Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 13 Bible Online

I Vakolintu 13 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 13

¹Ndikatangola shitangodi shavanu na shavanjelo kanji ndikanavanavo linagwaledyo, ninkuva shitali shúma kwali shombo shinyakónya.

²Ndikavanavo kulava na kumanya vipii uti na umanyimanyi uti, ndikavanavo likulupililo uti pakulota ngushe mashinga kanji ndikanavanavo linagwaledyo, hangunava shinu.

³Ndikaumya uti vyanguvenavo na ndikajaula mili wangu pakulota vatae moto kanji ndikanavanavo linagwaledyo, hashipali shangupata.

⁴Linagwaledyo ni kulipililila, linagwaledyo ni kutanana. Linagwaledyo halive ing'ou, halinalitumbyanga, halinalyona,

⁵halinava lijinga, halinalambela vyake jo mwene, halinashimwa, halinakondya vyakunyata,

⁶halinapuwangila ungave-shaliya kanji lipuwangila umwiu.

⁷Lindáshikulila uti,[26] lindákulupila uti, lindálindililila uti, lindálipililila uti.

⁸Linagwaledyo halive mwisho. Kwavyakulava, vindapita; kwadinangodi, dindamalilika; kwalimanyilo, lindapita.

⁹Mwaa kwaupande padyoko, tunkumanya na kwaupande padyoko, tunkulava

¹⁰kanji pashilota kuwika ashilá shilinganéne,[27] ashilá shíkalinganene sho, shindapita.

¹¹Panguvéle nindyoko, ngushitangola kenga nindyoko, ngushikumbukila kenga nindyoko, ngushimanya kenga nindyoko. Panguvele ninang'olo apa, vyashidyoko uti, ndileka.

¹²Mwenu, ambi tunkwona vila mushilolo kwakudingala kanji mushu mo, tundona mevo kwamevo. Ambi ninkumanya padyoko kanji mushu mo, ndamanya uti kenga mo mwangumanyikila nangu.

¹³Napanelo linkupagwa likulupililo, lilindilililo na linagwaledyo, vinu vitatu kanji avi uti shikumene ni linagwaledyo.