Read Ibibiliya mu Shimakonde Imbodi Yaambi na dimbande dya Imbodi Yakala Vitendo 19 Bible Online

Vitendo 19 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 19

¹Napanelo Apolu àvele pa Kolintu, Paulu andyámbwakanga mashinga kutwala kwalalela pa Epeshu. Popo po andívakodya vakwoda,

²nae kutwala kuvaudya, “Mwenu pamukulupidile po, munimpata Imumu Wanashwe?” Vanavo do, “Wetu ing'ano yene ya Imumu Wanashwe tukwigwa gwegwe.”

³Nae kuvaudya kavili, “Kanji napane mupatilé ubatisho shani?” Vanavo, “Tupatilé ubatisho umwe Nshuwau.”

⁴Paulu kutwala kushidoni, “Nshuwau andívapa vanu ubatisho wakulijugulanga madambi avaulila vankulupile aijá áshaaloka panyuma pake, yani Yesu.”

⁵Bai vanu ve vaigwíte malove alo, vandípata ubatisho palina limwe UMU Yesu.

⁶Paulu akavavikile makono, andívashulukila Imumu Wanashwe na muwakati wowo vandítunduvanga kutangola dinangodi dyakutikinikanga na kulava.

⁷Vanu avo uti vavele valume kenga kumi na mbili doni.

⁸Paulu muwakati wamyedi mitatu, ashindauka kushitala shakulipudidya aombanga myaa na avashomba pakajugulanga shinu kwamwaa wautawala wa Nnungu.

⁹Kanji vanu vanji vashindalitaukanga, havashilota kukulupila na vashindatangola kunyata Indila paumbala wavanu. Napavedoni Paulu andyúma pakati pave pamo na vakwoda kuka ndavapundisha kula liduva pashitala shimwe Tilanu.

¹⁰Bai shimadengo asho Paulu andítenda muvyaka vivili mpaka vanu uti valijimbo lya Ashiya, vayuda namu vamidi kwigwa lilove lyake UMU.

¹¹Nadoni Nnungu ashindatandedya vyamakango vyakutikinikanga kwaindila imwe Paulu

¹²mpaka vanu kutwala malesho pamo na dinguvo dye dikumbíle likalogwe limwe Paulu kuka ndavakwaa valwele kutwala vanavo vilwele vyo kupona na majini aukalau momo kuumananga mumili.

¹³Napanelo vayuda vanji váshipita valaula majini aukalau, muliduva limo vandílingangila kukumulanga majini mumili vyavanu vatambulanga lina limwe UMU Yesu vaashidoni, “Palina limwe Yesu wanammalanganga Paulu, nangu ninkunnamulila, uumananga!”

¹⁴Pakati pavanu vene váshitenda vinu avyo vandípagwa vana saba vamwe muyuda jumo walina Shikeva nkúlangalalela-shadaka nkumene.

¹⁵Kanji lijini lyaukalau andívajang'ula doni, “Yesu nangu nimmanya na Paulu ninkumwigwanga; napane kushi mwenu po, mmakwashi?”

¹⁶Bai munu walijini lyaukalau apalá leka avaulukile! Ni kutwala kuvatimba namene mpaka vanavo uti do, pwii, matakudavo na makana avo mumili.

¹⁷Napanelo vanu uti váshinama pa Epeshu yani vayuda pamo na vamidi pavaigwite shitendo asho vandíjopa namene na vandímamodya kutumbyanga lina limwe UMU Yesu.

¹⁸Vanu voe ve vankulupidíle UMU vashindalilodya paumbala valivalanganga ngala vitendo vyave vyakunyata.

¹⁹Namomo vanu vanji váshitumila vitendo vyashaviavi, vandíkushania mabuku ave ashaviavi kutwala kushashola moto paumbala wavanu. Mabuku alo vakalalyange njuluku wake, undítimila shikonda shadimiliyoni dyoe namene.

²⁰Bai kwamwaa wavitendo avi, lilove limwe UMU lishindauka mushu lyandavala na lishindaavanavo dimongo.

²¹Ling'oto lyavinu avyo, Paulu alangalalegwa na Imumu Wanashwe andyámuwa kuka ku Yelusalemu apitila ku Makedoniya na ku Akaya aashidoni, “Panguwika ku Yelusalemu nikaikalanga, ininguvaikila momo nguke ndikawike ku Loma.”

