Read Ibibiliya mu Shimakonde Imbodi Yaambi na dimbande dya Imbodi Yakala I Vakolintu 7 Bible Online

I Vakolintu 7 - Ibibiliya mu Shimakonde Imbodi Yaambi na dimbande dya Imbodi Yakala bible

I Vakolintu 7

¹Napanelo kwamyaa vyamungwandikidile vyo; mwenu mutédoni, “Ni shambone nnume hanalale na nkongwe.”

²Kanji kwamwaa wakulavalava, kula nnume inimmaikila avenavo nkongwe ndyagwe na kula nkongwe avenavo nnume ntwagwe.

³Nnume inimmaikila atandedye avilá vilotéka nkati mukulombana kwankongwe ndyagwe, nanae nkongwe momo atandedye yadavo kwannume ntwagwe.

⁴Nkongwe havenavo madalaka amili wake jo mwene ila nnume ntwagwe; nanae nnume havenavo madalaka amili wake jo mwene ila nkongwe ndyagwe.

⁵Hamunaimane aki yenu kwali paikava yakwigwania muwakati padyoko pakulota muliikiniye mukushwali. Ling'oto imang'ananga kavili pakulota Shatwani hanantubye kwamwaa wakumwova kulishunga mwemwe mmene.

⁶Vyangulota kutangola avi ni kenga vikubalíke, havinava shinu kenga lilamulo.

⁷Ishinangunagwela doni uti vave kenga mwanguvalalele nangu kanji kula munu ankuvanavo shajo shake jo mwene shaalakéla kwa Nnungu; junji shainamuna inji na junji shainamuna inji.

⁸Kwa avalá vákanava kulomba pamo na vanamwili, ninkuvaulila kushidoni, shambone ni kudyanga kupagwa mwanguvalalele nangu amu.

⁹Kanji vakanalyulula kulishunga kudyanga valombe mwaa kudyanga kulomba kuliko kukushanona mweshe muntima.

¹⁰Kwa avalá vakulomba ninkuvalamulila doni, i nangu kanji UMU: nkongwe hanaapukanange na nnume ntwagwe.

¹¹Napane akaapukananga, aikale bila kulombwa kwali mene, aigwanie na nnume ntwagwe. Namomo nnume hananneke nkongwe ndyagwe.

¹²Kwavanji vo, ninkuvaulila doni, i UMU kanji nangu, ikava kenga nung'unumunu andivanavo ndyagwe ákakulupila na jojo jo ankukubali kunama namu nae, bai hananneke.

¹³Namomo ikava kenga nkongwe andivanavo ntwagwe ákakulupila na jojo jo ankukubali kunama namu nae, bai hananneke.

¹⁴Mwaa nnume ntwagwe ákakulupila ankutandegwa kuva wakwilimyanga kwaindila yandyagwe na nkongwe ndyagwe ákakulupila ankutandegwa kuva wakwilimyanga kwaindila yannume ntwagwe. Leka ikave davo, vanavenu vakandiva vaushapu kanji napane vankuva vakwilimyanga.

¹⁵Kanji ikava kenga aijá ákakulupila akalyumadyanga, alyumadyange. Kwaing'ano ai nung'unumunu kwali numbumunu ankuva muunaiti mwaa Nnungu aninshema pakulota muname mu amani.

¹⁶Gwe ndyamunu, da umanyité dashi kenga unamwambola nnume ntwavo? Kwali gwe ntwamunu, da umanyité dashi kenga unamwambola nkongwe ndyavo?

¹⁷Kula munu napane aukenavo mushu anama shinamidyo shosho shampangidile UMU na kenga mwanshamalele Nnungu. Mumaganisha uti, ashi ni shangulamulila.

¹⁸Da apali áshamagwidye àkumuligwe likumbi? Hanatimbange likumbi lyake. Apali áshamagwidye akakumuligwe likumbi? Hanalikumule.

¹⁹Mwaa kukumuligwa likumbi hakuve mana na ungakumuligwa momo hauve mana kanji shivénavo mana ni kwigwilila malamulo ake Nnungu.

