Read Ibibiliya mu Shimakonde Imbodi Yaambi na dimbande dya Imbodi Yakala Vitendo 16 Bible Online

Vitendo 16 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 16

¹Nae andyúka mushu na shimwanda shake mpaka pa Delebe na pa Lishitala; napanelo palyutu alyo ashindanama nkwóda jumo walina Timoti; anyoke avele nkúkulupila walikola lyashiyuda kanji tatake avele mugalegu.

²Jo Timoti aju, vashinammalanganga wambone vanung'unumunu va pa Lishitala na va pa Ikoniu.

³Paulu inínnagwela antwale ave wakumpalakela. Akantwale nae anínkumula likumbi[34] mwaa vayuda váshiikala ako vandímanya doni tatake Timoti avele mugalegu.

⁴Napanelo mumakaja avashipita, vashindavapa vakwoda uwamushi wavaumidye vamyombe na vanang'olo ku Yelusalemu kwambangidya vatandedye.

⁵Nadoni maganisha ashindaliimiliyanga nkati mulikulupililo na vanu vashindauka mushu vaanjadyeka.

⁶Vanavo vandípita isemu ya ku Piligiya na ku Galata vakadivililigwa kwa Imumu Wanashwe kuvalanganga lilove ku Ashiya.

⁷Pavawikile pa Mishiya, vandílingangila vauke ku Bitiniya kanji Imumu wake Yesu havalataléle vauke.

⁸Napavedoni vanavo vandípita pa Mishiya kwalalela pa Tolowashi.

⁹Napanelo shilo Paulu indímwidila indoti: munu wa ku Makedoniya àimidile anjugwangila doni, “Shonde, amboka wide kwetu ku Makedoniya utupwashele.”

¹⁰Ling'oto lyakwona indoti ayo, tundílipanganiyangidyanneu kuka ku Makedoniya tumanya kenga Nnungu anditutuma tuke tukavavalangangile vamakedoniya ntenga wambone.

¹¹Kutwala wetu kuma pa Tolowashi kukwela mwingalava kuka shalowa mpaka pashitingi sha Shamotolaki; palyamba lyake wetu kuwika pa Neyapolishi.

¹²Patumile apo tundyúka mpaka pa Pilipo likaja lya dishiklitu itandi yashitajili yalijimbo lya Makedoniya lyavashitawala valoma. Palikaja ali, wetu tundíikala maduva atwikalénge.

¹³Napanelo muliduva lyakupumula, wetu tundyúma palikaja po kuka kulundi kushinu kwatushona kenga tundapata lyutu lyakushwalidya; wetu kwikalanga kutwala kutunduvanga kutangonavo vakongwe vakadyaniénge mulyutu alyo.

¹⁴Pakati pavakongwe váshitwigwilila andípagwa nkongwe jumo áshilipudya kwa Nnungu walina Lidiya áshishumidyanga dinguvo dyakupapeka dyailangi yanshambalau na wakwalakela kulikaja lya Tiyatila. UMU napane andímuungula ntima pakulota kwigwa shana vyashitangola Paulu.

¹⁵Ling'oto lyankongwe ajo kupata ubatisho pamo na vapaing'ande pake, andítujugwangila aashidoni, “Ikava kenga mwenu munkungwona kenga nangu ninkúkulupila wake UMU, tuke mukaikale kwing'ande kwangu.” Bai nae andítuulula kutuukanavo kwing'ande kwake.

¹⁶Napane ive doni, wetu tuka kulyutu lyakushwalidya alilá, andítwidila mwali jumo ntumwa e avénavo lijini lyadyangele; jojo jo, ashindavapatiya malupulupu oe vanang'olo vake kwashimadengo shake shadyangele.

¹⁷Nae amwoda Paulu namu wetu ashindakugwanga pashanya po aashidoni, “Vanu ava ni vatumika vake Nnungu Wapashanya-uti; vankummalangangila indila yakwambola.”

¹⁸Malove ala nae andítangola mumaduva oe kutwala kumwisho kwake Paulu kunnyatila; akashiliuka kumwaulila lijini jo doni, “Palina limwe Yesu Klistu ninkukulamulila, kuma mumili mwamwali aju!” Lijini kuuminneu.

