Read Ibibiliya mu Shimakonde Imbodi Yaambi na dimbande dya Imbodi Yakala Vitendo 14 Bible Online

Vitendo 14 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 14

¹Napanelo pa Ikoniu Paulu namu Balinaba vandíinjila mushitala shakulipudidya shavayuda na kwainamuna yavatangwele, imbumba yavayuda na yavagalegu indíkulupila.

²Kutwala vayuda vákaitikidile lilove alyo vandivatubya vamidi pakulota vavapinge vanung'unumunu avo.

³Napavedoni vandíikala maduva oe namene pa Ikoniu vammalanganga UMU pavakajugulanga shinu na UMU nae ashindaing'a ushuda kwalilove lyaumonyo wake kwaindila yakuvapa dimongo dyakutandela vimanyikilo na vyakutikinikanga.

⁴Nadoni vanu vankaja amo vandíjavanikana; kupagwa shipinga shavayuda na kupagwa shipinga shaupande wavamyombe.

⁵Bai vayuda, vamidi pamo na vakutawala vave, vandyúnganila kuvauvyauvyanga na kuvaamanga majanga vamyombe.

⁶Napanelo Paulu namu Balinaba vakamanye nnugu awo, vandítilila ku Lishitala na ku Delebe makaja ashilambo sha ku Likaoniya na kutilila mumakaja anji ashitanono.

⁷Vanavo mumakaja alo, vashindavalanganga ntenga wambone.

⁸Napanelo pa Lishitala andípagwa munu jumo wakudidimanga madodo áshiikala vila, avele mmashikini tangu shing'ang'eng'e shake na ákashiwena.

⁹Munu aju pashimwigwilila Paulu; Paulu pannodile ndoo, akamwone kuvanavo likulupililo lyakulota apone,

¹⁰andítangola pashanya po, amwaulila doni, “Takatuka wimile!” Munu aijá kutakatukinneu na kutunduvanga kuwena.

¹¹Vanu vaumbalanidíle apo pavagwene shitendo ashi shatandile Paulu, vandíjunga vatangola mushitangodi shalikaoniya vaashidoni, “Vannungu vandijalukanga kuva mwavanu kutwala kushuluka kutwidila!”

¹²Balinaba vashinshema Sheushi na Paulu kunshema Elimeshi mwaa nae ni ashiva nkutangola.[27]

¹³Napanelo nkúlangalalela-shadaka wake Sheushi, nnungu wavandangaléle ing'ande yake pashengo likaja, andívaukanavo vang'ombe na lidaka lyadinduva pashengo likaja mwaa nae pamo na imbumba yavanu vanji vashilota vavashindange vanyama avo, vatende shadaka shakulipudidya kumili kwave.

¹⁴Kanji Balinaba namu Paulu, vamyombe ava pavaigwite shitendo asho, vandípapulanga dinguvo dyave, kulijela shing'ati imbumba vatangola pashanya po[28]

¹⁵vaashidoni, “Mwenu, mwaa shani munkutenda davo? Wetu apa, tuvanu túumbigwe kenga mwenu; apa wetu twidilé nammalangangila ntenga wambone pakulota muleke vinu vyamambinya avi, mushinjiulile mitima vyenu kwa Nnungu mumi ákandyenge kuwa na pai, imanga na vinu uti vipagwíte mumautu alo.

¹⁶Muwakati wapanyuma, Nnungu andívaleka venentete uti vawene mwavalatela vo vene.

¹⁷Kanji ata ikave davo, nae ngwengwe halakíle kulilodya kwavanavo; andilodya wambone wake kwaindila yakuntanyela imbula yakuwa, kumupa mapuno muwakati wake, kumupa shakulya shoe shamwikuta na kumuumbadya lipuwilo mmitima vyenu.”

¹⁸Kanji ata vamyombe vakavatangalele malove alo pakulota vavalakeye kutenda shadaka shakulipudidya kumili kwavanavo pandíkamadyanga namene.

¹⁹Napanelo mo nkaja mo, vandíwika vayuda vaantiyokiya ya ku Pishidiya na vaikoniu kutwala kuvatumbilikanga vanu vankaja amo; bai vandímwamanga majanga Paulu, kumuutanga kuka nanjaa kunyenje likaja vona kenga andipela.

²⁰Kanji vakwoda vakauke nantang'anedya Paulu, Paulu andítakatuka kuujila nkaja. Kutwala palyamba lyake nae namu Balinaba kuka pa Delebe.

²¹Napanelo vanavo vakavalangange ntenga wambone pa Delebe vandítadya voe vave vakwoda. Kutwala apo, vandyújila pa Lishitala, kuma apo kuka mpaka pa Ikoniu na vandíwika pa Antiyokiya ya ku Pishidiya.

²²Mumakaja alo, vanavo vashindapita vavanonowanga vakwoda vavapa ntima pakulota vauke mushu mulikulupililo na vavamanyiya doni, “Indivaikila tupite mumauvilo oe kwambangidya twinjile muutawala wa Nnungu.”

²³Namomo mumaganisha uti avashipita, vashindavatandola vanang'olo; ling'oto lyakushwali na kunga vashindavavika vakwoda uti mmakono mwake UMU wavankulupidile.

²⁴Vakapite shilambo sha Pishidiya vandíwika ku Pampiliya.

²⁵Vakavalangange ntenga wa Nnungu pa Pelege vandyálalela pa Ataliya.

²⁶Pavaumile pa Ataliya vandíinjila mwingalava kuujila ku Antiyokiya ya ku Shiliya palikaja lyavavakamudídye kwaumonyo umwe Nnungu kwashimadengo asho shavamalidile.

²⁷Pavawikile, vandíshema liganisha kutwala kuvalanganga vyatandile Nnungu kwaindila yavanavo na mwavapalalele litala vamidi pakulota vavenavo likulupililo.

²⁸Bai vanavo vandíikala maduva oe namene nkaja amo pamo na vakwoda.