Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 11 Bible Online

I Vakolintu 11 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 11

¹Ngujedya nangu kenga nangu mwaninjadyedya Klistu.

²Napanelo nintumbyanga mwenu pakuva munkungukumbukila muvinu uti, namomo munkukamulila mavalelo mo mwanimpalakadyadidye.

³Napane ninkulota mumanye kenga muti wakula nnume ni Klistu, muti wankongwe ni nnume[25] na muti umwe Klistu ni Nnungu.

⁴Kula nnume áshwali kwali álava akuno àinikididye muti wake, ajo ankutaa dyoni aulá muti wake.

⁵Napane kula nkongwe áshwali kwali álava bila kwinikidya muti wake, ajo ankutaa dyoni aulá muti wake. Mwaa nimumo momo kenga ugwimbu andibubula.

⁶Doni, ikava kenga nkongwe muti wake hainikidya inimmaikila ashingule ugwimbu. Kanji napane pakuva ni shinu shadyoni kwankongwe kushingula ugwimbu kwali kububula, bai inimmaikila ainikidye muti wake.

⁷Doni, nnume haimmaikidile ainikidye muti wake pakuva ni ing'ope na lishangelo lyake Nnungu kanji nkongwe ni lishangelo lyake nnume.

⁸Mwaa nnume haalakadile munkongwe kanji nkongwe ni áalakadile munnume

⁹na ata nnume hakandyangigwe kwamwaa wankongwe kanji nkongwe kwamwaa wannume.

¹⁰Kwamwaa au nkongwe inimmaikila avenavo madalaka pamuti pake kwamwaa wavanjelo.

¹¹Kanji napane nkati mumwe UMU nkongwe i shinu bila nnume na ata nnume i shinu bila nkongwe.

¹²Mwaa, nimumo momo nkongwe àalakadile munnume na nnume kwaindila yankongwe. Napane uti vinkwalakela kumwe Nnungu.

¹³Amuwa mwemwe mmene, da shindivaikila nkongwe ashwali pamevo pa Nnungu bila kwinikidya muti?

¹⁴Da ata maumbile avinu hanampundisha shinu kenga nnume akalanga ugwimbu ni shinu shadyoni kwake nae

¹⁵kanji nkongwe akalanga ugwimbu, kwake nae ni lishangelo? Mwaa ugwimbu vandimupa kenga shinu shakuliinikidya.

¹⁶Napanelo ikava kenga munu andavanavo mitau kwaing'ano ai, wetu nkati mo hatupali na ata maganisha ake Nnungu momo.

¹⁷Napanelo mumalailililo ala angulota kumupa mwiko haninantumbyanga shinu mwaa pamukadyanianga mwenu hainava shinu yakutenda vyambone kanji vyakunyata.

¹⁸Mwenu, shitandi ninkwigwa doni, pamukadyania kenga liganisha, pakati penu kunkupagwa kupambulananga. Kwaupande unji nangu ninkukulupila

¹⁹mwaa indivaikila vipagwe vipinga pakati penu pakulota vakukubaligwa pakati penu vamanyike.

²⁰Pamukadyanianga lyutu limo hashinava shinu shikukulu shimwe UMU shamulya

²¹mwaa mukulya, kula munu ankulya gweka; junji àvele na indala, junji àambalwidye.

²²Da hamuve ding'ande divaikidíle mulye na mukumbile? Kwali munkwiludyanga liganisha lya Nnungu na kuvataa dyoni avalá vákave pashinu? Da nimwaulile nyamani? Nangu nintumbyange? Mene, kwaing'ano ai ninantumbyanga shinu!

²³Mwaa ngupatilé kumwe UMU ashilá shanimpalakadyadidye momo doni, UMU Yesu ushilo aulá waukile ndalimigwa, andítwala ligung'u

²⁴na ling'oto lyakulambwalela, kumeja kutwala kushidoni, “Au ni mili wangu kwamwaa wenu mwenu, tenda doni kenga kumbukumbu yangu nangu.”

²⁵Nimumo momo ling'oto lyakulya andítwala shikombe kutwala kushidoni, “Ashi ni shikombe shaimbodi yaambi mumyadi vyangu; kula wakati pamutenda, kumbilila shanavo kenga kumbukumbu yangu nangu.”

²⁶Mwaa ngwengwe pamulya ligung'u ali na kukumbilila shikombe ashi, munkuvalanganga kupela kumwe UMU mpaka palota kwida.

²⁷Nadoni aijá álota kulya ligung'u kwali kukumbilila shikombe shimwe UMU múkavaikidile, nae ankuva wamakosha wamili na wamyadi vimwe UMU.

²⁸Napavedoni kula munu alilalyange jo mwene ling'oto alye ligung'u na akumbilile shikombe.

²⁹Mwaa aijá álya na ákumbila mene kumanya mili umwe UMU, ankulya na kukumbila ukumu kwake jo mwene.

³⁰Ni ashi shitádya pakati penu voe vave vakudabadabanga, valwele na vanji, vandipela.

³¹Kanji leka wetu tulilalyange wewe tuvene, hatunapate ukumu.

³²Napane patuukumigwa namu UMU, tunkudumigwa pakulota hatunaukumigwe pamo na shilambo.

³³Napavedoni mmanung'unuvangu, pamukadyania pakulota mulye, lindana.

³⁴Ikava kenga munu ininkola indala, alye kwing'ande kwake kwambangidya pamulota kukadyanianga po, hakunaidenavo ukumu. Napane vibakidíle vyo, ndalingula pangulota kwida.