Read Ibibiliya mu Shimakonde Imbodi Yaambi na dimbande dya Imbodi Yakala Valoma 9 Bible Online

Valoma 9 - Ibibiliya mu Shimakonde Imbodi Yaambi na dimbande dya Imbodi Yakala bible

Valoma 9

¹Ninkutangola mwiu nkati mumwe Klistu hangunashang'apa shinu, makumbukililo angu amuntima aumya ushuda kwangu nangu nkati mu Imumu Wanashwe

²kenga ninkuvanavo shipalodi shikumene na mauvilo ákamalilika muntima mwangu.

³Mwaa ndikandilota ata nene nimwene ngupate dilana na ngwapukanangenavo Klistu kwamwaa wavanung'unumunu vàvele vakwetu kwashimunu.

⁴Vanavo ni vanaishilaeli; vyavanavo ni kuva vanamunu, lishangelo, dimbodi, kupata kwalilamulo, kulipudya mwing'ande yake pamo na vyakulivikila.

⁵Kwavanavo vanyakalamunu vàve na kwashimunu ni kwálakadile aijá Klistu, aijá ávele pashanya pavinu uti, Nnungu átumbyangilika ngwengwe! Ame.

⁶Kanji napanelo i do lilove lyake Nnungu lindikoweka mwaa i uti udukulu umwe Ishilaeli ni vanaishilaeli,

⁷na ata i pakuva udukulu umwe Abulaamu vanavo uti vankuva vanavake kanji, “Kwaindila imwe Ishaki vandashamegwa kuva udukulu wako.”[22]

⁸Kwashitangodi shinji, i vana vashimunu ni vanavake Nnungu kanji ni vana vakulivikila vavalangilígwa muudukulu

⁹mwaa lilove lyakulivikila ni ali, “Muwakati wowo au mwakaluno ndaida kavili na Shalaa andavanavo mwana nnume.”[23]

¹⁰I avi gweka kanji Labeka momo paimite shitumbo shavana vavili na nnume jumo, tatagwetu Ishaki,

¹¹vana vo vakanava kuvalekwa na ata vakanava kutenda wambone kwali wakunyata, mwenu pakulota shabaa yake Nnungu yakutandola yuke mushu i kwamwaa washimadengo kanji kwamwaa umwe aijá áshema,

¹²nae vandímwaulila, “Nang'olo anantumika ndyoko.”[24]

¹³Kenga indyandikigwa, “Yakobo ninnagwaledya kanji ninnyatila Ishau.”[25]

¹⁴Napane tuushidashi? Da Nnungu jo ni waungave-shaliya? Ata padyoko vela!

¹⁵Mwaa nae animwaulila Musha doni, “Namwanangila shididi aijá waninnota nimwanangile shididi na nantanana aijá waninnota nintanane.”[26]

¹⁶Napavedoni, ashi shinkunanapela i kwa aijá álota kwali kwa aijá álikanyalidya kanji kwa aijá áanangila shididi, Nnungu.

¹⁷Mwenu, Maandiko andimwaulila Palao, “Ni ashi shingutadídye ndikukwedye wako kwambangidya dashi nkati mwako ngulodye dimongo dyangu na pakulota livalangangigwe lina lyangu mushilambo uti.”[27]

¹⁸Napavedoni aijá wannota nae, ankumwanangila shididi na aijá wannota nae, ankunnanopya ntima.

¹⁹Napane unangudya doni, “Mwaa shani Nnungu mpaka ambi ankutupa makosha? Da nyani álota kutaukanga malotelo ake?”

²⁰Leka apo, wako umunu unyani wakutaukananga namu Nnungu? Da inkuululika ashilá shavaumbile kutwala kumwaulila aijá áumbile doni, “Mwaa shani unguumbile doni?”

²¹Da nkúmba havenavo aki yaulongo, mulikamu lyolyo kumba shombo shaishima kwali shíkave ishima?

²²Napane ilota kuva dashi ikava kenga Nnungu palota kulilodya shitundi na palota dimongo dyake dimanyike andilipililila kwaupole kwa avilá vyombo vyamushitundi shake vyapanganienge kwambangidya dashi vibamalegwe

²³pakulota uumbala walishangelo lyake umanyike kwavyombo avilá vyamushididi shake vyapanganienge kaladavo kwalishangelo,

²⁴ata mpaka wetu momo túshamagwidye i gweka pakati pavayuda kanji namomo pakati pavamidi.

²⁵Amu ni kenga mwatangaladile nkati mu Osheya: “Avalá vákavele venentete vangu, ndavashema ‘venentete vangu,’ na aijá ákavele wakunagwaleka, nanshema ‘wakunagwaleka’ ”[28]

²⁶na “Apalá pavavaulidile doni, ‘Hamunava shinu mmenentete vangu,’ popo po, vandavashema ‘vanavake Nnungu mumi.’ ”[29]

²⁷Namomo Ishaiya ankutangola pashanya po kwamwaa wavanaishilaeli, “Ata ikava kenga shikonda shavanaishilaeli shinkuva kenga dimbwe dyamwimanga, vakwijalila tu ni valóta kwambolegwa

²⁸mwaa UMU andatandedya ukumu yake uti mushilambo kwabila kutimatimanga.”[30]

²⁹Kenga mwatangaladile Ishaiya kaladavo, “Leka UMU Wavaing'ondo akatulakadile udukulu, doni tùvele kenga Shodoma na tùlinganene kenga Gomola.”

³⁰Napane tuushidashi? Doni vamidi vákashivingilidya kuvalangiligwa ishaliya vandipata kuvalangiligwa ishaliya, ishaliya yoyo yalakéla kwaindila yalikulupililo

³¹kanji vanaishilaeli váshoodedya lilamulo pakulota vavalangiligwe ishaliya, havapatile.

³²Mwaa wanyamani? Mwaa havashoodedya kwalikulupililo kanji vashoodedya kenga paikavéle kwashimadengo. Vanavo vandilikuvala mulijanga lyakulikuvala.

³³Kenga mwatangalela Maandiko, “Mwenu, nangu ninkuvika pa Shiyau lijanga lyakulikuvala lijanga lyo lyakutaa shitundi; aijá álota kukulupila, mwiko hatutala.”[31]