Read Ibibiliya mu Shimakonde Imbodi Yaambi na dimbande dya Imbodi Yakala Vitendo 6 Bible Online

Vitendo 6 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 6

¹Napanelo muwakati washishaanjadyeka shipinga shavakwoda, avalá váshitangola shigalegu vashindavatangadikanga vabalaniya mwaa vanamwili vave vashindalivalivigwa mulipwashalelo lyakula liduva.

²Bai vamyombe kumi na mbili avalá vandíshema imbumba yavakwoda uti kutwala kushidoni, “Hashinava shambone wetu kuleka kuvalanganga lilove lya Nnungu pakulota tutumike pandamu.”

³Napavedoni mmanung'unumunu vatandole vanu saba pakati penu vaushuda wambone, vakuvaumbala Imumu Wanashwe, valimanyilo tuvakamudye shimadengo ashi

⁴pakulota wetu apa ngwengwe tupagwe mukushwali na mukutumikila lilove.

⁵Malove ala imbumba yavakwoda uti andívanagwela. Nadoni vandívatandola vanu ava: Shiteva munu walikulupililo lyoe na wakumuumbala Imumu Wanashwe, kwatika Pilipo, Polokolo, Nikanoli, Timoni, Palamena namu Nikolau munu wa ku Antiyokiya e aliinjidyénge mwidini yavayuda.

⁶Kutwala apo, imbumba indívalodya vanu avo kwavamyombe kutwala vamyombe kushwali na kuvavikila makono.

⁷Nadoni lilove lya Nnungu lishindaandavala; pa Yelusalemu vakwoda vashindaanjandyeka na vakulangalalela-shadaka voe vashindaigwilila likulupililo.

⁸Napanelo Shiteva àumbaligwidye umonyo na dimongo ashindatenda vyakutikinikanga vikumene na vimanyikilo pakati pavenentete.

⁹Napavedoni vanu vapashitala shakulipudidya shavashishema “Shavanu vamuunaiti” pamo na vaalakadíle ku Shilene, ku Alishandaliya, ku Kilikiya na ku Ashiya vandíbuwa ntau namu Shiteva

¹⁰kanji havashuulula kutauka limanyilo na Imumu Wanashwe áshinnangalalela nae mukutangola.

¹¹Napanelo vandívonga vanu pakulota vankanidyange Shiteva kenga vandimwigwa ankupulu Musha na ankupulu Nnungu.

¹²Nadoni vandívakang'ela venentete, vanang'olo pamo na vamwalimu vadishaliya kutwala kuka kwashingangala nankamula Shiteva kumuukanavo kunguguvale.

¹³Po panguguvale po, vandívaidanavo vashuda vakushang'apa váshishidoni, “Munu aju ngwengwe ankwabwalanga lyutu ali lyakwilimyanga na ankwiludyanga Lilamulo.

¹⁴Wetu tundimwigwa atangola kenga ashii Yesu wa ku Nashaleti andabamola lyutu ali na kupindikulanga yadi yatulakadile Musha.”

¹⁵Bai vanu uti ve vaikalénge panguguvale awo, vakannole ndoo Shiteva, vandyóna ing'ope yake kuva kenga yanjelo.