Read Ibibiliya mu Shimakonde Imbodi Yaambi na dimbande dya Imbodi Yakala Vitendo 23 Bible Online

Vitendo 23 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 23

¹Napanelo Paulu andívalola ndoo vanu uti vapagwíte panguguvale po kutwala kushidoni, “Mmanung'unumunu, mpaka nelo nangu ninkunama pamevo pake Nnungu mumakumbukililo ambone amuntima.”

²Kanji Ananiya nkúlangalalela-shadaka nkumene andívalamulila vanu ve vammandíke Paulu vambwabwade pakanywa.

³Paulu kutwala kumwaulila, “Bai nawako Nnungu andakubwabwada umunu wamalambi davo gwe! Wako apo wikelé pakulota unguukumu kwodana na mwalitangalela Lilamulo, napane mwaa shani unkupujungula Lilamulo ulamulila vangukome?”

⁴Vanu vammandíke Paulu kushidoni, “Wako ulyalaveka kuntukananga nkúlangalalela nkumene wake Nnungu?”

⁵Paulu doni, “Ji, mmanung'unumunu, hanishimanya kenga aju ni nkúlangalalela-shadaka nkumene! Na mwiu, lilove lya Nnungu litédoni, ‘Haunantukanange nkútawala wavenentete vako.’ ”

⁶Napanelo Paulu kwodamwaa andímanya kenga panguguvale awo vanji vavele mapalishayo, vanji kuva mashadukayo, andítangola pashanya po aashidoni, “Mmanung'unumunu, nangu ni mpalishayo mwana wamapalishayo. Apa ninkuukumigwa kwamwaa walilindilililo lyakudyuka kwavakupela.”[41]

⁷Patangwele davo, mapalishayo na mashadukayo kundíbuka kupwatana kwakudimba kumevo kutwala pashinu apo imbumba kujavanikana vipinga vivili

⁸mwaa mashadukayo kudyuka kwavakupela, kupagwa kwavanjelo vake Nnungu na kupagwa kwaimumu, havanakulupila shinu kanji mapalishayo uti avyo vankukulupila.

⁹Bai ing'ano ai indítadya vanavo kupwatana kumamodya. Napanelo vamwalimu vanji vadishaliya, vashipinga shamapalishayo vandítakatuka kutwala kutunduvanga kutaukanga vaashidoni, “Wetu munu aju hatunamwona likosha. Da inkuululika imumu kwali njelo kutangola namu nae?”

¹⁰Bai pashinu apo kupwatana kundyúka mushu kumamodya mpaka nang'olo nkumene wavaing'ondo kujopa mwaa wakwona kenga Paulu vananshapwalananga; nadoni andívalamulila vaing'ondo vake vavapoke Paulu vakanjele kavili mulingongo lyavaing'ondo.

¹¹Napanelo muliduva lyolyo shilo shake, UMU andímwimila Paulu pepi kutwala kumwaulila doni, “Lyunge ntima! Mwaa mo mwaumididye ushuda unguvalanganga nangu pa Yelusalemu apa, ku Loma undatandela momo.”

¹²Napanelo wiko paulangele, vayuda vanji vandíkadyanianga kulya shemba kutwala kulilapa vatangola kenga havalya na havakumbila shinu shoeshoe vakanava kummalidya Paulu.

¹³Vayuda valíle shemba asho vandíwikila shikonda shavanu vakupunda kenga alubaini doni.

¹⁴Bai vanavo vandívaukila vanang'olo vavakulangalalela-shadaka pamo na vanang'olo ndavaulila doni, “Wetu apa tundililapa tukanatandedya itukodye ilana tutangola kenga hatulya patukanava kummalidya Paulu.

¹⁵Nadoni mwenu apa kenga mmananangalaledi vanguguvale, tumidya ntenga kwanang'olo nkumene wavaing'ondo pakulota antumidye kwenu mulitenda kenga mulota kulalyanga shana myaa vyake. Wetu tuvelé tayali kummalidya ata akanava kuwika kwenu.”

¹⁶Kanji ndukulugwe Paulu mwana wannumbugwe akaigwe nnugu awo, andyúka kulingongo lyavaing'ondo nammalangangila njombawake vinu avyo uti.

