[33]Bai kula munu andyúka kwing'ande yake.