Read Ibibiliya mu Shimakonde Imbodi Yaambi na dimbande dya Imbodi Yakala Valoma 5 Bible Online

Valoma 5 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 5

¹Napavedoni pakuva tundivalangiligwa ishaliya kwalikulupililo, tunkuvanavo amani namu Nnungu kwaindila imwe UMU wetu Yesu Klistu.

²Kwaindila yake nae namomo wetu tundipata litala lyakwinjila kwalikulupililo muumonyo au watupagwa na tunkulitamangila mulilindilililo lyalishangelo lyake Nnungu.

³I gweka avyo kanji tunkulitamanga momo nkati mumauvilo tumanya kenga mauvilo ankwidanavo kulipililila,

⁴kulipililila kunkwidanavo umana kutwala umana kwidanavo lilindilililo.

⁵Mwenu, lilindilililo halinatutaa dyoni pakuva linagwaledyo lyake Nnungu lindimiminiligwa mmitima vyetu kwaindila ya Imumu Wanashwe wavatupele.

⁶Doni, wetu tùdabadabenge avi, muwakati wowo wo,[18] Klistu andipela kwamwaa wa avalá vákave Nnungu.

⁷Pandikamadyanga namene munu kupela kwamwaa wamunu waishaliya kwali inkuululika munu kujaa shingumi shake kwamwaa wamunu wambone

⁸kanji Nnungu kwetu wetu andilodya linagwaledyo lyake jo mwene, doni, wetu tùvele avi tuvakutega, Klistu andipela kwamwaa wetu wetu.

⁹Pakuva ambi apa napane tundivalangiligwa ishaliya kwaindila yamyadi vyake, kupunda namene kwaindila yake nae tundaambwalegwa mushitundi.

¹⁰Mwaa ikava kenga wetu patuvéle tuvammongo vanditutadya twigwanie namu Nnungu kwaindila yakupela kwa Mwanagwe, kupunda namene patwigwenie apa, tundaambwalegwa kwaindila yashingumi shake.

¹¹I gweka avyo, namomo tunkulitamangila Nnungu kwaindila imwe UMU wetu Yesu Klistu átutadidye ambi apa tupate kwigwania.

¹²Napavedoni, kulingana kenga mo mwaliinjilidile lidambi mushilambo shapai kwaindila yamunu jumo na kupela kwaindila yalidambi, napane momo kupela kwandavala kwavanu uti mwaa uti vanditega.

¹³Doni, lilamulo likanava kupagwa, mwiu lidambi lindípagwa mushilambo shapai kanji halishivalangiligwa lidambi pálikapagwite lilamulo.

¹⁴Kanji napane kupela kunditawala kutunduvangila kumwe Adamu mpaka Musha, ata kuvatawala avalá vákatagile kulingana na kupujungula kumwe Adamu e avéle inamuna imwe aijá álota kwida.

¹⁵Kanji napanelo hakunapagwa shinu kulinganianga inudyo na kupujungula mwaa ikava kenga vanu voe vandipela kwaindila yakupujungula kwamunu jumo, kupunda namene umonyo wake Nnungu na inudyo yo kwaindila yaumonyo wamunu jumo Yesu Klistu, indikumukanga kwavanu voe.

¹⁶Hayululika napane kulinganianga inudyo na ashilá shaalakadíle mulidambi lyamunu jumo mwaa ukumu yodananavo kupujungula kwamwanda umo indiidanavo kuukumigwa kanji inudyo yodananavo kupujungula kwamyanda vyoe indiidanavo kuvalangiligwa ishaliya.

¹⁷Napanelo ikava kenga kwamwaa wakupujungula kwamunu jumo kupela kunditawala kwaindila yamunu ajo, kupunda namene avalá vapáta kuumbaligwa kwaumonyo na inudyo yaishaliya, vanavo vandatawala mushingumi kwaindila yamunu jumo, Yesu Klistu.

¹⁸Nadoni nimumo momo kwaindila yakupujungula kwamwanda umo, kwavanu uti kundyumilila kuukumigwa, namomo kwaindila yashitendo shimo shaishaliya, kwavanu uti kundyumilila kuvalangiligwa ishaliya iidanavo shingumi.

¹⁹Mwaa nimumo momo kwaindila yaungaigwilila wamunu jumo, voe vanditadya kuva vakutega, namomo kwaindila yakwigwilila kwamunu jumo, voe vandatadya kuvalangiligwa ishaliya.

²⁰Mwenu, lilamulo lindida pakulota dashi, kupujungula kwanjadyeke. Napane po palyanjadyeke lidambi, umonyo undipakatika

²¹kwambangidya kenga mo mwalitawalidile lidambi nkati mukupela, namomo umonyo utawale nkati mwishaliya iidanavo shingumi shíkamalilika kwaindila imwe Yesu Klistu UMU wetu.