Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 15 Bible Online

I Vakolintu 15 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 15

¹Napane ninkulota ninkumbuwange mmanung'unumunu ntenga wambone aulá wanimmalangangidile, wamupwashaladile, wo wamupagwa mwenu

²na kwaindila yawanavo mundaambolegwa ikava kenga munkukamulila lilove alilá lyanimmalangangidile, ikanava kenga mukulupidilé monyo.

³Mwaa nangu nimpalakadyedya kenga shinu shitandi shamana ashilá shangupatile nangu momo: doni, Klistu andipela kwamwaa wamadambi etu kwodananavo Maandiko;

⁴doni, nae vaninshika; doni, nae vanindyuwa muliduva lyantatu kwodananavo Maandiko;

⁵doni, andimuumilila Kepashi ling'oto kuvaumilila vamyombe avalá kumi na mbili.

⁶Kutwala apo, kuvaumilila vanung'unumunu vakupunda vanu dimiya mwanu kwamwanda umo, vanji pakati pave voe vankupagwa mushingumi mpaka ambi kanji vanji vo, vandipela.

⁷Kutwala apo, kumuumilila Tiyagu ling'oto kuvaumilila vamyombe uti.

⁸Kumwisho kwake ko, kenga kwamunu ávalakwadidye wakati úkavaikidile kutwala kunguumilila nangu.

⁹Mwaa nangu nindikidiki namene pakati pavamyombe na ata hanguvaikidile kushamegwa myombe mwaa ndipapata liganisha lyake Nnungu.

¹⁰Kanji kwaumonyo wake nae nguvelé kenga mo mwanguvalalele na umonyo wake kwangu nangu haunava shinu wabule. Leka apo, nangu nditenda madengo kuvapunda vanavo uti ila hangunava shinu nangu kanji umonyo wake Nnungu uvéle nkati mwangu.

¹¹Napavedoni kwali nangu kwali vanavo, amu ni mwatuvalangangila na amu ni mwamukulupilila.

¹²Mwenu, ikava kenga Klistu ankuvalangangigwa kudyuka mukupela, napane mwaa shani vanji pakati penu vankushidoni, hakupali kudyuka kwavakupela?

¹³Kukanapagwa kudyuka kwavakupela, ata jo Klistu hadyukile.

¹⁴Napane akanadyuka Klistu, bai kuvalanganga kwetu, kwabule na kukulupila kwenu ko, kwabule.

¹⁵Kupunda apo, tundaaneka kuva tuvashuda vakushang'apa kwake Nnungu mwaa tunkumya ushuda kwaupande wake Nnungu kenga anindyuwa Klistu kumbe akandyuwidye ikava kenga vakupela havanadyuka.

¹⁶Mwaa ikava kenga vakupela havanadyuka, ata jo Klistu hadyukile.

¹⁷Napane Klistu akanadyuka, likulupililo lyamuvenavo mwenu lyo, lyabule; mpaka ambi munkupagwa mumadambi enu.

¹⁸Namomo avalá vapadíle nkati mumwe Klistu, vandijaika.

¹⁹Ikava kenga tunkuvanavo lilindilililo nkati mumwe Klistu mushingumi shosho ashi tu bai, wetu ni tuvanu túvaikidile twanangiligwe shididi kuliko vanu uti.

²⁰Kanji napanelo Klistu mwiu andidyuka mukupela; jojo jo kuva shepo shitandi pakati pa avalá valéle.

²¹Doni, kwoda kupela kundida kwaindila yamunu, kudyuka kwavakupela kundida momo kwaindila yamunu.

²²Doni, pakuva kwakuungana namu Adamu uti vankupela, namomo kwakuungana namu Klistu uti vandapata shingumi.

²³Kanji kwakula munu na mwanda wake: Klistu kuva shepo shitandi, ling'oto kwatika vamwe Klistu mukwida kwake.

²⁴Kutwala apo, undawika mwisho muwakati walota Klistu kunkamudya Tatamunu Nnungu utawala ling'oto lyakumalidya utawala uti, madalaka na dimongo uti.

²⁵Mwaa indivaikila Klistu atawale mpaka avavike vamongo vake uti kumaulu kwake.

²⁶Mmongo wamwisho kubamolegwa alota kuva kupela.

²⁷Mwaa nae, “vinu uti, andivika kumaulu kwake.”[29] Mwenu, paitangaleke doni, “uti andivika kumaulu kwake,” inkumanyika ngala doni, hanalyanganianga shinu na jo mwene Nnungu ávikile uti kumaulu kwake.

²⁸Napanelo pavilota kuvikigwa uti kumaulu kwake, bai jo mwene Mwana andavikigwa kumaulu kumwe aijá ávikile uti kwake nae kwambangidya Nnungu ave uti muuti.

²⁹Napane kukanapagwa kudyuka pakati pavakupela, kushi avalá vapáta ubatisho kwamwaa wavakupela? Ikava kenga mwiu vakupela havanadyuka, mwaa shani vankupata ubatisho yavanavo?

