Read Ibibiliya mu Shimakonde Imbodi Yaambi na dimbande dya Imbodi Yakala Vitendo 21 Bible Online

Vitendo 21 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 21

¹Ling'oto lyakulailananga namu vanavo, wetu tundíinjila mwingalava kuka shalowa mpaka pashitingi sha Koshi. Kutwala palyamba lyake tuvanu kuka mpaka pa Lodeshi, tukapite apo tundyúka mpaka pa Patala.

²Pa Patala wetu kukodya ingalava yamboka yuka ku Poiniki, wetu kukwela kuka.

³Patuwikile isemu íshaaneka Kupulu, wetu tundítukulidya kunshanda kutwala kulodya ku Shiliya kuka ndaimila panshiko wa pa Tilu palyutu líshiloteka vipakuligwe vinu mwingalava.

⁴Napanelo popo po, tundívalambela vakwoda mpaka kuvakodya kutwala wetu kwikalanavo maduva etu saba. Vakwoda vovo vo, valangalalegwa na Imumu Wanashwe vandímwaulila Paulu hanaamboke kuka ku Yelusalemu.

⁵Nkaja amo tukaikalange maduva etu alo, wetu tundyúma kulodya kwatushuka. Kutwala vakwoda na vadyavavo pamo na vanavavo kutupalakela kumalila likaja mpaka ndawika nanyenje imanga; koko ko, tundíguguvalanga kutwala kushwali.

⁶Tukalailanange namu vanavo, wetu tundíinjila mwingalava yetu, vanavo kuujila kuding'ande dyave.

⁷Patumalidile shimwanda shetu tuma pa Tilu, tundíwika pa Patolamaida. Apo, wetu tundívaudyanga vanung'unumunu na tundíikalanavo liduva limo twambanganavo myaa.

⁸Palyamba lyake, tundyúma mpaka pa Shashaleya. Pakaja apo, wetu tundyúka ndawikila paing'ande yake nkúvalanganga-ntenga walina Pilipo munu wamushipinga shavanu saba.[39]

⁹Jo Pilipo aju andívanavo vanavake vakanava kulombwa nsheshe váshilava.

¹⁰Napanelo mulyutu alyo tukaikalange maduva akudyanga, nkúlava Agabu kwaloka ku Yudeya.

¹¹Nae paidile ndakadyania namu wetu, andítwala nkanda wainguvo umwe Paulu kulyunga mmadodo na mmakono kutwala kushidoni, “Imumu Wanashwe atédoni, ‘Mwene nkanda au vayuda vandamunga ku Yelusalemu kutwala kunkamudya kwavamidi.’ ”

¹²Bai wetu pamo na vanung'unumunu vene kaja ayo, patwigwite malove ala tushinannaililila Paulu hanaukenavo mushu shimwanda shakuka ku Yelusalemu.

¹³Kanji Paulu kutwala kushidoni, “Mwaa shani mwenu munkulila na munkungutaa shipalodi shoe muntima mwangu? Mwaa nangu apa i ngukubalidyé gweka kungwa kanji ata yakupela kwamwaa walina limwe UMU Yesu, ndikubali momo.”

¹⁴Napane pakuva haululíke kushambegwa, tundíshukulu tuushidoni, “Bai vitandeke kenga mo mwalatela UMU.”

¹⁵Napanelo tukaikalange maduva etu atwikalenge, wetu tundílipanganiyanga kutwala kwamboka kuka ku Yelusalemu.

¹⁶Mushimwanda shetu vakwoda vanji va pa Shashaleya vandítupalakela mpaka paing'ande pake Manashoni, palyutu lye livaikidíle tuwikile. Munu aju avele wa ku Kupulu na avele nkwóda wamushipinga shavakwoda vatandi.

¹⁷Bai patuwikile pa Yelusalemu, vanung'unumunu vandítupwashalela na lipuwilo lyoe.

¹⁸Palyamba lyake Paulu andyúka namu wetu nannola Tiyagu kutwala vanang'olo uti kwidananga.

¹⁹Paulu akavaudyange, andívavalangangila kula shinu shantandalele Nnungu kwaindila yautumika wake pakati pavamidi.

²⁰Vanavo vakaigwe vyavavalangangidile, vandímupa lishangelo Nnungu na vandímwaulila Paulu kushidoni, “Nung'unumunu, unkwona makumi manga avayuda vakulupidíle. Vanavo vankuvanavo dukuduku kwa Lilamulo,

²¹napane vandigwa kenga wako unkuvapundisha vayuda uti vanáma muvilambo vyavamidi vaambukange lilamulo lyake Musha uvapundisha havanavakumule likumbi vanavavo na unkuvaleya kwodedya yadi yave yashiyuda.

²²Napanelo tutandelé mwashi? Kwamwiu vanavo vandaigwa kenga wako undiwika nkaja amu.

