Read Ibibiliya mu Shimakonde Imbodi Yaambi na dimbande dya Imbodi Yakala Vitendo 10 Bible Online

Vitendo 10 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 10

¹Napanelo pa Shashaleya andípagwa munu jumo walina Koluneli, nang'olo wavaing'ondo miya vamushipinga shavashishema shavaitaliya.

²Munu aju pamo na vanu uti vapaing'ande yake vandyálala mitima na vashindanjopa Nnungu; nae ashindavapa lipwashalelo lyoe vamashikini na ashindashwali ngwengwe kwa Nnungu.

³Muliduva limo, muwakati wasatisa yalyulo, mwindoti Nnungu anínnodya Koluneli njelo wake kutwala njelo jo kunshema, “Koluneli!”

⁴Koluneli anínnola ndoo, anjopa kutwala kushidoni, “Da nyamani nang'olo?” Njelo kushidoni, “Kushwali kwako na lipwashalelo lyaunaumya uvapa vamashikini Nnungu inkunnagwela na hanalivaliva shinu.

⁵Napavedoni vatumidye vanu ku Yope vakakushamele Simoni, munu ámanyika kwalina lya Patulu;

⁶jojo jo avelé paing'ande imwe Simoni munu wakuushila magwogwe, ing'ande ivéle nanyenje imanga.”

⁷Bai njelo áshitangola namu Koluneli akaume, Koluneli andívashema vatumika vake vavili vapaing'ande pake namu mwing'ondo wake jumo wakwalala ntima wamushipinga shavaing'ondo vake,

⁸kuvavalangangila vinu uti vitandéke kutwala kuvatumidya ku Yope.

⁹Palyamba lyake vàvandike panjini, muwakati waliduva pamuti Patulu kunjini ko kukwela paulungu kuka ndashwali.

¹⁰Kanji ikankole indala, andílota apate shakulya; napanelo vankandyangidya shakulya asho, Nnungu andímupa indoti

¹¹kutwala nae kwona kuwa na kwona shinu mwalikuba likumene lyakukandapala kenga lyavakamulanidile mumapepe uti nsheshe lishulukila pai;

¹²nkati mwake kupagwa kula likola lyavanyama vamadodo nsheshe na kula likola lyavanyama vakulyuta vapagwíte mushilambo na kula likola lyavyuni vyakuniania.

¹³Kutwala nae kwigwa lidi líshishidoni, “Patulu, takatuka uvashinde uvamamene!”

¹⁴Kanji Patulu kushidoni, “UMU! Davo po mene; nangu tangu hangunava kulya shinu ata shimo shishapu kwali shidagwa.”

¹⁵Lidi kutangola mwanda wambili liishidoni, “Haunone kuva shishapu shatadidye Nnungu kuva shakutakata!”

¹⁶Shitendo ashi shikatandeke myanda mitatu, likuba vandyújidya kuwa.

¹⁷Napanelo Patulu akuno alambela kumanya mana aindoti yapatile kwalakela kwa Nnungu, vanu vavatumile Koluneli vandyúdyangidya ing'ande imwe Simoni na vandíwika mpaka pannango.

¹⁸Vanavo kushema kutwala kudya, “Da paing'ande apa apali njeni walina Simoni ámanyika kwalina lya Patulu?”

¹⁹Patulu akumbukilanga indoti yapatile ailá, Imumu andímwaulila doni, “Wako, vanu vatatu vankukulambela pai po!

²⁰Takatuka ushuluke! Haunaambambidye kuka namu vanavo mwaa vovo vo, palyutu ali nivatumididye nangu apa.”

²¹Patulu akashuluke andívaulila doni, “Munu wamunnambela jo, ni nangu apa. Da shana mwidilidilé nyamani?”

²²Vanavo kushidoni, “Wetu twalakela kwanang'olo wavaing'ondo walina Koluneli; nae ni munu waishaliya na wakunjopa Nnungu na ni munu waushuda wambone kwavenentete uti vayuda. Jojo jo, njelo wakwilimyanga andimwaulila akusheme uke kwing'ande yake ukamwaulile shauvenavo.”

²³Bai Patulu andívapwashalela vajeni vo paing'ande; palyamba lyake nae namu vanavo vandímalidya mwanda kutwala vanung'unumunu vanji va pa Yope kumpalakela.

²⁴Muliduva lyambili lyake, vanavo kuwika pa Shashaleya. Koluneli avalindila, andívalalika valikola pamo na vavagwe vapantima.

²⁵Patulu pawikile paing'ande, Koluneli andyúka ndampwashalela kutwala kuunama alipudya kumwe Patulu.

