Read Ibibiliya mu Shimakonde Imbodi Yaambi na dimbande dya Imbodi Yakala Vitendo 27 Bible Online

Vitendo 27 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 27

¹Napanelo pavaukile ndaamuwa wetu twinjile mwingalava tuke ku Italiya, vanavo vaníntwala Paulu pamo na vakungwa vanji kunkamudya kumakono kwanang'olo wavaing'ondo miya walina Shulyu wamushipinga shavaitaliyani shimwe umu nang'olo.

²Bai wetu tundíkwela mwingalava ya pa Adalamitiu ivéle tayali yuke kuviko vya ku Ashiya. Mushimwanda shosho tundípagwanavo Alishitaliku munu wa ku Teshalonika ya ku Makedoniya.

³Palyamba lyake tuvanu kuwika panshiko wa ku Shidoni. Napanelo Shulyu pakuva ashinantanana Paulu, andímupa litala lyakuka ndavalola vabwadivake va pa Shidoni na vanshunge.

⁴Tukaume pa Shidoni, tundíkwela mwingalava tulodya pepi na pa Kupulu mwaa imepo ishaaloka mushu mwetu.

⁵Tundyúka mushu na shimwanda shetu tuwena mwimanga nkono wa ku Kilikiya na ku Pampiliya mpaka ndaimila panshiko wa Mila ya ku Likiya.

⁶Panshiko awo nang'olo wavaing'ondo miya watuvénavo aijá mushimwanda shetu, andíkodya ingalava ya pa Alishandaliya íshuka ku Italiya, nae wetu kutwinjidya momo.

⁷Shimwanda shetu shindíva shakukakavanga; nadoni tundítwala maduva oe tuvauvanga mpaka kuka ndawika pepi na pa Kinidu. Kanji kwodamwaa imepo haitulakile tuka shalowa, tundyúka nkono wakwina shitingi sha Kaleta tupita pepi na pa Shalamone.

⁸Tundyúka shinyenjenyenje kanji na mauvilo makumene mpaka ndawika mulyutu lyavashema Mishiko Vyambone livéle pepi na njini wa Lasheya.

⁹Napanelo ukatupitile wakati wetu na ata liduva lya Kulivalivigwa Madambi momo likapite,[45] shindípagwa shijoidyo shikumene kuwena mwingalava; nadoni Paulu andívaduma

¹⁰aashidoni, “Mmanang'olo, ninkwona kutunduvangila ambi apa shimwanda shetu shindava shashijoidyo na shaasala ing'umene namene nkati muvyombo vyatunyukete na ingalava. Hainatoshe ata wewe tuvene inkuululika kukatoka shingumi.”

¹¹Kanji nang'olo wavaing'ondo miya andíshambegwa na nkútukusha-ingalava pamo na mwene ingalava kuleka shatangwele Paulu.

¹²Kanji kwodamwaa nshiko awo hauvéle shana pakulota vanu vaikale muwakati wakudidima imepo, bai vanu voe vandyóna kudyanga vaume panshiko awo valingangile kuka ndawika panshiko wa Poiniki uvéle mo mushitingi sha Kaleta pakulota tupagwe mulyutu alyo muwakati uti waimepo. Likaja alyo liladilé mevo nkono wakwina shilambo na nkono wakwalyuka liduva.

¹³Bai indítunduvanga kupunga imepo íkavele yadimongo yakwalakela kwina shilambo kutwala vanavo kwona kenga mwavashikumbukilila vene amulá mundatandakela momo. Nadoni vanavo vandyúmya inanga mmedi mo kutwala kutunduvanga kutukusha ingalava nanyenje imanga ya ku Kaleta.

¹⁴Kanji muwakati padyoko pashitingi po shindíwika shimbunga shakwalakela kunshanda kwake nkono wakwalakela liduva

¹⁵kupita ikunga ingalava. Bai imepo indyútanga ingalava na haishululika kushinjiula; nadoni wetu tundítatakela na tundíleka ingalava yode yo imepo yo bai.

¹⁶Napanelo shitingi shimo shavashema Kauda shindítushililidya padyoko kwaing'ano yaimepo kutwala patupitile kwina kwake pamo na vyakunanopa vyoe tundyúlula kuposha ingalava idikidiki.

¹⁷Bai vakutukusha-ingalava vandípakila ingalava idikidiki yo na vandítava ingalava ing'umene na mididi vyakunanapedya. Napanelo kwodamwaa vashindajopa ingalava kuka ndambwatamila mudindunda dyadimbwe dyamwisemu yaimanga ya Shilite, vanavo vandíshuluwa ditanga kuleka ingalava yuka yene na imepo.

¹⁸Napanelo shimbunga shishindauka mushu na palyamba lyake vandyúmadyanga vyombo vyavapakidíle mwingalava kujalangila mmedi.

¹⁹Muliduva lyantatu vo vene vakutukusha-ingalava vandíjalangila mmedi vyombo vinji vyashimadengo vyamwingalava.

²⁰Maduva oe kupita patukona liduva na ata dinondo, imepo yadimongo yuka mushu ipunga namene mpaka lilindilililo uti lyakulota tuvanu kwambolegwa, kutujaika.

