Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 4 Bible Online

I Vakolintu 4 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 4

¹Nadoni amu ni muvaikidíle munu atuvalangilile: atuvalangilile kenga tuvatumika vamwe Klistu na wavatukamudidye vipii vyake Nnungu.

²Kupunda apo, shitakígwa kwavavakamudidye ni kulota vaonekane kukulupilika.

³Kwangu nangu napane ni shinu shidikidiki namene kuukumigwa namu mwenu kwali ukumu yoeyoe yamunu na ata nene nimwene hangunalyukumu shinu.

⁴Doni, hashipali shangwona nkati mwangu kanji asho hashinava na mana kenga ndivalangiligwa ishaliya. Ánguukumu ni UMU.

⁵Nadoni hamunaukumu wakati ukanava, do UMU akanava kwida. Nae andavika palangele vilipiídye mushii na kulyumilidya ngala makumbukililo ammitima. Bai apo kula munu andapata lutumbyango lwake kwa Nnungu.

⁶Avi mmanung'unumunu ndilitandedya kwangu nangu namu Apolu kenga mpano kwamwaa wenu mwenu kwambangidya dashi, kwetu wetu mulipundishe mene kupunda ashilá shaandikígwe pakulota hanapagwe wakulyona kwamwaa wamunu jumo kunneka junji.

⁷Wako akupambwilé nyani? Da shakwashi shauvénavo shavakakupele? Napanelo ikava kenga vandikupa mwaa shani unkulyona kenga havakupele?

⁸Mwenu mulyona kuvanavo tayali vinu uti vyamulota! Tayali munditajilika! Kwabila wetu mwenu mundiva mmaumu! Nangu ngushindalota mwiu yakuva mwenu mmaumu kwambangidya dashi nawetu momo tuve tuvaumu namu mwenu.

⁹Mwaa mwangwonela nangu, Nnungu anditulodya wetu tuvamyombe mulyutu lyamwisho, wetu kenga túukumigwa kupela, pakuva tuukilé ndava vyadimbenje kwashilambo ata ikava kwavanjelo kwali kwavanu.

¹⁰Wetu tuvajinga kwamwaa umwe Klistu kanji mwenu ni mmalimanyilo nkati mumwe Klistu! Wetu ni tuvakudabadabanga kanji mwenu ni mmadimongo! Mwenu ni mmakwishimika kanji wetu ni tuvakwiludyangika!

¹¹Mpaka ambi apa tunkuvauvanga indala na inyota, tunkuvanavo wou, vankutukanyola malatuma, hatuve lyutu lyakwikala,

¹²tunkukola shimadengo shakupwateka kwamakono etu tuvene. Pavatutukana tunkuvaalaliya, pavatupapata tunkulipililila,

¹³pavatutambudyanga tunkuvajugwangila kwaamani. Tuukilé ndava dinywashwa dyashilambo, pakati pavinu uti wetu ni túmamadidye mpaka ambi.

¹⁴Hangunaandika shinu vinu avi pakulota nintae dyoni kanji kenga mmanavangu mmakunagwaleka nikulota nindume.

¹⁵Mwenu, ata ikava kenga munkuvanavo vakunnela makumi manga nkati mumwe Klistu, hamuvenavo vatatavenu voe mwaa kwaindila yantenga wambone nangu nimmaleka mwenu nkati mumwe Klistu Yesu.

¹⁶Napavedoni ninkunnaililila pakulota muve mmakujedya vangu.

¹⁷Kwaing'ano ai nintumidya kwenu Timoti mwanangu wakunagwaleka na wakukulupilika nkati mumwe UMU; nae anankumbuwanga mwangunamila nkati mumwe Klistu Yesu kwodananavo amulá mwangupundishidya mumautu uti kwakula liganisha.

¹⁸Kenga nangu hangushida kwenu, vanji vandilitenda kuva vakulyona.

¹⁹Ndaida napane shipajelo kwenu, UMU akalota. Apo ndamanya, i shitangodi shave vakulyona ava kanji dimongo shani dyavavenavo vanavo.

²⁰Mwaa utawala wa Nnungu haunava shinu mukutangola kanji unkupagwa mudimongo.

²¹Da mulota nyamani? Ngwide kwenu na mishasha kwali na ntima walinagwaledyo na upole?