Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 14 Bible Online

I Vakolintu 14 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 14

¹Vingilidya linagwaledyo na avanavo malotelo amuntima mupate vyajo vyaimumu kanji namene pakulota mulave.

²Mwaa aijá átangola inangodi yaambi, ajo ankutangola i na vanu kanji namu Nnungu. Doni, malove alo hapali ámanya; nae ankutangola nkati mwimumu vinu vilipiídye.

³Napane aijá álava, atangola na vanu kwamwaa wakuvadenga, kuvapa ntima shii na kuvapambadyanga.

⁴Aijá átangola inangodi yaambi, alidenga jo mwene kanji aijá álava jo, adenga liganisha.

⁵Ngushindalota mwenu uti mutangole dinangodi dyaambi kanji kupunda namene mulave. Mwaa aijá álava ni ávenavo mana kuliko aijá átangola dinangodi dyaambi kwali apagwe wakuvalangangila kwambangidya liganisha, lidangegwe.

⁶Napanelo mmanung'unumunu, ikava kenga nangu ndaida kwenu kutwala kutangola inangodi yaambi, ngulota kumupa paida shani ndikanaidanavo maono kwali limanyilo kwali lilavilo kwali lipundisho?

⁷Ikava kenga ata vinu víkave shingumi vyúmya madi kenga shinanda kwali ibangu, vakanapanga shana madi, munu alota kujavanianga dashi ashilá shavomba mushinanda kwali shavomba mwibangu?

⁸Lipalapanda likanaumya lidi lyakumanyika, nyani álota kulipangania kwaing'ondo?

⁹Nimumo momo kwenu mwenu; mukatangola malove ákaigwinika, nyani álota kumanya shitangaléka? Mwenu mulota kutangalela vila imepo.

¹⁰Bila kwambambidya, dinkupagwa dinangodi dyoe mushilambo amu na dinangodi adyo, haipali ata imo íkave mana.

¹¹Kanji napane ndikanamanya mana ashitangodi asho, nangu nindava nimmidi kumwe aijá átangola na nae andava mmidi kwangu nangu.

¹²Nimumo momo kwenu mwenu; pakuva mwenu munkuvanavo dukuduku yakupata vinu vyaimumu, bai avanavo dukuduku yakudangela liganisha.

¹³Napavedoni, aijá átangola inangodi yaambi, inimmaikila ashwali apate lyululilo lyakuvalangangilila.

¹⁴Mwaa ndikashwali mwinangodi yaambi, imumu yangu ni ishwáli kanji ding'ano dyangu hadinavanavo shinu vyepo.

¹⁵Napane ngutende dashi? Ndashwali kwaimumu kanji namomo ndashwali kwading'ano; ndaimba kwaimumu kanji namomo ndaimba kwading'ano.

¹⁶Ikanavadavo, wako untumbyanga Nnungu kwaimumu, napane ilota kuva dashi kumwe aijá ávele muungapundishigwa kwitikila, “Ame” ajang'ula kulambwalela kwako na nae akamanyite ashilá shautangola?

¹⁷Mwaa inkuululika wako unkulambwalela shana kanji junji jo, hanadangegwa shinu.

¹⁸Ninkunnambwalela Nnungu kwamwaa wakutangola dinangodi kuliko mwenu uti.

¹⁹Kanji muliganisha kudyanga ngutangole malove mwanu kwading'ano dyangu kwambangidya ndivapundishe vanji kuliko kutangola malove alupu mwinangodi yaambi.

²⁰Mmanung'unumunu, hamunave mmana mmadikidiki mumakumbukililo enu. Ava mmana mmadikidiki muvyakunyata kanji mumakumbukililo, ava mmanang'olo.

²¹Mulilamulo indyandikigwa doni, “Kwaindila yavanu vadinangodi dinji na kwadindomo dyavanu vanji, ndatangola na venentete ava kanji ata ivedavo, havangwigwilila, atangola UMU.”[28]

²²Nadoni dinangodi dyaambi ni shimanyikilo i kwavakukulupila kanji kwavakakulupila. Napane kulava ni shimanyikilo i kwavakakulupila kanji kwavakukulupila.

²³Napavedoni, ikava kenga liganisha uti lindakadyania kutwala uti kutangola dinangodi dyambi, napane mo nkati mo kwinjila vanu vákapundishigwe kwali vákakulupila, da havatangola doni, mwenu po munkudulumbuka?

²⁴Kanji napane ikava kenga uti munkulava kutwala kwinjila munu ákakulupila kwali ákapundishigwe, andalyanalela kwauti, andaukumigwa kwauti,

²⁵shipii shamuntima mwake shindaundukuka kutwala kuunama kulipudya Nnungu aashidoni, “Mwiu, Nnungu ankupagwa pakati penu!”

²⁶Da ivé dashi mmanung'unumunu? Pamukadyanianga, kula munu ankuvanavo lwimu kwali kuvanavo lipundisho kwali kuvanavo maono kwali kuvanavo inangodi yaambi kwali kuvanavo kuvalangangilila; uti avi vive vyakudenga.

²⁷Akapagwa wakutangola inangodi yaambi, inkuulukika vave vavili kwali pandimamodya vatatu, kula munu na wakati wake, namomo apagwe wakuvalangangilila.

²⁸Akanapagwa wakuvalangangilila, bai alimaladye muliganisha; atangole jo mwene shintimatima atangola na Nnungu.

²⁹Vakulava vavili kwali vatatu vatangole, vanji vo valalyange ashilá shitangaléka.

³⁰Akapagwa ápatile maono àikele, ntandi jo, amalale.

³¹Mwaa uti mwenu munkuulula kulava jumo jumo kwambangidya uti mulipundishe na munonowangike.

³²Dimumu dyavakulava dinkulalyangigwa na vo vene vakulava.

³³Mwaa Nnungu hanava shinu Nnungu wampulugu kanji ni waamani. Kwakulinganana kenga mo mwaivalalele mmaganisha uti avakwilimyanga vake Nnungu,

³⁴vakongwe indivavaikila valimaladye muliganisha. Havave lilamulo lyakutangola kanji valivike mwina kenga momo mwalitangalela lilamulo.

³⁵Ikava kenga vankulota vaudye shinu, vakavaudye vatavave kuding'ande dyave mwaa ni shinu shadyoni kwavakongwe kutangola muliganisha.

³⁶Da lilove lyake Nnungu lipandukenge kwenu? Kwali limwididile mwenu gweka yenu?

³⁷Ikava kenga munu ankulyona kuva nkúlava kwali kulyona kuva waimumu, amanye kenga vyanimwandikila avi, ni lilamulo lyake UMU.

³⁸Kanji munu akatikinanga vinu avi, nanae momo vanantikinanga.

³⁹Napavedoni mmanung'unumunu, avanavo malotelo amuntima pakulota mulave na hamunanneye munu kutangola inangodi yaambi.

⁴⁰Kanji uti indivaikila vitandeke kwaishima na kulipanga.