²²Napavedoni andívatuma vatumikamwagwe yani Timoti namu Elashitu vauke ku Makedoniya kutwala nae kwikala padyoko ku Ashiya.

²³Mumaduva lolo, pa Epeshu shindíbuka shititimbu shakudimba kumevo kwamwaa wa Indila.

²⁴Mwaa munu jumo nkwána walyava walina Demetiliu áshikandyanga mashinamu alinganianga ing'ande ya nnungu nkongwe walina Alitimishi[37] na áshivapatiya vamadengo vake malupulupu oe,

²⁵andívashema vamadengo vake pamo na vanji vashimadengo shosho kuvaulila doni, “Mmavangu, mwenu munkumanya kenga mali etu ankwalakela mushimadengo ashi.

²⁶Mwenu munkwona na munkwigwa shana vinu vyapita atenda munu wavanshema Paulu akuno ku Epeshu na mpaka Ashiya yene ai uti. Nae andívashomba na andivashinjiulanga vanu atangola doni, ‘Vannungu vakuvakandyanga vanu vene havanava shinu vannungu vaiu.’

²⁷Napavedoni shipali shijoidyo i gweka yakuliuligwa nshulushu wetu kanji namomo ata yo ing'ande imwe nangangonda nnungu Alitimishi, vanu vandailudyanga na shimbili uti shannungu wene wavalipudya vanu uti ku Ashiya akuno na muvilambo vinji, shindamalilika.”

²⁸Bai vanu avo vakaigwe malove alo, shindívatindimbukanga shitundi kutwala kutunduvanga kujunga kwakudivana kumatu vaashidoni, “Nangangonda wa ku Epeshu ni Alitimishi bai.”

²⁹Muwakati ungwipi likaja uti lindíinjila mpulugu; venentete vanínkamula Gayu namu Alishitaliku vanu va ku Makedoniya váshipita vawena shalumo namu Paulu kupita vavautanga vavaukanavo kushiwanja shamishesho.

³⁰Napanelo Paulu andílota auke akalilodye kuumbala kanji vakwoda vanínneya.

³¹Namomo vananangaleledi vanji vashilikali valijimbo lya Ashiya vavagwe Paulu navanavo vandítumidya ntenga vanjugwangila hanalyalaveke kuka kushiwanja shamishesho.

³²Bai panguguvale awo upagwite upuju gweka; vanji váshijunga vatangola ashi, vanji vatangola shinji na voe havamanyíte shavaukidile mulyutu alyo.

³³Vanji pavashivona vayuda vangang'alangila mushu Alishandele, vashikumbukila kenga ing'ano ayo yàke nae. Napanelo Alishandele andíng'aniang'anianga makono ajugwa vamalale pakulota alishililidye pamevo pave.

³⁴Kanji vakamwanalele kenga avele muyuda, iminga uti indíjunga kwaunapamo muwakati kenga wadisaa mbili iishidoni, “Nangangonda wa ku Epeshu ni Alitimishi bai!”

³⁵Napanelo nshadolo wapalikaja andívamaladya vakupujungula vo kutwala kushidoni, “Mmaepeshu, wakwashi apa átikinenge kenga likaja ali ni lishúnga ing'ande yannungu nangangonda Alitimishi na waing'ope yake igwíle kuwa?

³⁶Pakuva mundimanya kenga vinu avi hapali wakutauka, bai malalanga! Hamunatende vinu bila kukumbukila!

³⁷Vanu vamuviidinavo ava havaivite vyombo vyamwing'ande yannungu wetu na ata havanankupulu shinu nnungu ajo.

³⁸Ikava kenga Demetiliu pamo na vavagwe vankuvanavo mwaa na munu woewoe, mabengi avelé mwandwa na vagavana vakwangangola vapali; nadoni vanavo vauke vakakashali kwanavo.

³⁹Kanji mwenu apa shikapagwa shinji shamulota vaangangole, shindivaikila shangangaleke kunguguvale wenewene.

⁴⁰Ing'ano ai mwaivalalele nelo inkuululika tuvanu kushitakigwa vatutambudyanga kutaa upuju nkaja amu patukaulula kujang'ulanga mwaa haipali shaliya.”

⁴¹Ling'oto lyakutangola davo, andílamulila nguguvale wapukanange.