Read Ibibiliya mu Shimakonde Imbodi Yaambi na dimbande dya Imbodi Yakala Vitendo 8 Bible Online

Vitendo 8 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 8

¹Bai Saulu andyúngila nkono ing'ano yakumpedya kwake. Napanelo kutunduvangila muliduva lyolyo, shindyúmilila shititimbu shakupapatigwa liganisha, yani shipinga shavakwoda váshipagwa pa Yelusalemu. Nadoni vakwoda vandívamwadikanianga pa Yelusalemu vanavo kutukutila mumakaja a ku Yudeya na a ku Shamaliya kanji vamyombe vandíijalila pa Yelusalemu.

²Vanu vakunjopa Nnungu vandítwala mili umwe Shiteva kuka ndashika na vanínnilila namene.

³Napanelo Saulu alota kumalidya liganisha, ashindainjila muding'ande uti dyavakwoda apita avakamula valume na vakongwe auka ndavajela nkalaboshi.

⁴Napanelo avalá vamwadilikanénge vashindauka vavalanganga lilove.

⁵Pilipo nae paalaladile kunjini wa ku Shamaliya ashindavavalangangila venentete Klistu.

⁶Dimbumba dyavanu kwaunapamo dishindamwishimu Pilipo mwaa vashindamwigwa shana namene vyashitangola na vashindona vimanyikilo vyashitenda

⁷mwaa vanu vavénavo majini mashapu, anavo ashindauma mumili mwave akuta namene na vakudidimanga madodo pamo na vakukwava vashindapona.

⁸Nadoni panjini awo lishindapagwa lipuwilo lyoe namene.

⁹Napanelo panjini wowo, andípagwa munu jumo walina Simoni. Munu aju muwakati wapanyuma pake ashindatandedya vinu vyashaviavi vyashivatikiniyanga vashamaliya na kulitenda kuva munu wakujowa.

¹⁰Simoni vanu uti va ku Shamaliya bila kumpambula munu vashindamwishimu namene na vashindatangola doni, “Munu aju ni dimongo dya Nnungu dishamégwa ‘Ding'umene.’ ”

¹¹Nae vashamaliya vashindamwishimu namene mwaa dimindi dyoe ashindavatikiniyanga na vitendo vyake vyashaviavi.

¹²Kanji Pilipo pavalangenge ntenga wambone wautawala wa Nnungu na yalina limwe Yesu Klistu, valume na vakongwe vashindapata ubatisho.

¹³Ata mpaka jo mwene Simoni momo andíkulupila kutwala nanae kupata ubatisho na ngwengwe ashindamwoda Pilipo alaledya shana vimanyikilo na vyamakango vikumene víshitandeka kutwala nae kushanga doni.

¹⁴Napanelo vyamyombe vapagwíte pa Yelusalemu pavigwite doni ku Shamaliya vanu vandiitikila lilove lya Nnungu, vaníntumidya Patulu namu Nshuwau koko.

¹⁵Vakawike pa Shamaliya vandívashwalidya pakulota vampate Imumu Wanashwe

¹⁶mwaa Imumu Wanashwe avele akanava kunshulukila munu ata jumo pakati pave ila vandípata ubatisho palina limwe UMU Yesu.

¹⁷Bai vanavo vandívavikila makono kutwala kumpata Imumu Wanashwe.

¹⁸Napanelo Simoni akone doni, Imumu ankuvashulukila vanu kwaindila yavamyombe kuvavikila makono, nae andyúmya njuluku avape vamyombe

¹⁹aashidoni, “Nanangu ngupa madalaka lolo kwambangidya nikammikila munu woewoe makono ampate Imumu Wanashwe.”

²⁰Kanji Patulu kushidoni, “Jaikila kushena na njuluku wako wo. Da wako wona kenga inudyo ya Nnungu vashuma na njuluku?

²¹Wako haunapagwa shinu ata padyoko nkati mushimadengo ashi mwaa ntima wako haunava shinu washalowa pamevo pake Nnungu.

²²Lijugulange, leka nnugu wakunyata wauvenavo! Njugwe UMU nakapanji andakulivaliva shabaa yamuntima wako.

²³Nangu ninkukwona wako kuva umunu wakukubyaa liu lyakupunda apo na ungave-shaliya undikutawala.”

²⁴Kutwala Simoni kushidoni, “Shonde, mwenu nangu ngujugwila kumwe UMU kwambangidya vyamutangola hashinapagwe shakungutandeka.”

²⁵Bai vamyombe vakaumye ushuda na vakatangole lilove lyake UMU, vandyújila ku Yelusalemu kupita vavalanganga ntenga wambone mumakaja oe avashamaliya.

²⁶Napanelo njelo wake UMU andímwaulila Pilipo kushidoni, “Panganika uke nkono wakwina shilambo utumila indila yúma pa Yelusalemu kwalalela ku Gasha.” Ayo ivelé kushimbweshe.

²⁷Pilipo kutwalinneu mwanda. Mwe! Nae kumwona munu jumo wavamuníle avele nanangalaledi nkumene umwe umu nkongwe wa ku Etiyopiya walina Kandaki munu áshaangangalanga mali uti amwe umu ajo. Nae aukile ku Yelusalemu ndalipudya kwa Nnungu.

²⁸Pashuja àikele mulingishi lyake ashindashomya shidingo shalyamba shimwe nkúlava Ishaiya.

²⁹Bai Imumu Wanashwe andímwaulila Pilipo kushidoni, “Vandika lingishi lyo upite woda!”

³⁰Pilipo kutumanuma mpaka palingishi kutwala kumwigwa munu jo ashomya shidingo shalyamba shimwe nkúlava Ishaiya Pilipo kumudya, “Da vyaushomya vyo unkumanya shana mana ake?”

³¹Mwitiyope kushidoni, “Ngulota kumanya dashi akapali munu ánguvalangangila?” Bai nae apalá anínjugwangila Pilipo akwele mulingishi vaikale pamo.

³²Napanelo lipungu lyamaandiko lyashishomya lishishidoni, “Vanintwala kenga mwavanantwalila ngandolo wavamuukanavo kukunshinda, mo mwanamalalila ngandolo pavankaja magwimbu, nanae momo hajamwile ikanywa.

³³Vanintanila na havampele shaliya, halakile udukulu, mwaa shingumi shake vandyovya mushilambo.”[12]

³⁴Bai mwitiyope andímudya Pilipo, “Ninkukujugwa, da nkúlava malove ala apa amwamba nyani? Alyamba jo mwene kwali amwamba munu junji?”

³⁵Napanelo Pilipo kutunduvangila mulipungu alyo lyamaandiko andyúka ammalangangila munu ajo ntenga wambone umwe Yesu.

³⁶Vauka mushu na shimwanda shave, vandíwika pashinu pavéle medi kutwala mwitiyope kumwaulila Pilipo doni, “Wako, medi ala apa. Da shipali shinu shingudingadínga shakungutadya napate ubatisho?”

³⁸Mwitiyope andílamulila kwimidya lingishi alilá, Pilipo namu nae kushulukanga kuukananga mmedi Pilipo kutwala kumbatisha.

³⁹Pavaumanenge mmedi, Imumu wake UMU aníntwala Pilipo; bai mwitiyope hangwene kavili kanji andyúka mushu na shimwanda shake apuwanga.

⁴⁰Bai Pilipo andílyona àvele panjini wa Ashoto. Nae ashindapita avalanganga ntenga wambone mumakaja uti mwashipita auka ku Shashaleya.