Read Ibibiliya mu Shimakonde Imbodi Yaambi na dimbande dya Imbodi Yakala Valoma 3 Bible Online

Valoma 3 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 3

¹Napanelo muyuda ankuvanavo mana shani? Kwali kukumuligwa likumbi inkupagwa paida shani?

²Oe! Ankupagwa kula upande! Shitandi vayuda vandikulupiligwa malove ake Nnungu.

³Napanelo ilota kuva dashi ikava kenga vanji havakulupidíle?[5] Da ungakulupila wave undatadya kuputanga kukulupilika kwake Nnungu?

⁴Ata padyoko vela! Nneke Nnungu ave waumwiu ata ikava kenga kula munu ni wakushang'apa kenga indyandikigwa, “pakulota uvenavo ishaliya mumalove ako, na paukumu po, uteme.”[6]

⁵Kanji napane ikava kenga ungave-shaliya wetu unkulodya ishaliya yake Nnungu, tulota kwamba nyamani? Kwali tutangole do, Nnungu havenavo ishaliya patandedya shitundi shake? Ngutangola kenga nimunu.

⁶Ata padyoko vela! Leka ìvele davo, Nnungu akaulwile dashi kuukumu shilambo?

⁷Kanji ikava kenga kwaindila yakushang'apa kwangu umwiu wake Nnungu unkuumbaligwa kwalishangelo lyake mwaa shani nguukumigwe kenga ninkútega?

⁸Kwali mwavataukangila vanji vyatutangola wetu avi, “Tutende wakunyata pakulota wide wambone.” Ukumu yave ni yashaliya.

⁹Napane tuushidashi? Da wetu tuvayuda ni túvapunda vanu vanji? Mene, ata padyoko! Mwaa ndivalanganga tayali doni vayuda pamo namu vamidi uti vankupagwa mukutawaligwa na lidambi

¹⁰kenga indyandikigwa, “Hapali waishaliya ata jumo,

¹¹hapali munu ámanya, na hapali ánnambela Nnungu.

¹²Uti vandyashalanga, kwaunapamo vandilitenda vákave mana.[7] Hapali átandedya wambone, kulamana na jumo vela.

¹³Ding'alongo dyave ni makabuli avé mwandwa,[8] dindimi dyave vankutumila mukushang'apa. Mudindomo dyave munkupagwa ishumu yanyoka,[9]

¹⁴ndikanywa dyave mundyumbala dilana na kukalala.[10]

¹⁵Madodo ave ankutukutila kukujaa myadi,

¹⁶mudindila dyave mo, kubamola na madembe,

¹⁷na indila ya amani havamanyite.[11]

¹⁸Hakupali kunjopa Nnungu pamevo pave.”[12]

¹⁹Napane wetu tundimanya kenga uti vitangóla mulilamulo vinkutangola kwa avalá vatawalígwa na lilamulo kwambangidya dashi, dikanywa uti dimalale na shilambo uti shikapagwe muukumu yake Nnungu

²⁰mwaa kwaindila yashimadengo shalilamulo hapali álota kuvalangiligwa kuva ishaliya pamevo pake pakuva kwaindila yalilamulo inkutadya lidambi limanyike.

²¹Ambi napane ishaliya yake Nnungu indililodya yapukananga na lilamulo; ata lyo lyene lilamulo na vakulava vankumya ushuda wake,

²²doni, ishaliya yake Nnungu kwaindila yakunkulupila Yesu Klistu kwa avalá uti vankulupíla nae. Hakupali kuvilingananga

²³mwaa uti vanditega na kupalavalela lishangelo lyake Nnungu

²⁴vavalangiligwa kuva ishaliya muumonyo wake kenga inudyo kwaindila yakwambola kupagwíte nkati mumwe Klistu Yesu.

²⁵Nae jo, Nnungu andimumya kenga shadaka shakudimanga shitundi shake kwamyadi vyake kwaindila yalikulupililo[13] kwambangidya dashi ililodye ishaliya yake mwaa kwaupole wake, andíleka madambi akunyuma

²⁶pakulota alodye ishaliya yake muwakati au na ave waishaliya namomo wakummalangilila ishaliya aijá ánkulupila Yesu.

²⁷Napane shakwashi shakulota kulitamangila? Hashipali! Kwalilamulo shani? Lilamulo lyashimadengo? Mene kanji kwalilamulo lyakukulupila.

²⁸Mwaa wetu tunkwakikisha kenga munu ankuvalangiligwa ishaliya kwalikulupililo lyapukanánga na shimadengo shalilamulo.

²⁹Kwali Nnungu jo ni wavayuda gweka? Da nae po hanava shinu momo Nnungu wavamidi? Elo, ni wavamidi momo

³⁰pakuva Nnungu avelé jumo bai na kwalikulupililo tu, nae andavavalangilila ishaliya vakumulígwe na vákakumuligwe.

³¹Da doni po tunkuputanga lilamulo kwaindila yalikulupililo? Ata padyoko vela! Kanji lyanavo lyo, tunkunonowanga.