²¹Napanelo kwodamwaa vandíikalanga maduva oe pavakalya shinu, Paulu andítakatuka pakati pave kutwala kushidoni, “Mwenu! Leka mùngwigwilidile nangu paninnaidye kuma ku Kaleta akulá, mauvilo ala na asala ai uti hamunapate.

²²Kanji napanelo ninkumwaulila doni, lyunge mitima mwaa hapali ata munu jumo álota kupela pakati penu ila ingalava ni ilóta kwalibika

²³mwaa shilo sho shanelo ashi aninguumililila njelo wake Nnungu, Nnungu jojo ángutandile nguve wake na wangulipudya nangu kwake

²⁴kutwala kungwaulila doni, ‘Paulu, haunajope! Wako indikuvaikila uke ukawike kumwe Shashali na lola, Nnungu andikukamudya vanu uti vapagwíte namu wako mwingalava.’

²⁵Napavedoni mwenu lyunge ntima mwaa ninkukulupila kenga Nnungu andatandedya avilá vyangwaulidile.

²⁶Napane kwamwaa waimepo ingalava indauka ndambwatamila pashitingi.”

²⁷Napanelo shilo shing'ati shaliduva lyakumi na nsheshe mawimbi atugang'ola mu Imanga ya Meditelaniu, vakutusha-ingalava vandílyona kenga vankuvandikila kumwangu.

²⁸Nadoni vanavo vandíjela mmedi shipimo shandidi wavaungangidíle shinu shakwidopa kutwala kwona shitamba shamakono ishilini kwakukadaleka kwake. Vakauke mushu vandípima kavili kutwala kwona kuva shitamba shamakono kumi na tano kwakukadaleka kwake.

²⁹Napane vajopa ingalava kuka ndalitumbula mumajanga, vandíjalangila dinanga nsheshe mmedi kunyuma ingalava vashwali wiku ulangale ambi.

³⁰Bai vakutukusha-ingalava valambela mwakutipukila vandítwala ingalava idikidiki kushuluwidya mmedi valivika kenga valota kuka ndaungangilanga dinanga mushu ingalava

³¹kutwala Paulu kumwaulila nang'olo wavaing'ondo miya pamo na vaing'ondo vake kushidoni, “Vakutukusha-ingalava avalá vakaumananga mwingalava ing'umene amu, mwenu uti hapagwa wakushumba.”

³²Nadoni vaing'ondo vandílumulanga mididi víshilandendya ingalava idikidiki kutwala kuleka igwilila mmedi.

³³Kumatingatinga Paulu andívalaililila vanu uti valyange vyakulya atangola kushidoni, “Kwoda maduva kumi na nsheshe andipita mulijugulanga na pamukapamba yolo,

³⁴nangu ninkunjugwangila mulye shinu shoeshoe kwambangidya muve na dimongo mwaa apa hapali ata munu jumo álota kupata likwanda.”

³⁵Ling'oto lyakutangola malove ala, andítwala ligung'u kunnambwalela Nnungu kumeja kutwala kulya.

³⁶Bai vanavo uti vandílyunga mitima na vandítunduvanga kulyanga.

³⁷Mwingalava amo tundípagwa tuvanu dimiya mbili sabini na sita.

³⁸Ling'oto lyavanu uti kulyanga, vaníntwalanga ngano uti kunjalangila mmedi vapungula kwidopa kwaingalava.

³⁹Wiku ukashwe, vakutukusha-ingalava havamanyíte shilambo asho kanji vandyóna kushinu kushaaneka dimbwe nanyenje imanga kutwala vanavo mmitima vyave kulota ingalava yuke ikaimile popo ikava kenga ikandyululika.

⁴⁰Nadoni vandílumulanga mididi vyadinanga kuleka dinanga mmedi akuno vaungulanga ding'wau dyakunyuma dyakulangalalela ingalava pakulota dilangalalele ingalava. Nakavili vandíkwedya itanga idikidiki yakulilomo pakulota ingalava yuke ikashiye kunshanga.

⁴¹Kanji ingalava indímbwatamila mwindunda yadimbwe yamwimanga kuleka ìkele popo paikating'ina ata padyoko. Kulilomo kundíinjila mudimbwe kutwala kunyuma kwake kutunduvanga kutumbukanga mwaa wamawimbi áshilikoma na dimongo.

⁴²Napanelo vaing'ondo vandípakanila vavabyange mapaleshi uti mwaa wakujopadavo vandaagwalela kuka ndawika kumwangu kutwala kutipukanga.

⁴³Kanji nang'olo wavaing'ondo kwodamwaa ashilota amwambole Paulu mushijoidyo asho, andívaleya shitendo asho. Nadoni andívalamulila vanu váshimanya kwagwalela valishushe vainjile mmedi pakulota vaagwele vauke kumwangu

⁴⁴kutwala vanji kuvalamulila vatwale dimbau kwali vipande vyadimbau vyaingalava vivapwashele kwagwela. Nadoni tuvanu uti tundípukangila kumwangu.