Read Ibibiliya mu Shimakonde Imbodi Yaambi na dimbande dya Imbodi Yakala Vitendo 20 Bible Online

Vitendo 20 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 20

¹Napanelo shititimbu ashilá shìmalilikenge, Paulu andívashema vakwoda kuvanonowanga kutwala kulilaila kuka ku Makedoniya.

²Shilambo asho nae andípita awanawananga avananonowanga vakwoda kutwala kuwika ku Galashiya.

³Ako nae andíikala myedi mitatu. Pashipanganikanga pakulota ainjile mwingalava auke ku Shiliya, andyánalela kenga vayuda vankupanga milugu vyakuntenda ing'ondo. Nadoni nae andyámuwa kuja apitila ku Makedoniya.

⁴Mushimwanda asho andyódana namu Shopatulu wa ku Beleya mwanagwe Pilu, Alishitaliku namu Segundu vanu va ku Teshalonika, Gayu wa ku Delebe, Tikiku namu Tolopimo vanu va ku Ashiya namu Timoti.

⁵Vanavo vandílangalela kuka ndatulinda pa Tolowashi.

⁶Napanelo shikukulu shamagung'u ákave nkukumuku shikapite, wetu tundyúma pa Pilipo kukwela mwingalava kutwala mwanda wamaduva mwanu kuka ndakadyania na vavetu pa Tolowashi. Palikaja ali tundíikala maduva saba.

⁷Muliduva litandi lyaishumana lyulo tuvakwoda tundíkadyania pakulota tulye pamo. Napanelo kwodamwaa Paulu ashindalota aume palyamba lyake, andyúka mushu atangola na vakwoda mpaka shilo shing'ati.

⁸Mushumba shaigalopa shatuvéle dindípagwa dikalaboi dyoe dishikalela.

⁹Napanelo nnemba jumo walina Eutiku andíikala palidilisha kutwala kwindila lwono akuno Paulu alapayanga kutangola. Bai andílala lwono lwakulikandangila na andígwa mwigalopa yantatu mo kugwilila pai; vaukilé nannakota wiu wakudidima.

¹⁰Kutwala nanae Paulu kushuluka mpaka apalá pavéle nnemba, kutepa kunkumbatila kutwala kushidoni, “Hamunaushaushange mitima, aju apa mumi.”

¹¹Bai Paulu andíkwela kavili mwigalopa kutwala kumajanianga shakulya kutwala vanavo uti kulya. Kutwala apo, andítangola vila mpaka linyeiku kutwala kuma kuka.

¹²Vakwoda avalá vaníntwala nnemba aijá àvele mumi. Shitendo ashi shindívapa ntima shii namene.

¹³Napanelo wetu tundíinjila mwingalava kuka tulangalela mpaka pa Asho nannindila Paulu tuwenenavo shalumo mwingalava mwaa nae andípangila na andípakanila namu wetu auke mwanda wamadodo.

¹⁴Patukadidye nae pa Asho, tunímpwashalela mwingalava kutwala tuvanu kumalidya mwanda kuka ku Mitileni.

¹⁵Palyamba lyake tukaume pa Mitileni tundyúka vila mpaka pepi na pashitingi sha Kiu. Muliduva lyambili lyake tuvanu kuka mpaka pa Shamoshi kutwala ling'oto lyaliduva limo kuwika pa Miletu.

¹⁶Paulu andyámuwa kupita umungu pa Epeshu kwambangidya mulijimbo alyo lya Ashiya hanatimatimange mwaa avele na ntima wakuwika shipajelo ku Yelusalemu na ata leka yùlulike awike liduva lya Pentekoste likanava kuwika.

¹⁷Napanelo po pa Miletu, Paulu andívashema vanang'olo valiganisha va ku Epeshu.

¹⁸Pavawikile nae andívaulila doni, “Mwenu mundimanya mwangunamidile nangu panguvéle namu mwenu kutunduvangila muliduva lyangu litandi lyanguluvete akuno ku Ashiya.

¹⁹Mwenu mundimanya shana mwanintumikidile UMU na kulishapeya na shipalodi pamo na mauvilo oe angupatile kwamwaa wamilugu vyakunyata vyavayuda.

²⁰Mundimanya kenga hashipali shoeshoe shapaida shangupiyapiyenge; nimpundisha muumbala na muding'ande dyenu

²¹ngumya ushuda kwavayuda na kwavamidi wakulijugulanga madambi kwa Nnungu na walikulupililo nkati mumwe UMU wetu Yesu.[38]

²²Napanelo lola, ninkuka ku Yelusalemu nguungigwa na Imumu Wanashwe panikamanya shilóta kungutandeka kwanavo.

²³Shangumanyite apa nidoni, Imumu Wanashwe ankumya ushuda mumakaja uti mwangupita kenga kungwa na kuvauvanga kunkungulindila.

²⁴Kanji navalangilila shinu shingumi shangu kuva shinu shamana kwangu nene nimwene pakulota ngudududile shitamba shangu na utumika wangukamudidye UMU Yesu yakutaa ushuda ntenga wambone waumonyo wake Nnungu.

²⁵“Napanelo lola, nangu apa ndimanya doni pakati penu mwenu wanimmalangangidile utawala, hapali ata jumo álota kwona kavili ing'ope yangu.

²⁶Napavedoni nelo apa ninkulyakikisha ngala kenga hanguve likosha kwamyadi vyenu

²⁷mwaa ndivalanganga panikapiyapiyanga malotelo uti a Nnungu.

²⁸Nadoni lishunge mwemwe mmene na shunga shipinga shavangandolo uti shankamudidye Imumu Wanashwe muve mmakulaledya vake kwambangidya mushunge liganisha lya Nnungu lyapatile kwaindila yamyadi vyake jo mwene.

²⁹Nangu ndimanya shana doni, ling'oto lyakuma nangu andaumilila mavinji akujowa pakati penu pavakapambedya likundi lyavangandolo.

³⁰Namomo pakati penu vandabuka vanu vatangola vinu vyakudinguwanga pakulota vavaute vakwoda vavode vanavo.

³¹Napavedoni lilaledye mukumbukila doni, nangu muvyaka vitatu shilo na mui hangulakadile kunyuma kunnangalalela kula munu pakati penu ngulilidyanga.

³²“Napanelo nangu ninkunkamudya kwa Nnungu na kwalilove lyaumonyo wake lyulúla kunkulumuwa na kumupa maleko pakati pa avalá vailimyangígwa.

³³Hangung'unwike njuluku, shaabu kwali inguvo kwamunu woewoe.

³⁴Shasho! Mundimanya mwe, kenga makono lolo ala andikola madengo pakulota ngulyangangole nimwene na nivaangangole vavangu momo.

³⁵Kula shinu shangutandile, ninnodya mwenu kenga kwaindila yashimadengo shikumene shatutenda indituvaikila tuvapwashele vákalyulula tukumbukila malove atangwele jo mwene UMU Yesu aashidoni, ‘Wakwalaligwa ni aijá áing'a kuliko ápwashalela.’ ”

³⁶Pamalidile kutangola malove alo nae andíguguvala pamo na vakwoda vanji kutwala kushwali.

³⁷Bai vanavo vandílilanga namene na vandílailananganavo vatuwanidyanavo makono na vankumbatila.

³⁸Shinu shivatadídye vanavo vamamodye kuvanavo shipalodi shoe ni mwaa washitangodi shavatangaladile aashidoni, “Hamwona kavili ing'ope yangu.” Bai vanavo vanímpalakela mpaka kwingalava.