Read Ibibiliya mu Shimakonde Imbodi Yaambi na dimbande dya Imbodi Yakala Vitendo 5 Bible Online

Vitendo 5 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 5

¹Kanji napanelo, munu junji wavashinshema Ananiya pamo na ndyagwe Shapila, momo vandíshumidya pashinu pave.

²Njuluku wo nae unji kutitikulila, ndyagwe shitendo asho kuungila nkono kutwala unji kuka ndavakamudya vamyombe.

³Patulu kutwala kumudya, “Ananiya, mwaa shani uninneka Shatwani akuumbala muntima ata mpaka kunshang'apila Imumu Wanashwe na kutitikulila njuluku unji walishamba lyaushumididye?

⁴Lishamba lyo ukanava kushumidya livele lyako na ata paushumididye apa njuluku wo mwiu wàko wakulota wako kutumila mwaulatela umwene. Kanji mwaa shani unditunga ding'ano adi muntima mwako? Bai manya kenga haunduwenge munu, unduwengé Nnungu.”

⁵Ananiya po paigwite malove ala, andíjanguka àpadile. Vanu uti vaigwíte shitendo asho vandíjopa namene.

⁶Bai vanemba vakantatela mwishanda vakanyukata kuka nanshika.

⁷Napanelo dikapite disaa kenga nnatu doni, ndyagwe pakamanya shitandéke akainjila nng'ande amulá,

⁸Patulu kumudya, “Da njuluku walishamba lyamushumididye na ntwavo ni wowo au bai?” Nae kushidoni, “Elo, ni wowo wo bai.”

⁹Patulu kutwala kushidoni, “Ivelé dashi mwenu kuunganila kunninga Imumu umwe UMU? Lola, vanemba vavéle pannango vo, vauja kukunshika ntwavo, nawako vandakunyukata momo.”

¹⁰Shapila apalá kugwenneu àpadile kugwilila mushu mwake Patulu. Vanemba paviinjidile nng'ande amulá vanínkodya àpadile; vanavo kunnyukata kuka nanshika pavanshikile ntwagwe.

¹¹Nadoni kujopa kukumene kundiidila liganisha pamo na uti vaigwíte dyabali dyavitendo avyo.

¹²Bai kwaindila yavamyombe, vishindatandeka vimanyikilo na vyakutikinikanga pakati pavenentete na vakwoda uti vashindakadyania kwaunapamo mulukoma lwake Shalomoni.

¹³Napanelo mulyutu alyo vanu vákavele vakwoda hapali áshilyalaveka kulyunganianga namu vanavo, ata ikava kenga venentete uti vashindavashibanga namene vakwoda.

¹⁴Bai dimbumba dyavalume na dyavakongwe díshinkulupila UMU dishindaanjadyeka namene.

¹⁵Kwodana na vitendo avyo, venentete vashindavaumya valwele muding'ande kuka ndavaladya mudigoli na mmakande kulangele pakulota Patulu papita kananga shimbedi vela ashi shiviinikidye.

¹⁶Na ata dimbumba dyavanu dyakwaloka mumakaja ashitanono, vashindaumbalanila pa Yelusalemu na valwelwe vave pamo na vanu váshuuvauvanga na majini mashapu uti vashindapona.

¹⁷Napanelo nkúlangalalela-shadaka nkumene pamo na vavagwe uti vàvele vamushipinga shamashadukayo, vandítunduvanga kuvaanangila ing'ou vamyombe.

¹⁸Nadoni vandívakamula vamyombe kuka ndavajela nkalaboshi yankaja amo.

¹⁹Kanji shilo shake liduva alyo njelo wake UMU akashimulanga milango vyakalaboshi, akavaumidya panda kutwala kuvaulila doni,

²⁰“Wena mukalilodye kwing'ande ya Nnungu mukavape venentete malove a Shingumi ashi.”

²¹Bai vamyombe vakaigwilile malove alo; lyamba linyeiku vandyúma kuka kwing'ande ya Nnungu ndavapundisha venentete. Napanelo nkúlangalalela-shadaka nkumene pamo na vavagwe vandívanavo nguguvale wavananangalaledi vamakaja va ku Ishilaeli. Vanavo kutwala kuvatuma vakulaledya vauke vakavatwale vamyombe kukalaboshi.