³⁰Namomo mwaa shani wetu tunkupagwa mushijoidyo kula wakati?

³¹Kula liduva ninkupela! Mmanung'unumunu, ninkutangola avi kwakulyona kwangu kwenu mwenu kwanguvenavo nkati mumwe Klistu Yesu UMU wetu.

³²Ding'ondo adilá dyangutandene na vakoko vakujowa ku Epeshu, leka dìvele kwashabaa yashimunumunu, ndikapatile nyamani? Ikava kenga vakupela havanadyuka, “Leka tulye na tukumbile mwaa lunduno tundapela.”[30]

³³Hamunaduwangike, “Unyagwe wakunyata undátimbanga mavalelo ambone.”

³⁴Ujila kuding'anong'ano dyenu, nama kwaishaliya[31] na leka kutega mwaa vanji havammanyite Nnungu ata padyoko vela. Ninkutangola avi kwadyoni dyenu.

³⁵Kanji junji andaudya, “Da vakupela vadyuka dashi? Valota kuvanavo mili shani?”

³⁶Unjinga gwe! Ashilá shaupanda wako hashivanavo shingumi shikanapela.

³⁷Ashilá shaupanda i mili ulóta kupagwa kanji ni imbeju vila kwali yangano kwali yavyepo vinji.

³⁸Kanji Nnungu ankwing'a imbeju mili walota jo mwene na kula imbeju ankwing'a mili wake.

³⁹Mili havinalinganana shinu; upali mili wamunu, kupagwa mili unji wanyama, mili unji wavyuni, unji wadyomba.

⁴⁰Napanelo vinkupagwa mili vyakuwa na kupagwa mili vyamushilambo kanji lishangelo lyamili wakuwa, linji na lishangelo lyamili wamushilambo, linji.

⁴¹Kupagwa lishangelo lyaliduva, lishangelo linji lyamwedi, lishangelo linji lyadinondo na lishangelo lyainondo imo linkuvilingananga na lyainondo inji.

⁴²Amu ni mwaivalalele kudyuka kwavakupela. Shipandígwa ashi ni shakulambaleka; shidyúka sho ni shíkalambaleka.

⁴³Shipandigwa mukunyambikanga; kutakatuwa mulishangelo. Shipandigwa mukudabadabanga; kutakatuwa mudimongo.

⁴⁴Upandigwa mili washivalakwelo; kutakatuwa mili waimumu. Ikava kenga unkupagwa mili washivalakwelo, namomo unkupagwa mili waimumu.

⁴⁵Kenga indyandikigwa, “Munu ntandi Adamu nae andyuka ndava ungumi unáma”;[32] Adamu wamwisho aju, nae andyuka ndava imumu íng'a shingumi.

⁴⁶Kanji napanelo, ntandi kwida hanava shinu waimumu ila washivalakwelo; ling'oto kwida aijá waimumu.

⁴⁷Munu ntandi aalakadilé pai àvele ulongo; munu wambili nae aalakadilé kuwa.

⁴⁸Kenga mo mwavalaléle aijá wamuulongo, amu ni mwavavalalele vamuulongo; kenga mo mwavalalele aijá wakuwa, amu ni mwavavalalele vakuwa.

⁴⁹Kenga mo mwatulitikila ing'ope yawaulongo, namomo tundalitika ing'ope yawakuwa.

⁵⁰Napanelo ninkushidoni mmanung'unumunu, mili na myadi havyulula kupata kenga maleko utawala wa Nnungu na ashilá shilambaléka hashuulula kupata ungalambaleka.

⁵¹Mwenu, nimwaulila shipii i uti tundalala ila wetu uti tundajaluwangigwa,

⁵²muwakati umo tu, kulola na kuunidya palilota kuma lipalapanda lyamwisho. Mwaa lipalapanda lindauma, vakupela vandavadyuwa kuva vákapela na wetu tundajaluwangigwa.

⁵³Doni, mili au wakulambaleka uligwadye ungalambaleka; mili au wakupela uligwadye ungapela.

⁵⁴Napanelo wakulambaleka paulota kuligwadya ungalambaleka na wakupela paulota kuligwadya ungapela, apo ni palilota kuwikila popo lilove lyandikígwe, “Kupela andimiligwa mukutema.”[33]

⁵⁵“Kupela gwe, kutema kwako ko kuvelé pashi? Kupela gwe, ishumu yako yo ivelé pashi?”[34]

⁵⁶Mwenu, ishumu imwe kupela, lidambi na dimongo dimwe lidambi, lilamulo.

⁵⁷Kanji lilambwalalelo lipagwe kwa Nnungu átwing'a kutema kwaindila imwe UMU wetu Yesu Klistu.

⁵⁸Napavedoni mmanung'unumunu mmakunagwaleka, nanopa na hamunajagajege ngwengwe muumbaligwidye shimadengo shimwe UMU mumanya kenga nkati mwake UMU shimadengo shenu hashinava shinu shabule.