Read Ibibiliya mu Shimakonde Imbodi Yaambi na dimbande dya Imbodi Yakala Vitendo 9 Bible Online

Vitendo 9 - Ibibiliya mu Shimakonde Imbodi Yaambi na dimbande dya Imbodi Yakala bible

Vitendo 9

¹Napanelo Saulu amamodya mitisho yakuvabyaanga vakwoda vake UMU andímuukila nkúlangalalela-shadaka nkumene

²nanjugwa shitambulisho shakuka ndalodya muvitala vyamikodyanio vya ku Damashiko kwambangidya akavakodya váshinama mushinamidyo shake UMU[14] valume na vakongwe, avakamule avaidenavo pa Yelusalemu.

³Napanelo pashuka àvandike palikaja lya Damashiko, kwashingangala Saulu kuntang'anedya lilangadyo lyakushenga lyakwalakela kuwa.

⁴Nae pashinu apo kugwa kugwilila pai na kwigwa lidi líishidoni, “Saulu, wako Saulu! Mwaa shani unkungupapata?”

⁵Saulu kushidoni, “Nang'olo, da wako unyani?” Lidi lyo kushidoni, “Nangu Yesu, jo waumpapata wako jo.

⁶Napavedoni takatuka winjile nkaja mo! Mo nkaja mo, vandakwaulila shilotéka utende.”

⁷Napanelo vanu vaadanénge namu Saulu vandíimilanga vàkakatele vaigwa lidi kwabila kumwona munu.

⁸Saulu vaníntakatuwa pai apalá, pang'amwile mevo kulamana na kwona shinu; vavagwe vavénavo kunkamula nkono kumwinjidya nkaja mu Damashiko.

⁹Bai Saulu andíikala maduva matatu àputele pakalya na pakakumbila shinu.

¹⁰Napanelo po pa Damashiko po, andípagwa nkwóda jumo walina Ananiya; jo Ananiya aju UMU anínshema mwindoti aashidoni, “Ananiya!” Nae doni, “Nangu UMU!”

¹¹UMU kutwala kushidoni, “Panganika uke na ibalabala yavashema Yakwaloka mpaka paing'ande imwe Yudashi; pauwika, muudyangidye munu jumo walina Saulu wa ku Talashishi; nae ankupagwa mukushwali

¹²na mwindoti ninnodya munu walina Ananiya amwidila nammikila makono anshwalidya pakulota aujile kulola.”

¹³Ananiya do, “UMU, nangu munu aju ndivaigwanga vanu voe vammalanganga ukalau wake wavatandile nae vakwilimyanga vako ku Yelusalemu.

¹⁴Nae vanang'olo vavakulangalalela-shadaka vandimupa madalaka akwidila apa ndavakamula uti vatambulánga lina lyako.”

¹⁵UMU kutwala kushidoni, “Wena! Mwaa munu ajo ni shombo shangu shakutandalegwa pakulota aumaniange lina lyangu kwavamidi, kwavaumu, kwavanaishilaeli na

¹⁶nene nimwene nannodya mauvilo oe álota kumpata kwamwaa walina lyangu.”

¹⁷Nadoni Ananiya andyúka paing'ande apo kwinjila nng'ande kutwala kummikila makono Saulu aashidoni, “Nung'unumunu Saulu, UMU Yesu ákuumililidile niindila wida akuno, aningutumidya kwako wako pakulota uujile kulola na uumbaligwe na Imumu Wanashwe.”

¹⁸Bai mmevo mwake Saulu vindígwanga vinu kenga makakamba kutwala muwakati wowo nae kutunduvanginneu kulola kavili; andítakatuka kuka ndabatishwa

¹⁹na akalye, andípata dimongo. Bai Saulu andítwala maduva aikala pamo na vakwoda váshipagwa pa Damashiko.

²⁰Nae kutunduvanginneu kwinjila muvitala vyamikodyanio apita ammalanganga Yesu doni, “Nae ni Mwana wa Nnungu.”

²¹Napanelo vanu uti váshimwigwa vashinanshanga na vashindaudyania, “Da munu aju i jo ávatandile ing'ondo avalá vatambulánga lina ali ku Yelusalemu? Nae akuno aidilé kukuvakamula vanu avaukenavo kwavanang'olo vavakulangalalela-shadaka?”

