Read Ibibiliya mu Shimakonde Imbodi Yaambi na dimbande dya Imbodi Yakala Vitendo 22 Bible Online

Vitendo 22 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 22

¹“Mmanung'unumunu pamo na mmatatamunu, ngwigwa kulishililidya kwangu kwenu mwenu.”

²Napanelo pavamwigwite atangola mushibalaniya, vandímamodya kulimaladya kutwala nae kushidoni,

³“Nangu ni muyuda nguvalakwadidye nkaja mu Talashishi ya ku Kilikiya ngukulumukidile nkaja mo mu Yelusalemu amu ngushungigwe mmadodo mwake Gamaliyele ngupundishigwe kwodananavo kushinyigwa kwa Lilamulo lyavanyakala vetu na nguvanavo dukuduku kwa Nnungu kulingana kenga mo mwampagwidya mwenu nelo amu.

⁴Nangu ndivapapata vanu váshoda Indila ai ata mpaka kuvabyaa nguvaunganga na nguvajela mudikalaboshi i gweka valume kanji namomo vakongwe.

⁵Ata jo nkúlangalalela-shadaka nkumene ing'ano ai ankuulula kutaa ushuda pamo na nkodyanio wavanang'olo uti. Vovo ava vaningupa shitambulisho shakuka ndalodya kwavanung'unumunu va ku Damashiko pakulota ndivatwale vavé kwanavo ndivaidenavo na mang'unyang'unya pa Yelusalemu apa vavape shaushanga.

⁶“Napanelo nguka kwanavo, panguwikile pepi na pa Damashiko, muwakati kenga waliduva pamuti doni, kwashingangala kungutang'anedya lilangadyo lyakushenga namene lyakwalakela kuwa

⁷kutwala nangu kugwa kugwilila pai na kwigwa lidi liishidoni, ‘Saulu, wako Saulu! Mwaa shani unkungupapata?’

⁸Nangu kudya, ‘Da wako nang'olo unyani?’ Nae kushidoni, ‘Nangu Yesu munashaleti, jo waumpapata wako jo.’

⁹Napanelo avalá vanu vángwadanengenavo mushimwanda, lilangadyo lyo vandyóna kanji lidi lyamunu áshitangola namu nangu vanavo havaigwíte.

¹⁰Nadoni nangu ndímudya, ‘UMU, napanelo ngutende nyamani?’ UMU kushidoni, ‘Takatuka winjile nkaja mu Damashiko mo! Mo nkaja mo vandakumanyiya uti vikuvaikidíle utende.’

¹¹Napanelo kwodamwaa mevo angu andíbidikanga mwaa wakushenga kwalilangadyo, avalá vanguvénavo vaníngukamula nkono kuka nanguwisha nkaja mu Damashiko.

¹²“Napanelo mo nkaja mo andípagwa munu jumo walina Ananiya, munu wakunjopa Nnungu na wakwigwilila lilamulo lyetu, wavashimuumidya ushuda wambone vayuda uti váshinanama nkaja mu Damashiko,

¹³nae andída nangulola kutwala kungwimila pepi aashidoni, ‘Nung'unumunu Saulu, ujila kulola!’ Muwakati wowo nangu kulola na kumwanenneu.

¹⁴Nae kavili kushidoni, ‘Nnungu wavanakuluvetu andikutandola pakulota umanye malotelo ake, andikutadya umwone aijá Waishaliya na umwigwe atangola jo mwene.

¹⁵Nadoni wako undava unshuda wake pakulota uvavalangangile vanu uti vyaugwene na vyawigwite.

¹⁶Napanelo ulinda nyamani kavili? Takatuka upate ubatisho, madambi ako alivalivigwe utambulanga lina lyake.’

¹⁷“Napanelo nangu panguujidile ku Yelusalemu, nikauke kwing'ande ya Nnungu kukushwali, Nnungu aníngupa indoti.

¹⁸Mwindoti yoyo nangu kumwona UMU angwaulila doni, ‘Uma shipajelo pa Yelusalemu apa mwaa venentete ava ushuda waulota kumya wako unguvalanganga nangu, havaitikila.’

¹⁹Kanji nangu kushidoni, ‘UMU vanavo vandimanya shana kenga nangu nishindapita ngutanela vitala vyakulipudidya, nivaunganga na nivashapa viboko vanu váshikukulupila wako, nivaukanavo ndavajela mudikalaboshi.

²⁰Namomo pavashimuumadyanga myadi Shiteva nshuda wako wako, nangu ndípagwa popo na ndyúngila nkono shitendo asho na ata makoti avalyulénge vanu váshikukula apo vammyaa, ngukamulidile nangu nimwene.’

²¹Kanji UMU kushidoni, ‘Wako uma mwaa nangu ngulota kukutumidya kushu namene kwavamidi.’ ”

²²Mpaka apo vanu vashindamwigwilila, napane po patangwele lilove lyamwisho, vandíjunga vaashidoni, “Munu aju mwovye mushilambo amu! Haimmaikidile kunama.”

²³Vanavo vajunga na vashimwa vang'aniang'anianga makoti kushanya na vamwadilila dimbwe kushanya,

²⁴nang'olo nkumene wavaing'ondo andívalamulila vanu vake vanjele Paulu mulingongo lyavaing'ondo na vamuudyangidye kwaindila yakunshapa[40] pakulota avalangange shitadíye imbumba injungile.

²⁵Napanelo Paulu pavashimunga dimbuu dyamagwogwe, andímudya nang'olo wavaing'ondo miya apagwíte mulyutu alyo kushidoni, “Da mwenu munkuvanavo lusha lwakunshapa mwenentete muloma viboko vakanava kulalyanga shana mwaa wake?”

²⁶Nang'olo wavaing'ondo paigwite malove ala, andyúka ndamudya nang'olo wake kushidoni, “Nang'olo, ulota kutenda nyamani? Munu jojo aju ni mwenentete muloma.”

²⁷Kutwala nang'olo nkumene wavaing'ondo aijá kumuukila ndamudya, “Kushidashi, wako ni umwentete muloma?” Paulu doni, “Elo!”

²⁸Nang'olo nkumene wavaing'ondo kushidoni, “Nangu pakulota ngupate wenentete washiloma uningutumbuka njuluku woe namene.” Kanji Paulu anínjang'ula aashidoni, “Bai nangu apa ninkuvanavo wenentete awo kwashivalekwelo shangu.”

²⁹Bai muwakati wowo avalá váshilota kumuudyangidya vandínyamanga na ata nang'olo nkumene wavaing'ondo aijá andíjopa mwaa Paulu vanímunga kwalilamulo lyake nae.

³⁰Napanelo palyamba lyake, nang'olo nkumene wavaing'ondo aijá alota amanye uwakika waing'ano yavashintambulanga Paulu vayuda, andílamulila vamuungule Paulu na upagwe nguguvale wavanang'olo vavakulangalalela-shadaka pamo na vanang'olo vanguguvale uti kutwala nae kuntwala Paulu kumwimidya shing'ati nguguvale.