²⁰Kula munu nkati mushinamidyo sho shavanshamile, auke mushu apagwa mushosho.

²¹Da vakushamile ùvele untumwa? Haunangaikange kwamwaa awo kanji mwiu ukapata litala lyakuva muunaiti, katakela.

²²Doni, aijá áshamegwa namu UMU àvele ntumwa, nae wamuunaiti umwe UMU. Nimumo momo aijá áshamagwidye àvele muunaiti, nae ntumwa umwe Klistu.

²³Mwenu mundishumigwa kwaibei, hamunave mmatumwa vavanu.

²⁴Nadoni mmanung'unumunu, kula munu mushinamidyo shoeshoe shaukile ndashamegwa, mushosho sho auke mushu anama namu Nnungu.

²⁵Napane kwaing'ano ya avalá vákanava kulombwa[13] hanguvenavo lilamulo limwe UMU ila ninkumya maoni angu kenga nimunu kwamwaa wakungulodya UMU shididi shake kuva wakukulupilika.

²⁶Kwamwaa wamapinjikapinjika apagwíte muwakati au, ngwona kudyanga munu apagwe kenga mo mwavalalele.

²⁷Da undilyunganianga na nkongwe? Hamunalakane. Da uvelé muunaiti kwankongwe? Haunannambele nkongwe.

²⁸Kanji ukalomba, haunatega shinu. Namomo mwali ntete akalombwa, hanatega shinu momo. Kanji napane avalá valóta kulambana, vandapata matatisho amushilambo ila nangu, matatisho alo ngushilota mudivilile.

²⁹Shangulota kutangola mmanung'unumunu ni ashi; wakati undidadakanga. Nadoni kutunduvangila ambi apa, avalá valombíle, vaname kenga havalombile;

³⁰avalá valíla, kenga havanalila; avalá vapuwánga, kenga havanapuwanga; avalá vashúma, kenga vákave shinu;

³¹avalá vashulúsha mushilambo, kenga vákaungana uti na shilambo mwaa mwatwanela shilambo wakati au, mwakupita.

³²Nangu ngushindalota mwenu po muve mmakwambolegwa mukwangaikanga. Munu ákalombile aangaikangila vimwe UMU mwashi mwakunnagwalela nae.

³³Napane aijá álombile aangaikangila vyamushilambo mwashi mwakunnagwalela ndyagwe;

³⁴nae jo andijavanikananga. Nimumo momo nkongwe ákalombwidye kwali mwali ntete aangaikangila vimwe UMU mwashi mwakuvalela wakwilimyanga mumili kwali mwimumu. Kanji álombwidye nae jo aangaikangila vyamushilambo mwashi mwakulota kunnagwalela ntwamunu.

³⁵Ninkutangola vinu avi kwawambone wenu mmene i pakulota nindingadinge kanji kwamwaa wa ashilá shashalowa na pakulota muliikiniye nkati mukuntumika UMU kwabila kudumbadumba.

³⁶Ikava kenga munu ankwona kenga hanantandela shana mwali walota kunnomba, doni mweshe wake wo unkumpunda nadoni hamupali mwakutandela, bai atende ashilá shimwidíla muntima, hanatega shinu, valeke valambane.

³⁷Kanji munu ánanwepe muntima mwake, áulula mwakutandela mwaa atawelé mweshe wake, áamuwa muntima mwake akanannomba mwali jo, bai munu ajo andatenda shinu shambone.

³⁸Napavedoni, aijá ánnomba mwali wake ankutenda shana napane aijá ákalomba ankutenda shinu shambone namene-uti.

³⁹Nkongwe avelé mushipungu muwakati wanama ntwagwe kanji ntwamunu akapela, nae ankuva muunaiti wakulombwa na munu woewoe wannota ila munu ajo ave nkati mumwe UMU.

⁴⁰Kanji napane kwona kwangu nangu andapuwanga poe ikava kenga andapagwa kenga mo mwavalalele, nanangu momo ninkulyona kuvanavo Imumu wake Nnungu.