Read Ibibiliya mu Shimakonde Imbodi Yaambi na dimbande dya Imbodi Yakala Vitendo 1 Bible Online

Vitendo 1 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 1

¹Nang'olo Teopilo! Mulibuku lyangu litandi kwandika, ndivalanganga vinu uti vyatandile Yesu na vyapundishidye kutunduvangila kunantandi

²mpaka muliduva lyaukile ndatanduligwa kuka kuwa ling'oto lyakumya malailililo na dimongo dya Imumu Wanashwe kuvapa vamyombe vake vavatandwele.

³Ling'oto lyakupela nae andidyuka na andililodya myanda vyoe kumili kwave na vimanyikilo víkave ntau vyakulilodya nae kuva mumi. Vanavo vandyonanavo muwakati wamaduva alubaini avavalangangila ing'ano yautawala wa Nnungu.

⁴Pakati pamaduva alo, muliduva limo vàvele pamo, andívaanyalela lilamulo aashidoni, “Hamunatumuke pa Yelusalemu apa; lindila ashilá shalivikile Atata shamungwigwite nimmalangangila.

⁵Mwiu Nshuwau andibatisha na medi kanji mwenu mundabatishwa na Imumu Wanashwe muwakati wakuvandika.”

⁶Napanelo vakwoda vake vakaimang'anange vandímudya, “UMU, undadyuwangidya kavili ambi apa utawala kwavanaishilaeli?”

⁷Nae kushidoni, “Mwenu haimmaikidile kumanya wakati na maiko ávikile Atata kwamadalaka ake jo mwene

⁸kanji mwenu mundapata dimongo dya Imumu Wanashwe álota kumwidila na mwemwe mundava mmashuda vangu kutunduvangila pa Yelusalemu, ku Yudeya, ku Shamaliya mpaka mwisho washilambo.”

⁹Akatangole malove alo, nae kutanduligwa vanavo vamwona kwinjila mulyundi kutwala kugwalagwala pavakamwona kavili.

¹⁰Vanavo valola kuwa ndoo, nae àukile, mwe! Popo po kwaneka vanu vavili vadikanju dyanashwe

¹¹kutwala kushidoni, “Mmagalileya, mulalela nyamani kuwa? Jo Yesu wavamuumidye pakati penu kuka kuwa, andaaloka kenga mo mwamumwanalele auka kuwa.”

¹²Napanelo vanavo vandyúma palishinga lyamilandi vyaulivela livéle pepi na pa Yelusalemu kuka ku Yelusalemu; lyutu ali lishitwala shitamba shamwanda waliduva lyakupumula.[1]

¹³Vanu avo, yani Patulu, Nshuwau, Tiyagu namu Andaleya, kwida Pilipo, Tome, Balutolomeu namu Mateu, kwatika Tiyagu mwanagwe Alupeu, Simoni aijá Shelote namu Yudashi mwanagwe Tiyagu, pavawikile nkaja amulá vandyúka ndainjila mushumba shavawikidíle shapashanya ulungu.

¹⁴Bai vanavo uti kwaunapamo vashindashwali; vashindashwalinavo Maliya anyoke Yesu na vanung'unuvake Yesu pamo na vakongwe vanji.

¹⁵Napanelo muwakati awo muliduva limo vandíkadyanianga vanung'unumunu vakuwikila kenga imiya imo na ishilini kutwala Patulu kutakatuka pakati pave kutangola doni,

¹⁶“Mmanung'unumunu, Maandiko atangwele kala Imumu Wanashwe kwaindila imwe Daudi andivaikila awikile popo; Maandiko lo amwamba Yudashi, nannimya wakulangalalela shipinga shinkamwíle Yesu

¹⁷mwaa nae avele munu wamushipinga shetu na jojo jo, vanínjavila imbandi muutumika au.”

¹⁸Mwenu, munu aju andíshuma lyutu kwapaida yashitendo shaungave-shaliya; palyutu lyolyo lyo, nae andígwanga kutwala kutumbuka utumbu kupushuka.

¹⁹Shitendo asho vayelusalemu uti vandígwa; ni ashi shitadídye mwinangodi yave lyutu alyo vasheme Akelidama yani lyutu lyamyadi.

²⁰Patulu andyúka mushu aashidoni, “Mulibuku lya Dimu vandyandika doni, “ ‘Ing'ande yake ive lidembe hanapagwe munu wakwikala kavili mulyutu alyo.’[2] Kutwala kavili kushidoni, “ ‘Shinang'olo shake akamule junji.’[3]

²¹Napavedoni jumo pakati pavalume valyunganiénge namu wetu muwakati uti washitupamba UMU Yesu

²²kutunduvangila paubatisho umwe Nshuwau mpaka muliduva lyavantandwile UMU Yesu pakati petu kuka kuwa, jumo pakati pavalume avo ave nshudamwetu wakudyuka kwake Yesu.”

²³Bai vandívalodya vanu vavili: Yoshe áshimanyika kwalina lya Balishabashi na lya Yustu na kunnodya Matiyashi.

²⁴Kutwala apo vandíshwali vaashidoni, “UMU, wako úmanyite mitima vyavanu uti tulodya wauntandwele pakati pavanu vavili ava

²⁵wakutenda imbandi muutumika au waumyombe wo waukile ndaashela Yudashi kuka lyutu limmaikidíle.”

²⁶Vakatende shimwavi shinínkalela Matiyashi; nadoni nae vanímpambanianga mushipinga shavamyombe kumi na moja avalá.