Read Ibibiliya mu Shimakonde Imbodi Yaambi na dimbande dya Imbodi Yakala Vitendo 28 Bible Online

Vitendo 28 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 28

¹Napanelo tuvanu uti tukapukange mushijoidyo asho, patuwikile kumwangu tundímanya kenga shitingi asho vashishema Malita.

²Bai vene shitingi asho vandílodya litananilo lyakujowa kwetu wetu. Vakatupwashalela na vakatumbulididya moto mwaa wakutunduvanga kutonya medi na mwaa wakutudidima imepo.

³Napanelo Paulu andílakota itu yadinang'ene kutenda akang'ela moto kutwala mo muding'uni mo kuma nyoka walina jaa-ntela atukuta ntukuka kunnamatila Paulu mulyanda lyake.

⁴Napanelo vene ikaja ayo pavagwene inyoka ìnamatidile mulyanda lyake Paulu, vandyáulanila shivenevene vaashidoni, “Munu aju patukamwambambidya ni shimalivanu. Mwaa lola, ata ikava kenga andipuka mmedi kanji jo mwene Ishaliya hanneka anama.”

⁵Kanji Paulu anímpatulidya nyoka jo pamoto na hashipali shintandéke.

⁶Napanelo vanu vapashitingi asho vashikumbukila kenga Paulu unammimba nkono kwali kupela shingangala. Kanji vakaikale wakati woe valindila, pavagwene kenga hashipali shimmilinganianga, vanavo dindívaida ding'ano dinji kutwala kutangola kenga Paulu avele nnungu.

⁷Napanelo pepi na palyutu alyo, andípagwa mautu ake gavana washitingi asho walina Pubiliu. Nang'olo aju wetu andítushema na andítukalibisha paing'ande pake na tundíikanavo shana namene maduva matatu.

⁸Napanelo tatake Pubiliu unímpwateka mili na kudalola myadi. Paulu paukile nannola, ling'oto lyakushwali anímmikila makono kutwala kumponia.

⁹Shikatandeke shitendo asho, valwele uti vapashitingi asho vandímuukila Paulu navanavo vandípona momo.

¹⁰Vanu avo vandítupa dinudyo dyoe namene na patuukile ndapanganikanga pakulota twinjile mwingalava vandítupa vinu vyoe vyakutupwashela mushimwanda shetu.

¹¹Ling'oto lyakwikala wetu pashitingi asho myedi mitatu, tundíinjila mwingalava ye ipagwíte mulyutu alyo muwakati uti wakudidima imepo. Ingalava yoyo ivele ya ku Alishandaliya na mushu mwake indívanavo mashinamu avannungu mamaa.[46]

¹²Tukawike panshiko wa Shilakusha, tundíikala maduva matatu.

¹³Patuumile apo, tundyúka shalowa mpaka pa Legiu. Palyamba lyake kupunga imepo yakwalakela kwina shilambo kutwala muliduva lyake lyambili wetu kuwika panshiko wa Putiyoli.

¹⁴Pa Putiyoli wetu kuvakodya vanung'unumunu, vovo vo kutujugwangila twikanavo ishumana imo. Kutwala apo, tundyúka ndawika ku Loma.

¹⁵Napanelo vanung'unumunu váshiikala pa Loma vakapate dyabali dyakuwika kwetu, vandíida ndatushinga pashakoni sha pa Apiyo na pa Ding'ande Nnatu Dyavajeni. Paulu akavone vanung'unumunu avo, anínnambwalela Nnungu na ntima wake undímwikala shana.

¹⁶Patuwikile nkaja mu Loma, Paulu andípata litala lyakunama paing'ande yagweka kutwala kummikila mwing'ondo jumo wakunnaledya.

¹⁷Napanelo akapite maduva matatu, Paulu andívashamanga vanang'olo vavayuda kutwala vanavo pavaidanenge nae kuvaulila doni, “Mmanung'unumunu, nangu panikatenda shinu shakukowa kwavenentete vetu na kwashinamilo shavatulakadile vanakuluvetu, vayuda pa Yelusalemu vaningunga kutwala kungukamudya kumakono avaloma.

¹⁸Valoma pavalalyenge myaa vyangu vashindalota vanguleke mwaa nkati mo havagwene likosha lyoelyoe lyakulota ngupalele.

¹⁹Kanji vayuda ni kwita doni kutwala nanangu kujugwa mwaa wangu uwike akune kumwe Shashali pakulota alalyange ata ikava kenga nangu hanguvenavo mwaa woewoe wakuvakashalya venentetemwangu.

²⁰Ni ashi shitadídye ngujugwangile nimwone na ngwambange mwaa namu mwenu pakuva ni kwamwaa walilindilililo lyavanaishilaeli lyangunyukatila nangu mang'unyang'unya ala.”

²¹Vanavo kutwala kushidoni, “Wetu hatupatile ata lyamba limo lyakwaloka ku Yudeya na pakati pavanung'unumunu vaidíle akuno hapali hatuvalangangidile shitendo shoeshoe shakunyata shako wako.

²²Nadoni tundilota tukwigwe wako umwene mwawonela. Mwaa tundimanya kenga kula kushinu vanu vankuvangedya ishama yawoda wako.”

²³Napane vakavike liduva lyakukadyania namu nae, vandímwidila vanu voe palyutu lyashiikala na nae kutunduvangila lyamba mpaka lyulo andívaigwiniya ataa ushuda yautawala wa Nnungu alingangila avashombe kwaing'ano imwe Yesu kutunduvangila mu Lilamulo lyake Musha namomo mu Vakulava.

²⁴Vanji napane vandívashambegwa na ashilá shitangaléke kanji vanji havakulupidíle.

²⁵Napavedoni vàpagwite mukutaukananga shivenevene, Paulu andívaulila vaumanange atangola lilove limo, “Imumu Wanashwe anditangola viu na vanakuluvenu kwaindila imwe nkúlava Ishaiya

²⁶patédoni, “ ‘Wena kwavenentete ava ukavaulile doni, Mundaigwilila matu ngambulii kanji hamumanya shitangaléka, Mundalola ndoo kanji hamumanya shinu shene.

²⁷Mwaa mitima vyavenentete ava vindinanopa; kumatu kwave vandidiva, mevo ave vandyunidya kwambangidya havanalole vamanye shinu shene, havanaigwilile vamanye shitangaléka na havanaitikile shitangaléka; leka vakatandile avyo vakandishinjiulila mitima vyave kwangu, kutwala nangu kuvaponia.’ ”[47]

²⁸Paulu kavili kushidoni, “Ikala mumanya doni ntenga au wakwambola wake Nnungu undipalakalegwa kwavamidi na vanavo vandaigwilila.”

³⁰Bai Paulu andíikala vyaka vivili paing'ande yake yapangíle. Mulyutu lyolyo nae ashindavapwashalela vanu uti váshuka nannola

³¹avalanganga utawala wa Nnungu na apundisha uti vimwámba UMU Yesu Klistu kwantima shii uti[49] na kwabila kundingadinga shinu.