²⁶Patulu napane kuntakatuwa aashidoni, “Takatuka! Mwaa nangu momo nimunu kenga wako.”

²⁷Nae atangola namu Koluneli, andíinjila nng'ande kuvakodya vanu vàumbalanidile

²⁸kutwala kushidoni, “Mwenu mundimanya shana kenga nkati mulilamulo munkulaeka muyuda woewoe kulijalanianga mushipinga shavamidi kwali kulitenda shijeni muding'ande dyave. Kanji Nnungu aningwaulila haninansheme munu woewoe kuva nshapu kwali ndagwa.

²⁹Ni ashi shitadídye nangu mukangusheme kwida panikava na shinyadinyadi; napanelo munkuulula kungwaulila shamungushamadile?”

³⁰Koluneli kutwala kushidoni, “Mumaduva matatu[16] apitíle nangu ngushindapagwa mukushwali nng'ande mwangu amu muwakati kenga wowau wasatisa. Bai kwashingangala andyáneka munu àgwete dinguvo dyakumalameta

³¹kutwala kushidoni, ‘Koluneli, kushwali kwako ngwengwe Nnungu ankwigwa na lipwashalelo lyako lyaunaumya uvapa vamashikini hanalivaliva shinu.

³²Napavedoni vatumidye vanu ku Yope vakakushamele Simoni, munu ámanyika kwalina lya Patulu; jojo jo avelé paing'ande imwe Simoni munu wakuushila magwogwe, ing'ande ivéle nanyenje imanga.’

³³Nangu kuvatuminneu vanu kwida ndakushema na tundilambwalela mwaa wakuwika kwako. Napanelo wetu apa tundikadyania pamevo pake Nnungu pakulota twigwe uti vyakutumenge UMU utuvalangangile.”

³⁴Patulu kutwala kutunduvanga kutangola aashidoni, “Napanelo mwiu ninkumanya kenga Nnungu hanampambula munu

³⁵kanji muvenentete uti woewoe ánjopa Nnungu na kutandedya ishaliya, ajo ankukubaligwa namu nae.

³⁶Kwaupande walilove lyatumididye nae kwavanaishilaeli livalangánga ntenga wambone waamani kwaindila imwe Yesu Klistu àvele UMU wavanu uti,

³⁷mwemwe mmene mundimanya shana nyamani shitandéke Yudeya uti kutunduvangila ku Galileya ling'oto lyaubatisho wavalangenge Nshuwau,

³⁸mwashi mwampakidile mauta Yesu wa ku Nashaleti kwa Imumu Wanashwe na dimongo kutwala nae kuwena atandedya wambone apita avaponia vanu váshitawaligwa na Ndamoni mwaa Nnungu andípagwa namu nae.

³⁹Wetu apa tuvashuda wavinu vyatandile nae mushilambo uti shavayuda mpaka pa Yelusalemu. Jojo jo vanu vanímpedya kwaindila yakunkamalela panshalaba

⁴⁰kutwala Nnungu muliduva lyantatu kundyuwa na kunnodya

⁴¹kanji i kwavanu uti ila kwetu wetu tuvashuda vátutandwele Nnungu tangu kala, wewe túlile na túkumbidile namu nae ling'oto lyakudyuka pakati pavakupela.

⁴²Nae wetu anditutuma tuvalangange ntenga kwavenentete na tumye ushuda kenga nae Nnungu andimupa madalaka akuva nkúukumu wavangumi na vapadíle.

⁴³Ajo vakulava uti vankumuumidya ushuda kenga kula munu ánkulupila nae ankupata kulivalivigwa kwamadambi kwaindila yalina lyake.”

⁴⁴Patulu akuno atangola, vanu uti váshimwigwilila muwakati wowo andívashulukila Imumu Wanashwe.

⁴⁵Kanji vakukulupila vaaléke namu Patulu ku Yope vàvele vayuda, vandíshanga pavagwene vamidi navanavo momo Nnungu avamiminila Imumu Wanashwe

⁴⁶mwaa vanavo vashindavaigwa vamidi avalá vatangola dinangodi dyakutikinikanga na vantumbyanga Nnungu. Patulu kutwala kushidoni,

⁴⁷“Da apali munu álota kuvaleya vanu ava havanabatishwe na medi ikava kenga navanavo vanimpata Imumu Wanashwe kenga mo mwatumpatidile wetu?”

⁴⁸Bai Patulu andílamulila vavabatishe palina limwe Yesu Klistu na vanavo vanínjugwa vaikanavo maduva akudyangangila.