²²Vakushunga vakauke kukalaboshi, vamyombe havavakodidye kutwala kuja kuka ndavalanganga kwavanang'olo

²³kushidoni, “Mwe! Wetu tundyuka mpaka kukalaboshi; wetu kukodya milango uti vàgagowidye shana, vakulaledya vàimilenge panda vashunga kanji patushimwile, nkati kukodya vyo, ngwe!”

²⁴Bai nang'olo wavakushunga-ing'ande ya Nnungu pamo na vanang'olo vavakulangalalela-shadaka pavaigwite dyabali adi vandítikinanga kutwala kushidoni, “Ing'ano ai ilota kuva dashi!”

²⁵Napanelo popo po, andíwika munu jumo kutwala kushidoni, “Mwenu, vanu vamuvajadile nkalaboshi vo, avalá paing'ande ya Nnungu po, vankuvapundisha venentete.”

²⁶Bai nang'olo wavakulaledya pamo na vakushunga vakauke vandívatwala vamyombe kwasiyasa vavajopa venentete kuvaamanga majanga.

²⁷Napanelo vakavaidenavo vandívaimidya shing'ati nguguvale kutwala nkúlangalalela-shadaka nkumene kuvanyika

²⁸aashidoni, “Da mwenu wetu hatunnaidye ngala kupundisha palina lyamunu ajo? Shapo lola, nkaja mu Yelusalemu amu malove enu andyaandavala uti na ata mpaka mulota twitikange yamyadi vyamunu aju.”

²⁹Kanji Patulu pamo na vamyombe kujang'ula doni, “Kudyanga kumwigwilila Nnungu kuliko kuvaigwilila vanu.

³⁰Nnungu wavanakuluvetu anindyuwa Yesu, munu wamummyee mwenu kwaindila yakunkamela panshalaba.

³¹Jojo jo, Nnungu animmika palyutu lyashimbili kunkanakono kwake antenda kuva Nang'olo na Mwamboli kwambangidya avape vanaishilaeli kulijugulanga na kulivalivigwa kwamadambi.

³²Wetu apa pamo na Imumu Wanashwe wanjawile Nnungu kuvapa vanu vamwigwilíla ni tuvashuda vavitendo avyo.”

³³Napane vanavo pavaigwite malove alo, vandínyanyamukanga kulota kulamulila kuvovya shingumi.

³⁴Kanji munu jumo mpalishayo wavashinshema Gamaliyele mwalimu wadishaliya na wavashimwishimu namene venentete, andíimila panguguvale kulamulila vavaumidye padyoko panda vamyombe

³⁵kutwala kushidoni, “Mmanaishilaeli! Lilaledye na vitendo vyamulota kuvatenda vanu ava.

³⁶Muvyaka vyapanyuma padyoko, andyúmilila Teudashi munu áshilivika kuva wakwishimika; vandílyunganianga namu nae vanu vakuwikila shikonda kenga shadimiya nsheshe doni. Kanji pavamwovidye shingumi, avalá uti váshinkulupila vandímwadilikananga kutwala ing'ano ayo kumalilikila popo.

³⁷Kutwala apo, muwakati washaandika shavenentete andyúmilila Yudashi wa ku Galileya; nae andívashomba vanu voe kanji vakampedye, avalá uti váshinkulupila vandíjaikananga.

³⁸Napavedoni kwaing'ano ai ninkumwaulila doni, vanu ava hamunavaavalele mwaa ivelé doni, nnugu au na shitendo ashi vikava vyakubuni vanu, vindatimbikanga

³⁹kanji vikava vya Nnungu hamuvaulula kuvatema na ata inkuululika mwenu kupagwa mukumpinga Nnungu.” Bai vanavo vandyúngila nkono.

⁴⁰Nadoni vakavashema vamyombe avalá vakavashapa viboko kutwala kuvaduma havanatangole palina limwe Yesu na kuvaleka vauke.

⁴¹Vamyombe vandyúma panguguvale awo vapuwanga pakuva vandivalangiligwa aki yakunyambikanga kwamwaa wa Lina ali.

⁴²Bai vanavo kula liduva mwing'ande ya Nnungu na muding'ande dyavanu, havashilakela kunyuma kupundisha na kummalanganga Yesu kuva Klistu.