²²Saulu napane ashindauka mushu dimwanjadyeka dimongo na ashindavavilinganianga vayuda váshiikala ku Damashiko aakikisha kenga Yesu aju ni Klistu.

²³Napanelo akapite maduva oe namene, vayuda vandyúnganila vamyae Saulu

²⁴kanji Saulu vanímmanyia nnugu wave. Vanavo shilo na mui vashindalaledya milango vyakwinjilila panjini valota vammyae Saulu.

²⁵Vakwoda vake napane vakantwala Saulu shilo kunjela mulitenga kunshuluwidya panda lishiti lyalikaja.

²⁶Napanelo Saulu pawikile ku Yelusalemu, andílingangila kulyunganianga na vakwoda kanji vanavo uti vanínjopa mwaa havashinkulupila kuva nkwódamwave.

²⁷Napane Balinaba aníntwala kumuukanavo kwavamyombe ndavavalangangila mwashi mwangwanalele UMU niindila ya ku Damashiko na jo UMU anditangola namu nae, namomo mwashi mwavalangangidile ku Damashiko kwabila kujopa palina limwe Yesu.

²⁸Nadoni Saulu andílyunganianga na vakwoda na ashindapita avalanganga palina limwe UMU nkaja mu Yelusalemu pakajugulanga shinu.

²⁹Namomo ashindatangola na ashindataukananga na vayuda váshitangola shigalegu kanji vanavo vashindalambela dindila dyakummyaila.

³⁰Napanelo vanung'unumunu pavaanaladile nnugu awo vaníntwala kumuukanavo ku Shashaleya, ako kunnumudya kuka kwave ku Talashishi.

³¹Bai liganisha lya ku Yudeya, lya ku Galileya na lya ku Shamaliya lindívanavo amani na lishindaliimiliyanga; linama mukunjopa UMU na mukumpambadyangigwa kwa Imumu Wanashwe, lyanavo lishindaanjadyeka.

³²Napanelo Patulu pashipita awanawananga kula kushinu momo andyálela kuka ndavalola vakwilimyanga váshipagwa pa Lida.

³³Koko ko, anínkodya munu jumo walina Eniyashi alagíle pagoli vyaka nane mwaa wakudidimanga madodo

³⁴kutwala Patulu kumwaulila doni, “Eniyashi! Yesu Klistu ankukuponia. Takatuka upindange litandiko lyako!” Eniyashi kutakatukinneu.

³⁵Bai vanu uti va pa Lida namu va ku Shalona vakamwone munu ajo, vanínshinjiulila UMU mitima vyave.

³⁶Napanelo panjini wa Yope andípagwa nkongwe jumo nkwóda walina Tabita, lina lyavashema mushigalegu Dolakashi,[15] nae avele wavitendo vyambone na ashindavapwashela vamashikini.

³⁷Muwakati wowo nae andyúula mpaka kupela. Akapele vandímwinga medi na kuntwala kuka nammika mushumba shapashanya ulungu.

³⁸Napanelo pa Yope namu pa Lida hapalapanénge namene; nadoni, vakwoda pavaigwite kenga Patulu apali pa Lida vanavo vandívatumidya vanu vavili kuka nanjugwangila Patulu aide shipajelo aonane namu vanavo pa Yope.

³⁹Bai Patulu andyúka namu vanavo. Akawike, vaníntwala kumuukanavo mushumba shapashanya ulungu kutwala vanamwili uti kuntang'anedya valila na vannodya vyakulijalangila vyakuvilingananga vyakandyénge Dolakashi pavéle mumi.

⁴⁰Patulu napane akavaumadyanga vanu uti mushumba mo akaguguvala kushwali, akashiliuka kulola mili kutwala kushidoni, “Tabita, takatuka!” Bai Tabita andíng'amula mevo kunnola Patulu kutwala kutakatuka kwikala.

⁴¹Nae kunkamula nkono ampwashela pakulota aimile kutwala kuvashema vanamwili pamo na vakwilimyanga kuvalodya Tabita mumi.

⁴²Shitendo ashi shindíigwinika pa Yope uti na vanu voe vanínkulupila UMU.

⁴³Bai andíikala maduva oe pa Yope namu munu jumo wakuushila magwogwe walina Simoni.