Read Ibibiliya mu Shimakonde Imbodi Yaambi na dimbande dya Imbodi Yakala Valoma 6 Bible Online

Valoma 6 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 6

¹Napanelo tuushidashi? Da tuke mushu tupagwa mulidambi kwambangidya umonyo wake Nnungu wanjadyeke?

²Ata padyoko vela! Wetu túpadile kwalidambi tulota kuka dashi mushu tunama nkati mulidambi?

³Kwali hamunamanya shinu kenga uti túpatile ubatisho nkati mumwe Klistu Yesu, da hatupatile ubatisho nkati mukupela kwake?

⁴Napavedoni wetu tundishikigwa pamo namu nae kwaindila yaubatisho utuukanavo kukupela kwambangidya kenga mo mwavandyuwididye Klistu pakati pavakupela kwaindila yalishangelo lya Tatamunu, nawetu momo tuname mushingumi shaambi.

⁵Doni, ikava kenga wetu tundyungana namu nae mukupela kulinganána na kupela kwake, mwiu nawetu momo tundaungana namu nae mukudyuka kulinganána na kudyuka kwake

⁶tumanya kenga umunu wetu wakala undipambililigwa pamo namu nae pakulota dashi, mili walidambi utimbikange kwambangidya hatunatandegwe kavili vatumwa validambi

⁷mwaa aijá ápadile vanimmalangilila ishaliya vàmuushidye mulidambi.

⁸Napane ikava kenga tundipela pamo namu Klistu, tunkukulupila do, namu nae tundanama

⁹tumanya kenga paukile ndadyuka Klistu pakati pavakupela, nae hapela kavili; kupela nae hakuntawala.

¹⁰Mwaa kupela kwake nae, apadilé kwalidambi mwanda umo tu bai kanji shingumi shanama nae, anama kwa Nnungu.

¹¹Nadoni namwenu momo livalangile kuva mmakupela kwalidambi kanji mmakunama kwa Nnungu nkati mumwe Klistu Yesu.

¹²Napavedoni hamunaleke lidambi lintawala mumili vyenu vipéla pakulota wo mili wo, hamunaigwilile ditamaa dyake.

¹³Hamunajaule dimbande dyenu dyamili kwalidambi kenga vikalelo vyaungave-shaliya kanji lijaule kwa Nnungu kenga mmanu wavantwete mukupela kuka mushingumi na jaula dimbande dyenu kwa Nnungu kenga vikalelo vyaishaliya.

¹⁴Mwenu, lidambi halintawala pakuva mwenu hamunatawaligwa shinu na lilamulo kanji munkutawaligwa na umonyo.

¹⁵Napanelo shakwashi? Da tutege pakuva hatunatawaligwa shinu na lilamulo kanji tunkutawaligwa na umonyo? Ata padyoko vela!

¹⁶Mwenu hamumanyite do, mukalijaula kwamunu kenga mmatumwa mmakwigwilila, mwiu mundava mmatumwa wamunu aju wamumwigwilila kwali kwalidambi liidanavo kupela kwali kwakwigwilila kwidanavo ishaliya.

¹⁷Kanji napane lilambwalalelo live kwa Nnungu, mwemwe mwe muvéle mmatumwa validambi mundyuka ndaigwilila na mitima vyenu mpano wamapundisho alalá avankamudidye.

¹⁸Mwenu mwàmbwalagwidye avi mulidambi, munditandegwa mmatumwa vaishaliya.

¹⁹Ngutangola kenga nimunu kwamwaa wakudabadabanga kwenu kwashimunu. Kulingana kenga mo mwamujaulidile dimbande dyenu muushapu na muungave-lilamulo vyuka kupunda ungave-lilamulo napane ambi jaula dimbande dyenu kenga vatumwa vaishaliya vauka kukwilimyanga.

²⁰Doni, pamuvéle mmatumwa validambi, mwenu muvele muunaiti kwaishaliya.

²¹Da mushipata vyepo shani wakati awo kwavinu vyamwanangila dyoni ambi apa? Mwaa kumwisho kwavinu avyo, kupela.

²²Kanji napane mwenu múukile ndaombolegwa mulidambi na kutandegwa mmatumwa vake Nnungu, vyepo vyamupata vyo vinkumuukanavo kukwilimyanga na kumwisho kwake ko, shingumi shíkamalilika.

²³Mwaa nshala walidambi ni kupela kanji inudyo ya Nnungu ni shingumi shíkamalilika nkati mumwe Klistu Yesu UMU wetu.