Read Ibibiliya mu Shimakonde Imbodi Yaambi na dimbande dya Imbodi Yakala Valoma 7 Bible Online

Valoma 7 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 7

¹Kwali mmanung'unumunu hamumanyite do, ngutangola namu mwenu mmanu múmanyite shana lilamulo, da hamumanyite kenga lilamulo linkuntawala munu po panama mushingumi?

²Mwenu, nkongwe álambwidye andyuungwa nkati mulilamulo ntwagwe àvele mushingumi kanji ntwagwe akapela, nkongwe ajo avelé muunaiti kwalilamulo lyashitamo.

³Nadoni ikava kenga nae andalombwa na nnume junji ntwagwe àvele mushingumi, andavalangiligwa kuva nkúlavalava. Kanji napane ntwagwe akapela, nae avelé muunaiti kwa alilá lilamulo. Nae akalombwa na nnume junji, havalangiligwa shinu kuva nkúlavalava.

⁴Nimumo momo mmanung'unumunu mwenu momo mundipela kwalilamulo kwaindila yamili umwe Klistu pakulota dashi, muve mmanu mmamunu junji aijá ádyukile pakati pavakupela kwambangidya tupe vyepo kumwe Nnungu.

⁵Mwaa patushinama mumavalelo etu ashimunumunu, ditamaa dyalidambi dikang'alegwa na lilamulo dishindakola madengo mudimbande dyetu dyamumili kwambangidya tupe vyepo vituúkanavo kukupela.

⁶Kanji napane vanditumya mulilamulo tùpadile kwa ashilá shíshitutenda kuva tuvatumwa pakulota tutumike kwainamuna yaambi ilangalalégwa na Imumu i kwainamuna yakala yalilamulo lyandikígwe.

⁷Napane tuushidashi? Da lilamulo lyo, lidambi? Ata padyoko vela! Ila leka likapagwite lilamulo, hangunamanye lidambi ni nyamani. Mwenu, nangu hangunamanye nyamani kung'unuka leka lilamulo likatangwele doni, “Haunang'unuke!”[19]

⁸Napanelo lidambi likatakela litala kwaindila yalilamulo lindikang'ela nkati mwangu kula inamuna yalung'unuku mwaa palyapukananga na lilamulo, lyanavo livelé mukupela.

⁹Nangu kala ngushinama ngwàpukanenge na lilamulo kanji palingwidilile lilamulo po, linditadya kudyuwangidya kavili lidambi kutwala nangu kupela.

¹⁰Napanelo ndyuka ndona kenga lilamulo livikíke ling'e shingumi, lyo lyene linding'a kupela.

¹¹Mwaa lidambi likatakela litala kwaindila yalilamulo, lininguduwanga na kwaindila yalilamulo, liningubyaa.

¹²Nadoni lilamulo ni lyakwilimyanga na shivéle mulilamulo ni shakwilimyanga, shaishaliya na shambone.

¹³Napane, da shambone sho shindijalukanga kwangu nangu kuva kupela? Ata padyoko vela! Kanji lidambi pakulota lililodye kuva lidambi, kwaindila ya ashilá she shivéle shambone, lyanavo lindiidanavo kupela nkati mwangu kwambangidya kwaindila yalilamulo, lyanavo lililodye ngala kuva shinu shakutega kupunda apo.

¹⁴Doni tundimanya kenga lilamulo lyàimumu ila nangu washimunumunu ngúshulushigwe mukutawaligwa na lidambi.

¹⁵Hangunamanya shinu shangutenda mwaa ashilá shangulota, hangunatenda shinu kanji ashilá shanguvangedya, shosho ni shangutenda.

¹⁶Napane ikava kenga ashilá shandikalota ninkutenda, bai ninkuungila nkono kenga lilamulo, lyambone.

¹⁷Nadoni hangunava shinu nangu ngútenda kanji ni lidambi lipágwa nkati mwangu

¹⁸mwaa ndimanya kenga hashipali shambone shipagwíte nkati mwangu yani mushimunu shangu. Doni, ashilá shililódya kuva shambone ninkulota ngutende kanji hangunaulula shinu kutenda

¹⁹mwaa aulá wambone wangulota ngutende hangunatenda shinu kanji ukalau wandikalota ngutende ni au wanguukanavo mushu ngutenda.

²⁰Mwenu, ikava kenga shandikalota nangu ninkutenda, bai hangunava shinu nangu ngútenda kanji ni lidambi lipagwíte nkati mwangu.

²¹Bai ndyanalela lilamulo ali: pangulota ngutandedye wambone, ukalau ngukadyedyanneu ùvele pepi namu nangu.

²²Mwenu, nkati muntima mwangu ninkupuwangila lilamulo lyake Nnungu

²³kanji mudimbande dyamumili mwangu ninkwona lilamulo linji litandána ing'ondo na alilá lilamulo lyamuding'anong'ano dyangu, lilamulo lyolyo lingutádya nguve nintumwa walilamulo lyalidambi livéle mudimbande dyamumili mwangu.

²⁴Ninkúva nangu mwenu! Nyani álota kunguposha na mili au wakupela?

²⁵Napane lilambwalalelo lipagwe kumwe Nnungu kwaindila imwe UMU wetu Yesu Klistu. Nadoni nene nimwene kwading'anong'ano dyangu ninkutumika lilamulo lyake Nnungu kanji kwashimunumunu, ninkutumika lilamulo lyalidambi.