Read Ibibiliya mu Shimakonde Imbodi Yaambi na dimbande dya Imbodi Yakala Vitendo 17 Bible Online

Vitendo 17 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 17

¹Vakapite pa Ampipolishi namu pa Apoloniya vandíwika pa Teshalonika; po pa Teshalonika po shindípagwa shitala shakulipudidya shavayuda.

²Napanelo mudishumana nnatu mumaduva akupumula, Paulu kenga lidyavalelo lyake andyúka kushitala shakulipudidya ndataukananganavo vayuda atunduvangila mu Maandiko

³avaulila na avalodya kenga Klistu inímmaikila auvauvange na adyuke pakati pavakupela na ashindatangola aashidoni, “Jo Yesu wanimmalanganga aju, ni Klistu wene.”

⁴Bai vayuda vanji vandishambegwa kutwala kulyunganianga namu Paulu namu Shilashi; namomo indílyunganianga imbumba yavagalegu váshilipudya kwa Nnungu pamo na vakongwe voe vakwishimika.

⁵Kanji vayuda vandívanavo ing'ou vakavatwalanga vakubanga vanji vapashakoni vakaunga shipinga shavo shaupuju kupita vataa upuju nkaja; vanavo vandyúka ndapajola ing'ande imwe Yashoni valota vankamule Paulu namu Shilashi vavaukenavo kuumbala.

⁶Kanji kwodamwaa havavapatíle, vanavo vandímuutanga Yashoni pamo na vanung'unumunu vanji kuvaukanavo kwavananangalaledi vapalikaja alyo vajunga pashanya po vaashidoni, “Vanu ava vapíta vatindinganianga shilambo, nkaja amu momo vandiwika.

⁷Vanu vovo Yashoni andivapwashalela paing'ande pake. Vovo vo vyavatangola uti vakutimbanga malamulo ake Shashali vatangola doni, apali umu junji wavanshema Yesu.”

⁸Bai imbumba yavanu pamo na vananangalaledi vapalikaja pavaigwite malove alo, vindívanyanyamuka mitima.

⁹Kanji Yashoni akavalipe njuluku washamana vanínneka auke pamo na vavagwe.

¹⁰Palidimbile liduva vanung'unumunu vaníntwalinneu Paulu namu Shilashi kuvaukanavo ku Beleya. Pavawikile ako vandyúka kushitala shakulipudidya shavayuda.

¹¹Kanji vayuda vankaja amo vavele vakuligwa kuvapunda va ku Teshalonika; vanavo vandípwashalela ntenga na ntima wave uti na kula liduva vashindalalyanga Maandiko pakulota vamanye kenga munkulinganana na amulá mwatangalela Paulu.

¹²Nadoni voe pakati pave vandíkulupila namomo pakati pavagalegu vakongwe vakwishimika na valume voe.

¹³Kanji vayuda va ku Teshalonika vakamanye kenga Paulu ankuvalanganga lilove lya Nnungu pa Beleya momo, vandyúka koko ndavakang'ela venentete na kutaa upuju.

¹⁴Muwakati wowo vanung'unumunnu vandímwaulila na vanímpanganiangidyanneu Paulu auke nanyenje imanga kanji Shilashi namu Timoti vandíikala mo nkaja mu Baleya.

¹⁵Bai vanung'unumunu váshimpalakela Paulu vandímuukanavo mpaka pa Atena na ling'oto lyakupata lilamulo lyakukinneu ikaululika Shilashi namu Timoti kwanavo, vanavo vandyúma.

¹⁶Paulu pashivalindila vanavo ku Atena, ntima wake ushinanshanona mwaa wakwona likaja lya Atena kuumbalanga mashinamu avannungu.

¹⁷Napavedoni nae ashindataukananganavo vayuda na vanu vanji vakunjopa Nnungu mushitala shave shakulipudidya na kutaukananga na vanu vanji váshipita pashiwanja shamikodyanio.

¹⁸Napanelo vakumanya vanji vaepikuli na vaestoiku[35] vashindomba mwaa namu Paulu kutwala vanji kushidoni, “Munu álambukanga mwanambwe aju aamba nyamani?” Kutwala vanji kavili kushidoni, “Aju twona kenga avavalanganga vannungu vavilambo vinji.” Vandítangola davo mwaa Paulu ashimmalanganga Yesu na kuvalanganga kudyuka kwavakupela.

¹⁹Nadoni vanavo vaníntwala kumpalakela kunguguvale ukumene pa Aliyopagu ndamuudyangidya doni, “Unkuulula kutwaulila mana amapundisho aambi autupa ala?

²⁰Mwaa wako unkutupa mapundisho akukamadyanga namene. Napanelo tulota tumanye mana ake.”

²¹Napane vaatena uti na vanu vanji vakwaloka váshipagwa nkaja amo, hashipali shinji shavashitenda ila kuvalanganila na kwigwa vyaambi.

²²Napanelo Paulu andíimila pa Aliyopagu kutwala kushidoni, “Mmaatena! Nangu ninkumwona mwenu nkati mushinamidi shenu uti kuva mmanadini namene

²³mwaa pangupitile ngudingukanga nkaja amu ngulalyanga vyakulipudidya vyenu ndikodya namomo alutali yavaandike doni, ‘Kwannungu Ákamanyika.’ Napane aijá wamulipudya kwabila kummanya ni jojo wanimmalanganga.

²⁴Aju ni Nnungu ákandyenge shilambo na uti vipagwíte amo; jojo ávele UMU wakuwa na pai hananama muding'ande dyakushwalidya dyavadangile vanu

²⁵na ata hanatumikiligwa kwamakono ashimunu kenga shipali shimwóva mwaa nae ni ávapa vanu uti shingumi, imumu na uti vinu.

²⁶Kutunduvangila kumunu jumo andivakandyanga venentete uti pakulota vaname mushilambo uti; ni jojo ávapangidile kaladavo wakati wakunama na ávavikidile kaladavo mautu wakunama kula venentete

²⁷kwambangidya vannambele Nnungu; nakapanji vanampamangapamanga na kumwona ata ikava kenga nae havele kushu na kula munu pakati petu.

²⁸Ivelé kenga mwavatangaladile doni, “ ‘Nkati mwake tunkunama, tunkuwena na tunkuvanavo umunu wetu,’[36] kenga mwavatangaladile vanu venu vashilanga doni, “ ‘Nawetu momo ni udukulu wake nae.’

²⁹“Napanelo ikava kenga wetu ni udukulu wake Nnungu, haivaikidile tukumbukile kenga unnungu unkulinganana na lishinamu lyashaabu, lyashitali shavanakandyanga dyela kwali lyalijanga lyavadile munu kwamakumbukililo na ulanda wake mwene.

³⁰Kanji Nnungu pakavalangila wakati aulá waungamanya, ambi apa ankuvavalangangila vanu uti mumautu avanama valijugulange madambi ave

³¹mwaa Nnungu andipanga liduva lyakuukumu shilambo kwaishaliya kwaindila yamunu jumo wantandwele mwene. Ing'ano ai andilodya umwiu kwauti pakundyuwa munu ajo pakati pavakupela.”

³²Napanelo vanavo pavamwigwite Paulu atangola ing'ano yakudyuka kwavakupela, vanji vandímwiludyanga kutwala vanji kushidoni, “Ing'ano ai tundakwigwilila kavili muwakati unji.”

³³Napavedoni Paulu andílyumadyanga pakati pave.

³⁴Kanji vanji vakalyunganiange namu nae, vandíkulupila: pakati pave, Dionishiu washipinga shavaliyopagu, nkongwe jumo walina Damalishi na vanu vanji.