Read Ibibiliya mu Shimakonde Imbodi Yaambi na dimbande dya Imbodi Yakala Valoma 12 Bible Online

Valoma 12 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 12

¹Napavedoni mmanung'unumunu, ninkunnaililila kwashididi shake Nnungu lyumye mili vyenu kumwe Nnungu kenga shadaka shingumi, shakwilimyanga na shinnagwéla Nnungu; aku ni kulipudya kwenu kwaimumu.[47]

²Hamunalilinganiange na shinamidyo shawakati au kanji mubadilike kwaindila yakunonowangigwa muding'anong'ano dyenu kwambangidya mutende nningo mwanalela akwashi malotelo ake Nnungu, ambone, akunagwaleka na ashalowa-uti.

³Mwenu, kwaumonyo wangupatile ninkumwaulila kula munu pakati penu hanalikumbukile jo mwene kupunda amulá muvaikidíle alikumbukilile kanji nae alikumbukile kwabila kupundanianga kulinganananavo shipimo shalikulupililo shanjavidile Nnungu kula munu.

⁴Doni, kenga mumili umo tunkuvanavo dimbande dyoe na dimbande uti hadivenavo shimadengo shimo,

⁵nawetu momo ata ikava kenga tuvelé tuvoe, tunkuva mili umo nkati mumwe Klistu na kula munu pakati petu tunkuva dimbande dyunganénge.

⁶Pakuva tunkuvanavo vyajo vyakuvilingananga kwodananavo umonyo watuukile ndapata, shikapagwa shakulavila, shindivaikila shitumike kwodananavo imbande yake yalikulupililo,

⁷kwali shakutumika, shitumike mukutumika kwali shakupundisha, mukupundisha,

⁸kwali shakwing'a ntima shii, mukwing'a ntima shii,[48] kwali shakujaula, kwantima, kwali shakulangalalela, kwaidukuduku, kwali shakulodya shididi, kwalipuwilo.

⁹Linagwaledyo live líkave shinankulaba. Vangedya ashilá shakunyata na kamulila ashilá shambone.

¹⁰Nagwaladyania namene kwalinagwaledyo lyashinung'unumunu muuvanavo dukuduku yakwishimana.

¹¹Mwidukuduku, hamunadidimange. Mu Imumu, jaulila. UMU, ntumike.

¹²Mulilindilililo, puwanga. Mumauvilo, lipililile. Mukushwali, nanopa.

¹³Kwa avilá vivóva vakwilimyanga, shangila. Kuvapwashalela vajeni, lambela.

¹⁴Vaalaliye avalá vampapáta, vaalaliye na hamunavatae dilana.

¹⁵Puwanga namu avalá vapuwánga, lila namu avalá valíla.

¹⁶Kumbukilanila mumo momo. Hamunalyone kanji ava tayali kulyunganianga namu avalá vailudyangíka. Hamunalyone mwemwe mmene kuva mmalimanyilo.

¹⁷Hamunalipe wakunyata kwawakunyata. Lambela kutandedya wambone pamevo pavanu uti.

¹⁸Ikaululika na kwaupande wenu mwenu, nama kwaamani na vanu uti.

¹⁹Mmakunagwaleka, mwiko hamunalipilile kanji kulipilila lakela shitundi shake Nnungu mwaa indyandikigwa, “Kulipilila ni kwangu nangu; nangu ndalipilila, atangola UMU.”[49]

²⁰Leka apo, “Mmongo wako akavanavo indala, mupe shakulya; ikankola inyota, mupe shakukumbila. Pautenda davo po, unkumpalila makala pamuti pake.”[50]

²¹Hamunaleke wakunyata untema kanji tema wakunyata kwauwambone.