Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 16 Bible Online

I Vakolintu 16 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 16

¹Napanelo kwaing'ano yamishango kwavakwilimyanga, kenga mo mwangulamulidile maganisha a ku Galata, namwenu momo tenda.

²Muliduva litandi lyaishumana, kula munu pakati penu inimmaikila aapule isemu imo akondye kulingana na ashilá shapata pakulota hamunatende nshango wakati nangu ngùwikile.

³Napanelo muwakati wangulota kuwika, avalá vamulota kuvaungila nkono, nangu ndavatumidya na ibalugwa kwambangidya vapalakedye inudyo yenu ku Yelusalemu.

⁴Ikava kenga indavaikila nanangu momo kuka, bai vanangupalakela.

⁵Ndaida nannola mwenu ling'oto lyakupitila ku Makedoniya mwaa ndapitila kwanavo,

⁶nakapanji ndaikala namu mwenu kwali ata mpaka kupita shipwepwe kwambangidya mwenu mutadye nguke kwoekwoe kwangulota kuka.

⁷Mwaa hainangunagwela shinu kumwona mwenu ngupita vila. Ninkulindila ngwikale namu mwenu wakati wakudyangangila ikava kenga UMU anangupa litala.

⁸Kanji ndapagwa apa pa Epeshu mpaka pa Pentekoste

⁹pakuva nnango ukumene vaningushimulila pakulota ngutende madengo apaida na vammongo vangu vavelé voe.

¹⁰Paida Timoti po, mwenu ntadye nae aligwe shana pakati penu mwaa jojo jo, ankukola madengo ake UMU kenga nene.

¹¹Napavedoni, hanapagwe wakumwiludyanga. Mpwashele mushimwanda shake kwaamani pakulota aujile kwangu nangu mwaa nangu pamo na vanung'unumunu, tunkunnindila.

¹²Kwaupande umwe nung'unumunu Apolu, ninnaililila namene pakulota aide kwenu pamo na vanung'unumunu vanji napane haivéle yamalotelo ake ambi apa. Andaida ako palota kupata litala.

¹³Ava mevo, nanopa mulikulupililo, ava mmakulishiya na mmadimongo.

¹⁴Uti vyamutenda, tenda kwalinagwaledyo.

¹⁵Napane ninkunnaililila mmanung'unumunu, mwenu mundimanya shana kenga unalikola umwe Eshitepanashi, vanavo ni vyepo vitandi ku Akaya na vandilijaula mukuvatumika vakwilimyanga.

¹⁶Doni, livike mwina mwavanu kenga ava na kula mmádengomwave ákola shimadengo shakupwateka.

¹⁷Ndipuwanga kuwika kumwe Eshitepanashi, Polutunato namu Akaiko mwaa vandidiva lyutu livéle mwandwa kwenu mwenu.

¹⁸Vanavo vandipambadyanga ntima wangu namomo mitima vyenu. Nadoni vaishimu vanu kenga ava.

¹⁹Maganisha uti a ku Ashiya, ankuntumidya nandele. Akila namu Pilishila pamo na liganisha likadyaniánga paing'ande pave, vankuntumidya nandele wadimongo nkati mumwe UMU.

²⁰Vanung'unumunu uti vankuntumidya nandele. Mwenu udyanianga kwashimanyikilo shalinagwaledyo.

²¹Nangu Paulu, ninkuntumidya nandele aju ngwandika na nkono wangu nimwene.

²²Ikava kenga munu hanannagwaledya shinu UMU Yesu Klistu, apate dilana! UMU wetu, ida!

²³Umonyo umwe UMU Yesu upagwe namu mwenu.

²⁴Linagwaledyo lyangu lipagwe namu mwenu uti nkati mumwe Klistu Yesu. Ame.