¹⁷Paulu kutwala kunshema nang'olo jumo wavaing'ondo miya kumwaulila doni, “Ntwale nnemba aju umuukenavo kwanang'olo nkumene wavaing'ondo mwaa ankuvanavo ntenga wakummanyiya.”

¹⁸Nang'olo wavaing'ondo aijá kuntwala ndyoko jo kumuukanavo kwanang'olo wake ndamwaulila doni, “Paleshi Paulu aníngushema kutwala kungujugwa nimpalakedye ndyoko kwako wako mwaa ankuvanavo ntenga wakukumanyiya.”

¹⁹Nang'olo nkumene wavaing'ondo aijá anínkamula nkono ndyoko jo kutwala kumuukanavo kwagweka ndamuudyangidya, “Wako widilé na ntenga shani kwangu?”

²⁰Ndyoko kushidoni, “Vayuda vandilya shemba vakujugwe wako lunduno untwale Paulu umuukenavo kunguguvale valitenda kenga valota vaudyangidye shana myaa vyake.

²¹Kanji wako haunalote kushambegwa na vanavo mwaa vapali vanu vakupunda shikonda shavanu kenga alubaini doni, valóta kuvandama vannindile Paulu vammalidye. Vovo vo vandililapa mwiu mwiu kenga havalya na havakumbila shinu shoeshoe pavakanava kummalidya Paulu. Muwakati au vanavo vandilipanganianga uti valindila lilamulo lyako bai.”

²²Bai nang'olo nkumene wavaing'ondo aijá anínnaila ndyoko auke amwaulila doni, “Haunammalangangile munu junji kenga uninguvalangangila nangu ntenga kenga au.”

²³Napavedoni nang'olo nkumene wavaing'ondo aijá andívashema vadyoko vake vavili pakati pavadyoko vake kuvamanyiya doni, “Vapanganiange vaing'ondo dimiya mbili, vaing'ondo vavapunda sabini na vaing'ondo vanji dimiya mbili vamikushi vauke ku Shashaleya satatu yashilo.

²⁴Vapanganiange momo vapalashi vakumpakila Paulu vakamwishe shana kwananangalaledi wamajimbo Pilishi.”[42]

²⁵Nadoni nang'olo nkumene wavaing'ondo andyándika ibalugwa kenga mwaivalalele ai:

²⁶“Kalaudiu Lishiyashi kumwe wakwishimika nanangalaledi wamajimbo Pilishi, nandele.

²⁷Ninkukumanyiya doni, vayuda vanínkamula munu aju na vashilota kummyaa. Kanji nangu vakangumanyiye kenga munu jojo muloma, nindyúka koko na vaing'ondo vangu namposha.

²⁸Nikantwale kumuukanavo kulibengi lyavayuda ngulota ngwigwe myaa vyake vyavashintambulanga,

²⁹nindyona kenga vashintambulanga vinu vyodana na lilamulo lyave kanji hangugwene likosha lyakuntadya nae apele kwali aungwe.

³⁰Napanelo pavaukile nangumanyiya kenga vayuda vandipanga milugu vyakulota kummalidya, ndyamuwa kukupalakadyedya wako munu aju na avalá vavénavo mwaa namu nae ndivaulila vaide vaangangalange namu wako ako.”

³¹Napanelo vaing'ondo kwodana na lilamulo lyavapatile kwananangalaledi wave, vaníntwala Paulu shilo-shilo mpaka palikaja lya Antipatilishi.

³²Palyamba lyake vaing'ondo váshiwena na madodo vandyújila kulingongo lyave kutwala kuvaleka vaing'ondo vavapunda vamuukanavo Paulu kulikaja lya Shashaleya.

³³Pavawikile nkaja amo vandítwala ibalugwa ailá kumwing'a nanangalaledi wamajimbo na kuntwala Paulu kunkamudya.

³⁴Bai nanangalaledi wamajimbo akashomye ibalugwa ailá andímudya Paulu lijimbo lyavalakwadidye. Napanelo akamanye kenga Paulu avele wa ku Kilikiya,

³⁵andímwaulila kushidoni, “Myaa vyako ndaudyangidya pavalota kwida vanu vakukashalídye vo.” Bai nae andílamulila vantwale Paulu akapagwe mmakono mwaishilikali kwing'ande ye ivéle imwe Elode.