¹⁹Napanelo vanang'olo vene mwali ntumwa aijá pavagwene kenga lilindilililo lyave lyamalupulupu linditimbikanga, vaníntwala Paulu na muje Shilashi kupita vavautanga mpaka kwavakutawala kushiwanja shikumene shamikodyanio

²⁰kutwala kuvalodya kwavananangalaledi valibengi vaashidoni, “Vanu ava vayuda na vovo vankutimbanga likaja lyetu.

²¹Hainatoshe vankwidanavo mapundisho alaéka kwetu wetu tuvaloma kwitikila na kwodedya.”

²²Bai imbumba yavanu ikatunduvange kuvakanyalanga, vananangalaledi valibengi vandílamulila vavaulange dinguvo na vavashape.

²³Ling'oto lyakuvakoma namene, vandívatwala kuvagang'aledya nkalaboshi kutwala kumwaulila nanangalaledi waikalaboshi avalaledye namene.

²⁴Bai nanangalaledi waikalaboshi akapate malamulo alo, andívatwala kuka ndavajela kushumba shankati uti kutwala madodo kuvaungangila mulikukwa.

²⁵Napanelo ìvele kenga shilo shing'ati doni, Paulu namu Shilashi vashindashwali na vashindaimba dimu dyakuntumbyanga Nnungu akuno vakungwa vanji vavaigwilila.

²⁶Kwashingangala kuumilila shindangenda shakujowa mpaka ikalaboshi kundangenda uti, milango kushimukanginneu na vakungwa uti mang'unyang'unya kuungukanga.

²⁷Napanelo nanangalaledi waikalaboshi paimwike, akone milango vìvele mwandwa, andítwala lyambila pakulota alibyae mwaa ashona kenga vakungwa vanditipukanga.

²⁸Kanji Paulu andíkugwa namene aashidoni, “Haunalitende shakunyata! Wetu uti tupali.”

²⁹Bai nanangalaledi waikalaboshi andíshamela shenje kutwala kwinjila shipajelo nkalaboshi akuno atatamela kuka ndaunama mushu mwake Paulu namu Shilashi.

³⁰Nae kutwala kuvaumidya panda kuvaudya, “Mmanang'olo inguvaikidile ngutende nyamani ngwambolegwe?”

³¹Vanavo kushidoni, “Nkulupile UMU Yesu, undaambwalegwa, wako pamo na ing'ande yako.”

³²Bai vanavo vanímmalangangila lilove lyake UMU nae pamo namu avalá uti vamwing'ande yake.

³³Mwisaa yoyo nae andívatwalinneu kuvaukanavo ndavaukanga vilonda na muwakati wowo andíbatishwa pamo na vanu vake uti.

³⁴Akabatishwe, andívatwalinneu vapaulu kuvaukanavo kwing'ande kwake ndavapa shakulya. Bai nae andípuwanga namene pamo na vapaing'ande pake uti mwaa wakunkulupila Nnungu.

³⁵Napanelo wiko paushwenge, vananangalaledi valibengi vandívatuma vadyoko vave vaashidoni, “Vaungule vanu avalá.”

³⁶Kutwala nanangalaledi waikalaboshi kumwaulila Paulu kushidoni, “Vananangalaledi valibengi vandilamulila mwenu muunguligwe. Nadoni umananga muke kwaamani!”

³⁷Kanji Paulu andívajang'ula vanavo kushidoni, “Aba! Vatushapilé paumbala na kutugang'aledya nkalaboshi pavakalalyanga shana mwaa wene na wewe tùvele tuvaloma! Napanelo valota vatuungule shipiipii? I mwanavo! Indivaikila vaide vo vene, vatuungule.”

³⁸Vadyoko kuja kuka ndavaulila vananangalaledi vave valibengi malove alo. Vanavo pavaigwite kenga vapaulu vavele venentete valoma, vandíjopa namene.

³⁹Bai vanavo vandída ndavajugwa samaani vapaulu na ling'oto lyakuvaungula nkalaboshi, vandívajugwangila vaume nkaja.

⁴⁰Vapaulu vakaume nkalaboshi vandyúka kwing'ande imwe Lidiya na paing'ande apo vandívakodya vanung'unumunu; bai vanavo vandívapa ntima shii vanung'unumunu avo kutwala kuma nkaja mu Pilipo mo kuka.