²³Wako tenda vyatulota kukwaulila avi: apa vapali vanu nsheshe pakati petu valóta vantandele Nnungu vyavalivikile.

²⁴Napavedoni wako lyunganiange na vanavo utende pamo shimadengo shakulyushanianga ushapu na gwegwe ulipile njuluku shimadengo asho na ling'oto vanavo vandabubuligwa ugwimbo wave; nadoni, vanu uti vandamanya kenga uti vyavashiigwanga vakwamba wako ni vyaushwang'a mwaa valota kwona kenga nawako momo mpaka ambi unkwodedya Lilamulo lyake Musha.

²⁵Kanji kwaupande wavakukulupila vaumíle pakati pavamidi, wetu tundivaandikila ibalugwa yakuvamanyiya mwatwamulidile wetu tuushidoni, ‘Havanamamene inyama yavashindile vavaumidya shadaka vannungu vakushang'apa, havanalye myadi, havanamamene inyama yannyama wakumpambilila na ata havanalavalave.’ ”

²⁶Bai mwiu Paulu palyamba lyake andívatwala vanu avalá kuka ndalyushanianganavo ushapu; ling'oto andyúka ndainjila mwing'ande ya Nnungu ndavalanganga liduva lyakumalila vanu avo kulyushanianga ushapu na kuvalanganga shadaka shíshiloteka vantandele kula munu pakati pave.

²⁷Napanelo maduva saba akulyalaliya alota kumalilika, vayuda va ku Ashiya vakamwone Paulu mwing'ande ya Nnungu vanavo vandívakang'ela venentete na vanímwinjilinneu

²⁸vajunga vaashidoni, “Mmanaishilaeli, tupwashela! Munu aju ni jojo ápita avapundisha vanu uti kula kushinu vavavangedye vanaishilaeli; ankupundisha vapinge Lilamulo na vailudyange lyutu ali. Na hainatoshe avatwete vamidi kuvainjidya mwing'ande ya Nnungu nadoni anditaa ushapu lyutu ali lyakwilimyanga.”

²⁹She shivatadídye vatangole davo ivele mwaa vandímwona palikaja po àvele namu Tolopimu munu wa ku Epeshu nadoni vanavo vashona kenga Paulu munu ajo andiinjinavo mwing'ande ya Nnungu.

³⁰Napanelo nkaja mo shindíinjila shititimbu shakujowa namene. Dimbumba dyavanu dindyúka ditukuta vakankamule Paulu. Vakankamule vandípita vamuutanga kumumya mwing'ande ya Nnungu amulá na milango vandíshimanginneu.

³¹Valingangila kummyaa, kuwika dyabali dishivalanganga kuumilila kwashititimbu pa Yelusalemu kwanang'olo nkumene wavaing'ondo wavaloma.

³²Nae apalá kuvatwalinneu vanang'olo vavaing'ondo vamwina mwake pamo na vaing'ondo kuka koko. Venentete pavangwene nang'olo nkumene wavaing'ondo aijá pamo na vaing'ondo vake, vandíleka yakunkoma Paulu.

³³Bai nang'olo nkumene wavaing'ondo aijá anímmandika Paulu kutwala kumwaulila kenga avele mmakono mwashilikali na andílamulila vamunge mang'unyang'unya mavili kutwala kudya, “Da munu aju nyani na atandilé nyamani?”

³⁴Kwamwaa washititimbu shuumilidíle pakati paimbumba vanji vajunganila ashi vanji kujunganila shinji, nang'olo nkumene wavaing'ondo hashipali shawakika shashigwa nadoni nae andílamulila vamuukenavo Paulu kulingongo lyavaing'ondo.

³⁵Pavawikile pavikada vyalingongo, vaing'ondo vanínnyanyulidya Paulu kushanya kwamwaa washitundi shavashimmikila venentete

³⁶váshipita vamwoda pepi-pepi vajunga vaashidoni, “Mmalidye!”

³⁷Napanelo Paulu valota vanjele mulingongo andímudya nang'olo nkumene wavaing'ondo kushidoni, “Inkuululika nangu kukumanyiya shinu shimo?” Nang'olo nkumene wavaing'ondo kushidoni, “Wako unátangola shigalegu?

³⁸Da wako hauvele mmishili aijá átandile mandamano akupinga shilikali mumaduva apitíle kutwala kuvatwala vakupinga-shilikali dyalupu nsheshe kuvaukanavo kushimbweshe?”

³⁹Paulu kutwala kushidoni, “Nangu nimuyuda nguvalakwidyé pa Talashishi likaja lyakwigwinika lya ku Kilikiya. Kanji napane ninkukujugwa ungupe litala lyakutangola na venentete.”

⁴⁰Nang'olo nkumene wavaing'ondo aijá kumupa litala kutwala Paulu kwimila pavikada apalá kunyanyula makono avamaladyanga venentete. Pavamalalenge do vii, nae andítunduvanga kutangola na vanavo mwinangodi yashibalaniya aashidoni,