Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 9 Bible Online

Nshuwau 9 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 9

¹Napanelo Yesu apita awena andímwona munu jumo wakuputala mevo tangu shing'ang'eng'e.

²Vakwoda vake kutwala kumudya, “Labi, da lidambi lintadídye munu aju aputale mevo atagilé mwene kwali atagilé tatake na anyoke?”

³Yesu kushidoni, “Munu aju hatagile na ata tatake na anyoke momo havatagile. Shitadídye avalekwe àputele ni pakulota vitendo vya Nnungu vililodye kwa ashilá shilóta kuntandeka.[40]

⁴Indituvaikila tukole madengo amwe aijá ángutumididye uvé wo mui au. Shilo shinkwida pakaulula munu kukola madengo.

⁵Pangupagwite mushilambo, nangu ni lilangadyo lyashilambo.”

⁶Akatangole malove ala, andíshunila mata pai, kukanda ulongo padyoko kumpaka wakuputala mevo muding'wikwi

⁷kutwala kumwaulila doni, “Wena ukanavange medi kulitangi lya Shilowamu,” Shilowamu mana ake wakutumigwa. Bai munu wakuputala mevo aijá andyúka ndanavanga medi kutwala kuja alola.

⁸Napanelo vashitanonomwagwe pamo na vanji váshimwona anama kujugwa, vashindatangola vaashidoni, “Da aju i jojo áshiikala vila ajugwajugwa?”

⁹Vanji kushidoni, “Ni jojo!” Vanji kavili kushidoni, “Hanava shinu nae, ila vandilandana.” Kanji jo mwene kutwala kulivalanga shana kushidoni, “Mwenu nangu ni nene.”

¹⁰Vanavo kutwala kumudya, “Kanji napanelo upatilé dashi kulola?”

¹¹Nae kushidoni, “Munu jo wavanshema Yesu andikanda ulongo, kungupaka muding'wikwi kutwala kungwaulila doni, ‘Wena ku Shilowamu ukanavange medi.’ Nangu kuka ndanavanga kutwala popo po, nangu kulalenneu.”

¹²Vanavo kumudya, “Napanelo munu wene avelé kwashi?” Nae kushidoni, “Nangu namanya shinu.”

¹³Bai vanavo vaníntwala munu e avéle wakuputala mevo kumuukanavo kwamapalishayo.

¹⁴Napanelo liduva lyene lyakandíle Yesu ulongo na lyantadídye alole, livele liduva lyakupumula.

¹⁵Mapalishayo navanavo kutwala kumudya mwapatidile kulola. Nae jo kuvaulila doni, “Angupakilé ulongo muding'wikwi, nangu kunavanga medi na ambi apa ninkulola.”

¹⁶Mapalishayo vanji kutwala kushidoni, “Munu aju hanaaloka shinu kwa Nnungu mwaa ankutimbanga liduva lyakupumula.” Vanji kushidoni, “Kanji ilota kuululika dashi munu wakutega kulodya vimanyikilo kenga avi?” Bai pakati pave kundípagwa kuvilingananga.

¹⁷Vanavo vandímudya kavili aijá e aputéle kushidoni, “Pakuva munu ajo andikuponia, napanelo wako umwona kuva kenga nyani?” Nae kushidoni, “Nkúlava.”

¹⁸Vananangalaledi vavayuda, vanavo havashikulupila kenga kala po munu ajo andíputala mevo kutwala ambi apa kulola mpaka vandyúka ndavashema vatatavake

¹⁹kuvaudya, “Da aju i jo mwanagwenu wamummalanganga kenga avalakwadidyé àputele mevo? Napanelo apatilé dashi kulola?”

²⁰Vatatavake kushidoni, “Aju tunimmanya kuva mwanagwetu na avalakwadidyé àputele mevo.

²¹Napane mwapatidile kulola mo, hatumanyite na aijá ántadidye alole, hatummanyite. Mudye jo mwene jo andikulumuka jo, ankuulula kulivalanganga.”

²²Vatatavake vo vandíjang'ula davo mwaa wakuvajopa vananangalaledi vavayuda. Doni, vananangalaledi vo vandípakanila pakulota munu woewoe álota kummalanganga Yesu kuva Klistu vammingange pashitala shakulipudidya.

²³Ni ashi shitadídye vatatavake vatangole doni, “Mudye jo mwene jo andikulumuka ajo.”

²⁴Vanavo vakanshema kavili munu aijá e aputéle mevo kutwala kumwaulila doni, “Mupe Nnungu lishangelo! Wetu tundimanya kenga munu wene jo, nkùtega.”

²⁵Nae kushidoni, “Yakuva nae munu wakutega hangunamanya shinu. Shangumanyite ni ashi: kala po hanishilola, ambi apa ninkulola.”

²⁶Vanavo kumudya kavili, “Akutandilé nyamani? Akutandalelé mwashi mpaka wako kupata kulola?”

²⁷Nae kushidoni, “Nangu nimwaulila kanji mwenu hamunangwigwilila shinu. Napanelo mwaa shani munkulota nimmalangile kavili? Da namwenu momo mulota muve mmakwoda vake?”

²⁸Bai vanavo vanínniula vaashidoni, “Nkwóda wamunu wako ni gwegwe umwene. Wetu tuvakwoda vake Musha.

²⁹Wetu tundimanya shana kenga Nnungu anditangola shalowa namu Musha kanji munu ajo kwalakadile, hatumanyite.”

³⁰Munu jo kuvajang'ula doni, “Kulava mwenu! Mwenu ata mukanamanye kwalakadile kanji ni jojo ángutadidye nangu ngulole.

³¹Wetu tundimanya kenga Nnungu hanamwigwa nkútega kanji aijá ámwishimu na átandedya malotelo ake, ajo nae ankumwigwa.

³²Tangu kunantandi hainava kwigwinika do, munu woewoe anintadya kulola wakuputala mevo shing'ang'eng'e.

³³Aju leka àkaalakadile kwa Nnungu hanaulule kutenda ata shidikidiki nyenda.”

³⁴Vayuda kutwala kushidoni, “Wako uvalakwididyé uti mmadambi; napanelo ulota utupundishe wetu?” Bai vanímminganga mushitala shakulipudidya.

³⁵Napanelo Yesu akaigwa do, munu wampatiidye kulola aijá vanimminganga mushitala shakulipudidya. Akankodye andímudya, “Da wako unkunkulupila Mwana Wamunu?”

³⁶Munu jo kushidoni, “Nang'olo, da munu wene jo wakwashi kwambangidya nangu ninkulupile?”

³⁷Yesu kushidoni, “Wako undimwona. Ni jojo átangola namu wako po.”

³⁸Munu kushidoni, “Nang'olo ninkukulupila.” Bai nae kutwala kulipudya kumili kwake.

³⁹Yesu kushidoni, “Shangwidilidile mushilambo amu ni kwamwaa wakuukumu pakulota avalá vákalola vapate kulola na avalá valóla, vaputale.”

⁴⁰Napanelo mapalishayo vanji vapagwíte pepi namu pavéle Yesu vakaigwe malove alo vandímudya, “Da wetu po momo tundiputala?”

⁴¹Yesu kushidoni, “Mwenu leka mùputele mevo, mukanave na lidambi. Kanji kwodamwaa munkushidoni, ‘Tunkulola,’ lidambi lyenu lyo, linkupagwa.”