Read Ibibiliya mu Shimakonde Imbodi Yaambi na dimbande dya Imbodi Yakala Vitendo 3 Bible Online

Vitendo 3 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 3

¹Muliduva limo muwakati wasatisa wakati wakushwali, Patulu namu Nshuwau vauka shalumo kwing'ande ya Nnungu.

²Koko ko, vanu vanínnyukata munu wakudidimanga madodo tangu mmunda mwanyoke, munu wavashimmika kula liduva pannango waing'ande ya Nnungu wavashishema Nnango-wakwalala atende avajugwajugwa njuluku vanu váshiinjilila apo.

³Munu aju akamwone Patulu namu Nshuwau vainjila mwing'ande ya Nnungu nae andívajugwa.

⁴Patulu na muje kunnola ndoo, kutwala kushidoni, “Tulola wetu apa!”

⁵Nae apalá, ng'amung'amu, kuvalola ona kenga andapata shinu shoeshoe.

⁶Kanji Patulu kushidoni, “Hanguve njuluku kanji sho shanguvenavo sho ndakupa; palina limwe Yesu Klistu wa ku Nashaleti, takatuka uwene!”

⁷Patulu kunkamula nkanakono kumwimidya kutwala munu jo madodo ake na malundi, kuliimiliyangidyanneu.

⁸Nae kudaloka kutunduvanga kuwena, kwinjila shalumo namu vanavo mwing'ande ya Nnungu awena, adalakanga na antumbyanga Nnungu.

⁹Vanu uti kutwala kumwona awena na antumbyanga Nnungu

¹⁰na vandímanya kenga ni munu jojo áshiikala ajugwajugwa pa Nnango-wakwalala waing'ande ya Nnungu. Bai vanavo vandítikinanga na vandíshanga shitendo asho.

¹¹Napanelo munu aijá ànamatidile kumili kwake Patulu namu Nshuwau mulukoma lwake Shalomoni, vanu uti vandítukutila koko vàshangile.

¹²Patulu pagwene davo, andívaulila vanu avo kushidoni, “Mmanaishilaeli! Mwaa shani munkushanga shitendo ashi na mwaa shani munkutulola namene? Da mwona kenga munu aju tumwanaidyé kwadimongo dyetu wetu kwali kwaunnungu wetu wetu tuvene?

¹³Nnungu umwe Abulaamu, umwe Ishaki, umwe Yakobo, Nnungu jojo wavanakuluvetu aninkwedya amupa lishangelo Yesu ntumika wake, jo wamunkamudidye mwenu na kumwita pamevo pamwe Pilatu paukile ndaamuwa nae amuungule.

¹⁴Kanji mwenu mundimwita Wakwilimyanga na Waishaliya kutwala kujugwa vamuungulile nkúbyaa.

¹⁵Napavedoni, mwenu munimpedya mwene shingumi kanji napane Nnungu, jojo jo, anindyuwa mushipinga shavakupela na wetu nelo tuvashuda vashitendo asho.

¹⁶Napanelo dimongo dyalina limwe Yesu dinintadya munu aju wamumwona na wamummanyite, aliimiliyange. Andiliimiliyanga mwaa wakukulupila lina limwe Yesu; likulupililo lyolyo linditadya aju aponele uti kenga mwenu uti munkwona.

¹⁷Mmanung'unumunu, nangu ndimanya kenga mwenu pamo na vakutawala venu munditenda shinu ashi pamukamanya shamutenda.

¹⁸Kanji napavedoni, Nnungu anditandedya ashilá shatangwéle kala kwaindila yavakulava vake uti kenga Klistu wake inimmaikila auvauvange.

¹⁹Nadoni lijugulange na nshiliukile pakulota madambi enu alivalivigwe

²⁰na wakati wakuliimiliyanga umwikile mwenu walakela pamevo pake UMU na kwambangidya ampalakadyedye Klistu wampangidile tangu kala, aijá Yesu.

²¹Jo Yesu jo inimmaikila apagwe kuwa mpaka muwakati ulóta kukandyangigwa vinu uti, wakati wowo wavalangenge Nnungu tangu kala kwaindila yavakulava vakwilimyanga.

²²Mwenu, Musha atédoni, ‘UMU, jo Nnungu wenu anantakatuwa pakati pavanung'unumunu venu nkúlava jumo kenga nangu. Nkúlava ajo, kula shinu shalota kutangola, mwigwilile.

²³Munu akanamwigwilila nkúlava ajo, andaapuligwa mushipinga shavenentete na andabamolegwa.’[9]

²⁴“Vakulava uti kutunduvangila Samuwele na vanji uti vamwatíke nae vandivalanganga vitendo vyamaduva ala.

²⁵Mwenu munkupata vyalivikile Nnungu kwavakulava na munkupata avilá vyalivikile pavapangile imbodi vanakuluvenu pamwaulidile Abulaamu doni, ‘Kutunduvangila kuudukulu wako makola uti amushilambo shapai andaalaligwa.’

²⁶Nnungu pantakatuwidye ntumika wake, ampalakadidyé shitandi kwenu mwenu pakulota amwalaliye anshinjiula kula munu mushinamilo shake shakunyata.”