Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 2 Bible Online

I Vakolintu 2 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 2

¹Mmanung'unumunu, nangu pangwidile kwenu hanimmalangangidile ushuda wa Nnungu[4] kwashitangodi shakumanyangila kwali shalimanyilo.

²Mwaa ndyámuwa namanye shoeshoe pakati penu ila Yesu Klistu na yakukamalalegwa panshalaba.

³Doni, nangu panguvéle namu mwenu nguvele mukudabadabanga, mukujopa na mukutatamela kukumene.

⁴Malove angu na kuvalanganga kwangu hakuvéle kwamalove akuutila kwalimanyilo kanji kwakulilodya kwa Imumu na kwadimongo

⁵kwambangidya likulupililo lyenu halinananapele mulimanyilo lyavanu kanji mudimongo dya Nnungu.

⁶Kanji napane pakati pa avalá vakaméle, limanyilo tundátangola ata likanava limanyilo lyawakati au kwali lyavakutawala vawakati au vo vapagwíte nkati mukulambaleka.

⁷Leka apo, tundátangola limanyilo lyake Nnungu lìpiike mushipii, lyo lyapanganienge wakati ukanava kwalishangelo lyetu wetu.

⁸Hapali ata jumo pakati pavakutawala vawakati au ámanyite mwaa leka vàmanyite, havanampambilile UMU walishangelo.

⁹Kanji kenga indyandikigwa, “Víkagwene mevo, ata víkaigwite lyatu na ata víkakumbukiligwe muntima wamunu, ni vyovyo vyapanganienge Nnungu kwa avalá vannagwalédya;”[5]

¹⁰Nnungu napane anditulodya wetu kwaindila ya Imumu. Mwenu, Imumu inkulalyanga kula shinu ata mpaka vivéle nkati-uti vya Nnungu.

¹¹Da nyani ámanyite makumbukililo amunu paikava yo imumu yamunu ipagwíte nkati mwake? Nimumo momo hapali ámanyite makumbukililo ake Nnungu pakava jo Imumu wake Nnungu.

¹²Kanji napane wetu hatupatile imumu yamushilambo ashi kanji Imumu áalakadile kwake Nnungu pakulota tumanye vinu vyatupele Nnungu monyo.

¹³Vyanavo momo tunkutangola i kwamalove apundishígwa kwalimanyilo lyashimunumunu kanji kwamalove apundishígwa kwa Imumu avalangangilila umwiu waimumu kwa avalá vaimumu.

¹⁴Munu washivalakwelo hanakubali vinu vya Imumu wa Nnungu mwaa kwake nae ni ujinga; haulula kumanya pakuva vyanavo vinkujavaniangigwa mwimumu.

¹⁵Aijá waimumu andáukumu vinu uti na jo mwene jo, hapali wakumuukumu.

¹⁶“Mwaa wakwashi ámanyite ding'anong'ano dimwe UMU pakulota ampundishe?”[6] Kanji wetu tunkuvanavo ding'anong'ano dimwe Klistu.