Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 12 Bible Online

I Vakolintu 12 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 12

¹Napanelo kwaing'ano yavyajo vyaimumu mmanung'unumunu, hangulatile muve mmakutikinanga.

²Mundimanya shana kenga pamukashimmanya Nnungu vandimwashadyanga kwavakushang'apa vabubu, mwavantwalidile mo hangumanyite.

³Nadoni ninkumwaulila mwenu doni, hapali wakutangola alangalalegwa kwa Imumu wake Nnungu aashidoni, “Yesu alaanike,” na hapali wakuulula kushidoni, “Yesu ni UMU,” pakalangalalegwa kwa Imumu Wanashwe.

⁴Kunkupagwa napane kuvilingananga kwavyajo kanji Imumu jojo.

⁵Kunkupagwa kuvilingananga kwakutumika kanji UMU jojo.

⁶Kunkupagwa kuvilingananga kwamakaledi kanji Nnungu jojo átandedya uti muuti.

⁷Kwakula munu vankumupa kulilodya kwa Imumu kwapaida yavanu uti.

⁸Mwaa kwamunu jumo kwaindila ya Imumu, vankumupa lilove lyalimanyilo, junji kumupa lilove lyaumanyimanyi kwodananavo Imumu jojo,

⁹junji kwa Imumu jojo kumupa likulupililo, junji kumupa shajo shakuponia kwa Imumu jumo

¹⁰junji kutandedya vyamakango, junji kulava, junji kupambula dimumu, junji dinangodi dyakuvilingananga na junji kuvalangangila dinangodi.

¹¹Vinu avi uti vinkutandeka namu Imumu jumo jojo ánjavila kula munu shigweka-gweka kwodananavo amulá mwalatela nae.

¹²Doni, kenga mo mwauvalalele mili umo na wanavo unkuvanavo dimbandi dyoe na dimbandi adyo ata dikava dyoe, dyanavo dinkuva mili umo, nimumo momo mwaivalalele kumwe Klistu.

¹³Mwaa mu Imumu jumo tundibatishwa nkati mumili umo, vayuda kwali vamidi, vatumwa kwali vamuunaiti, na uti wetu tundyuka nankumbila Imumu jumo.

¹⁴Mwenu, mili haunava imbandi imo kanji dyoe.

¹⁵Leka lidodo litedoni, “Pakuva hangunava shinu nkono, bai hangunava shinu wamumili,” asho hashinatadya shinu lileke yakuva imbandi yamumili.

¹⁶Leka lyatu litedoni, “Pakuva hangunava shinu liu, bai hangunava shinu wamumili,” asho hashinatadya shinu lileke yakuva imbandi yamumili.

¹⁷Leka mili uti ùvele liu, kwigwa ko kukaikele pashi? Leka mili uti ùvele kwigwa, kujambula ko kukaikele pashi?

¹⁸Kanji napane Nnungu andivika dimbandi adyo, kula imo pakati pa adyo mumili kenga mwalatalele jo mwene.

¹⁹Leka dimbandi uti dìvele imbandi imo, mili wo ukavele pashi?

²⁰Kanji napane, dimbandi divelé dyoe kanji mili uvelé umo.

²¹Liu halyulula kumwaulila nkono doni, “Wako handikutamwa,” na kavili muti haulula kwaulila madodo doni, “Mwenu hanintamwa!”

²²Leka apo, dimbandi dyamili dyaneka kuva dyakudabadabanga namene ni dyodyo divénavo mana.

²³Dimbandi dyamumili dyatukumbukila kenga dindinyambikanga ni dyodyo dyatutanana namene. Dimbandi dyatwona kuva dyadyoni, adyo tunkwishimu namene.

²⁴Mwaa avilá vyatwona wetu kuva vyakuvaikila vyanéka, havinatakigwa shinu kutananigwa. Kanji Nnungu andipanga mili aing'a ishima ing'umene kwadimbandi adilá díkashishimika

²⁵kwambangidya hakunapagwe kupambuligwa mumili kanji dishungane mumo momo.

²⁶Imbandi imo ikauvauvanga, dinji dyo nadyanavo dyuvauvange kwali imbandi inji ikaishimika, dinji dyo nadyanavo dipuwange.

²⁷Mwenu napane ni mili umwe Klistu na imbandi kwaimbandimwagwe.

²⁸Ivédoni, muliganisha Nnungu andivavika shitandi vamyombe, shambili vakulava, shantatu vamwalimu kwatika vatandédya vyamakango, vavénavo vyajo vyakuponia, vyakupwashela, vyakulangalalela na vyadinangodi dyakuvilingananga.

²⁹Da uti ni vamyombe? Uti ni vakulava? Uti ni vamwalimu? Uti ni vaténda vyamakango?

³⁰Da ni uti vavénavo vyajo vyakuponia? Ni uti vatangóla dinangodi? Ni uti vavalangangíla?

³¹Kanji napane avanavo malotelo amuntima avyajo vikumene. Napanelo nannodya indila yambone namene-uti.