Read Ibibiliya mu Shimakonde Imbodi Yaambi na dimbande dya Imbodi Yakala Valoma 11 Bible Online

Valoma 11 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 11

¹Napane ninkudya, da Nnungu jo andivaita venentete vake? Ata padyoko vela! Mwenu, ata nene nimwene ni mwanaishilaeli, wamuudukulu umwe Abulaamu, wamulikola limwe Benjameni.

²Nnungu havaitile venentete vake avalá vavamanyite kaladavo. Da mwenu hamumanyite mwatangalela Maandiko amwámba Liyashi mwanjugwidile Nnungu na dimongo kwamwaa wavanaishilaeli?

³“UMU, vakulava vako vandivabyanga kutwala dyalutali dyako kutamanga, ngúbakidile ni gweka nangu na vankulambela vangumalidye.”

⁴Da apatile lijibu shani lyakwalakela kuwa? “Ndilikandyedya vanu dyalupu saba vákanguguvalidile Baali.”

⁵Nadoni ata nelo momo muwakati au watupagwite, vapali vakwijalila vatandalagwídye kwaumonyo.

⁶Napane ikava kenga ni kwaumonyo, hainava shinu kavili kwashimadengo, leka ive davo umonyo haunave kavili umonyo.

⁷Napane nyamani? Vanaishilaeli, ashilá shavashilambela havapatile. Shindipatikana namu vakutandalegwa kanji vanji vo vandivananopya mitima

⁸kenga indyandikigwa, “Nnungu andivapa imumu yakwidopa, mevo ákalola na matu ákaigwa mpaka muliduva lyanelo.”[41]

⁹Namomo Daudi atédoni, “Ndamu wave luve kwavanavo lutambo na lungau kwavanavo live liliva na shaushanga.

¹⁰Mevo ave aputale pakulota havanalole na myongo vyave vipindane ngwengwe ngwengwe.”[42]

¹¹Napavedoni ninkudya, da vandilikuvala pakulota vajale? Ata padyoko vela! Leka apo, kwaindila yakupujungula kwave kwambolegwa kundivawikila vamidi kwambangidya ivatadye vanaishilaeli vavenavo liloko.

¹²Mwenu, ikava kenga kupujungula kwave kundiidanavo mali kwashilambo na kukowa kwave kundiidanavo mali kwavamidi, kushi kuumbaligwa kwave ko, akumamodya?

¹³Napane ngutangola namu mwenu mmamidi. Doni, pakuva nangu ni myombe wavamidi ninkutumbudya utumika wangu ngwing'a lishangelo

¹⁴pakulota dashi, kwadinamuna dyoedyoe nguvatadye liloko vakwetu kwambangidya ndivaambole vanji pakati pave.

¹⁵Mwenu, ikava kenga kujaigwa kwave kundiidanavo kwigwania mushilambo, ilota kuva dashi kukubaligwa kwave paikava shingumi shuumíle mukupela?

¹⁶Napane ikava kenga imbande itandi indiilimyanga bai namomo likamu uti lindiilimyanga na ikava kenga lushija lundiilimyanga bai dinavi momo.

¹⁷Kanji napane ikava kenga dinavi dinji vandipanyulanga na wako úvele ulivela wakunundu vandikunamatidya pakati pave kutwala kumajananga muululu walutuba walushija lwaulivela,

¹⁸haunalyone kwadinavi adyo na ata ikapagwa yakulyona, manya doni, i mwenu mwángangalanga dinyija kanji ni dinyija dímwangangalanga mwenu.

¹⁹Napane wako undaashidoni, “Dinavi vandipanyulanga kwambangidya nangu vangunamatidye.”

²⁰Mwiu. Dyanavo vandipanyulanga kwamwaa waungakulupila wave, napane wako unkupagwa kwaindila yalikulupililo. Nadoni haunalitumbyange kanji jopa.

²¹Mwaa ikava kenga Nnungu havikidile shitete dinavi dyene-dyene nawako momo hakuvikila shitete.

²²Napavedoni, lola litananilo na ukali wake Nnungu: ukali kwa avalá vagwíle na litananilo lyake Nnungu kwako wako ikava kenga undauka mushu mulitananilo lyake; ikanavadavo, nawako momo vandakulumula.

²³Na ata vanavo vakanauka mushu muungakulupila wave, vandanamatiligwa mwaa Nnungu ankuulula kuvanamatidya kavili.

²⁴Doni, ikava kenga wako undilumuligwa muulivela kwashivalakwelo wakunundu kutwala kuka ndanamatiligwa muulivela wamulishamba uvilinganiánga shivalakwelo, kushi adilá dinavi dyashivalakwelo hadimamodya kunamatiligwa kavili munnandi wave vo vene?

²⁵Mmanung'unumunu hangunalota shinu mutikinange shipii shangulota kutangola kwambangidya hamunave mmanu mmakulyona: kunanopa kwantima kúkawikidile popo kundivawikila vanaishilaeli mpaka kuumbaligwa kwavamidi kuwikile popo.

²⁶Nimumo momo vanaishilaeli uti vandaambolegwa kenga indyandikigwa, “Ku Shiyau andaalakela Nkúposha nae andaushanianga ungave-Nnungu munayakobo.”[43]

²⁷“Ai ni imbodi yangu kwavanavo pangulota kuvaushanianga madambi ave.”[44]

²⁸Kwaupande wantenga wambone, vanavo ni vamongo kwamwaa wenu mwenu kanji kwaupande wakutandalegwa, vanavo ni vakunagwaleka kwamwaa wavanyakalamunu.

²⁹Mwaa dinudyo na kushema kumwe Nnungu, hakunaputangigwa.

³⁰Nimumo momo kenga mwenu kala hamushimwigwilila Nnungu kanji ambi mupatilé kwanangiligwa shididi kwaindila yaungaigwilila wave

³¹namomo vanavo vankuva vákaigwilila pakulota kwaindila yashididi shavannadidye mwenu navanavo vapate kwanangiligwa shididi.

³²Mwaa Nnungu andipangila uti kwaungaigwilila pakulota uti avaanangile shididi.

³³Aa, umbala ukumene wamali, limanyilo na umanyimanyi wake Nnungu! Kukamadyanga dashi kukodyakodya wamushi wake na kukamadyanga dashi kumanya dindila dyake!

³⁴Mwenu, “Nyani ámanyite ding'anong'ano dyake UMU? Kwali nyani áukile ndava nkúdumangila wake?”[45]

³⁵“Nyani ntandi ámpele shinu, pakulota ling'oto nae annipe?”[46]

³⁶Mwaa kutunduvangila kwake nae, kwaindila yake nae na kwaupande wake nae vinkupagwa vinu uti. Lipagwe lishangelo kwake nae ngwengwe. Ame.