Read Ibibiliya mu Shimakonde Imbodi Yaambi na dimbande dya Imbodi Yakala Valoma 1 Bible Online

Valoma 1 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 1

¹Paulu, ntumwa umwe Klistu Yesu áshamagwidye ave myombe na áapuligwidye kwantenga wambone wake Nnungu,

²wo walivikidile tangu kala kwaindila yavakulava vake nkati mumaandiko akwilimyanga

³umwámba mwanagwe, jojo jo, kwakwodananavo shimunu ávalakwadidye muudukulu umwe Daudi

⁴na kwakwodananavo Imumu waukwilimyanga ápangigwidye kuva Mwana wa Nnungu nkati mudimongo kwaindila yakudyuka pakati pavakupela, Yesu Klistu UMU wetu.

⁵Kwaindila yake nae tundipata umonyo na umyombe wakutadya pakati pavenentete uti kwigwilila kwalikulupililo kwamwaa walina lyake

⁶na pakati pavanavo, munkupagwa namwenu momo múshamagwidye muve vamwe Yesu Klistu.

⁷Kwenu mwenu uti múpagwa ku Loma, mwemwe mmakunagwaleka vake Nnungu na múshamagwidye muve mmakwilimyanga. Umonyo upagwe kwenu mwenu na amani yakwalakela kumwe Nnungu Tatagwetu na kumwe UMU Yesu Klistu.

⁸Shinantandi ninkunnambwalela Nnungu wangu kwaindila imwe Yesu Klistu kwamwaa wenu mwenu uti mwaa likulupililo lyenu linkuvalangangigwa mushilambo uti.

⁹Nnungu wanintumika na ntima wangu uti muntenga wambone wa Mwanagwe ni nshuda wangu mwashi mwanintambulangila mwenu ngwengwe

¹⁰mukushwali kwangu ngujugwa doni, kwadindila dyoedyoe kwalilotelo lyake Nnungu ling'oto lyawakati woe ambi napane ndaulula kwida kwenu.

¹¹Ninkuvanavo mweshe wakwida nannola kwambangidya dashi nimwing'e shajo shoeshoe shaimumu pakulota shinnonowange.

¹²Doni ni pakulota tupambadyangigwe kwaindila yalikulupililo lyakula munu, lyenu mwenu pamo na lyangu nangu.

¹³Hangunalota shinu mmanung'unumunu mutikinange kenga myanda vyoe vyangupanganikenge ngwide kwenu kanji mpaka ambi apa shipali shingudingadínga. Shabaa yangu nikulota ngupune vyepo pakati penu kenga mwangupunilile pakati pavamidi vanji vo.

¹⁴Ninkuvanavo udeni kwavamidi na kwavakamanyika, kwavakumanya na kwavajinga.

¹⁵Nadoni ninkuvanavo dukuduku yakuvalanganga ntenga wambone momo kwenu mwenu múvele ku Loma.

¹⁶Mwaa hangunona dyoni kwantenga wambone pakuva ni dimongo dyake Nnungu dyakwambola kwaupande wavanu uti vakulupíla; shitandi kwamuyuda ling'oto kwangalegu.

¹⁷Mwaa mo muntenga mo inkulilodya ishaliya yake Nnungu kutunduvangila mulikulupililo kuka mulikulupililo kenga mwavaandikidile, “Waishaliya andanama kwalikulupililo.”[1]

¹⁸Mwaa doni apa, shitundi shake Nnungu shinkulilodya kutunduvangila kuwa shiidila ungave-Nnungu na ungave-shaliya wavanu vatitikidyánga umwiu kwaindila yakuvova ishaliya.

¹⁹Mwaa ashilá shuulukíka kumanyika kwamwaa wa Nnungu shanavo shinkulilodya pakuva jo mwene Nnungu, andivalodya.

²⁰Doni, tangu kukandyangigwa shilambo mavalelo ake ákaaneka yani dimongo dyake díkamalilika na unnungu wake, vyanavo vyaneke ngala kwaindila ya vyo vinu vikandyangígwe. Naivedoni, kwavanavo hamupali mwakukanila.

²¹Mwaa vàmmanyite avi Nnungu, havampele lishangelo kenga Nnungu na ata havannambwaladile kanji vanavo mmakumbukililo ave vandinyambikanga na mitima vyave vyaujinga vindyumbala shii.

²²Vanavo valivalanganga kuva vading'ano vanditadya kuva vajinga

²³kutwala kubadilisha lishangelo lyake Nnungu ákapela kwalishinamu lyalinganienge kenga munu ápela, vyuni, vanyama na vakoko vakulyuta.

²⁴Napavedoni Nnungu andivakamudya muditamaa dyammitima vyave vatandedye ushapu wakutadyania dyoni mumili mwave[2]

²⁵pakuva vabadilishidyé umwiu wa Nnungu kwaushwang'a kutwala kulipudya na kutumikila viumbe pavakalipudídye Namumba átumbyangilika ngwengwe. Ame.

²⁶Kwamwaa au, Nnungu avakamudidyé muditamaa dyave dyadyoni, ata mpaka vo vakongwe vave vo, vandibadilisha kutenda wendi muvaikidíle kwakutandela munji múkavaikidile.

²⁷Namomo valume valeka kutenda wendi muvaikidíle kwankongwe, vanavo vandibyaikanga mumweshe wave washivanavene; nnume na nnumemwagwe vatandana vyadyoni kutwala kulipatila vo vene ukumu ivaikidíle kwamakosha ave.

²⁸Naivedoni pakuva vanavo havagwene mana yakummanya Nnungu, jo mwene Nnungu andivakamudya mumakumbukililo ave akunyata pakulota vatandedye ashilá shíkavaikidile kutenda.

²⁹Vandyumbaligwa ungave-shaliya uti; ushapu, lung'unuku na ukalau. Vaumbaligwidyé ing'ou, kubyaa, ing'ondo, kushang'apa na kung'wenya;

³⁰vanu vakung'wenya, vammangédya Nnungu, vákave ishima, vakulyona na vakulitumbyanga; vakubuwa vitendo vyaukalau, vákavaigwilila vatatamunu,

³¹vajinga, vákakulupilika, vákanagwaledya na vákave shididi.

³²Ata ikava kenga vandimanya lilamulo lyaishaliya lyake Nnungu líishidoni, avalá vatandédya avyo indivavaikila vapele. Vanavo i gweka vankutenda kanji namomo vankuvaungila nkono avalá vaténda.