Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 11 Bible Online

II Vakolintu 11 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 11

¹Nangu ngushindalota mwenu mungupililile muujinga padyoko! Mwiu nangu munkungupililila!

²Mwenu, dukuduku yanguvenavo kwenu mwenu ni dukuduku yakwalakela kumwe Nnungu mwaa nangu ndilivikila kunnombya mwenu kwannume jumo; ndikankamudye kumwe Klistu kenga mwali ntete ákave ushapu.

³Kanji shangujopa ni ashi, kenga mo mwanduwangidídye nyoka Eva kwaujanja wake, ding'anong'ano dyenu inkuululika kumwashadyanga mukulipudya kwiu na kúkave ushapu kumwe Klistu.

⁴Mwaa ikava kenga andaaloka munu junji nammalangangila mwenu Yesu junji watukammalangénge wetu, kwali ikava kenga mundapwashalela imumu inji yamukapwashaladíle, kwali ntenga wambone unji wamukapwashaladíle, mwenu uti avi munkulipililila shana!

⁵Mwenu, hangunalyona shinu ata padyoko vela kuva nindikidiki kwa avalá “vamyombe vakumene.”

⁶Ata ikava kenga hangunava shinu nimunu wakumanya kutangola kanji i mwanguvalalele nkati mulimanyilo. Shinu ashi tundilodya ngala kwenu mwenu kula lyutu na kula wakati.

⁷Da nditenda lidambi pangulishapaidye kwambangidya mwenu vankwedye kwamwaa wakummalangangila ntenga wambone wake Nnungu monyo?

⁸Ndipakanyola vyamaganisha anji ngupata lipwashalelo lyavanavo kwambangidya nintumike mwenu.

⁹Nangu pangupagwíte namu mwenu vingwova vinu, hapali wanintikile ligogo mwaa vanung'unumunu vaalakadíle ku Makedoniya vanavo vaníngupa avilá víshingwova nadoni ndilishunga pakulota hangunantike ligogo mwenu na ndauka mushu ngulishunga yadavo.

¹⁰Kwoda umwiu umwe Klistu unkupagwa nkati mwangu, kulyumya kwangu aku shumbi hapali wakumaladya isemu ya ku Akaya.

¹¹Mwaa shani? Da, nangu mwenu nannagwaledya shinu? Ámanya ni Nnungu.

¹²Napanelo shangutenda sho, ndauka mushu ngutenda kwambangidya ngudivilile litala lya avalá valóta vapate litala lyakulota vaaneke kulinganana namu wetu muvinu vyavalyumidya vanavo shumbi.

¹³Mwaa vanu avo ni vamyombe vakushang'apa, vamadengo vakuduwanga valijaluwánga kuva vamyombe vamwe Klistu.

¹⁴Ashi hashinava shakutikinika mwaa jo mwene Shatwani, nae andálijaluwanga kuva njelo walilangadyo.

¹⁵Napavedoni, hashinava shinu shakujowa vatumika vake kulijaluwanga kuva vatumika vaishaliya. Mwisho wave undava kulingananavo vitendo vyave.

¹⁶Kavili ninkushidoni, hanapagwe munu wakungwona kuva ninjinga. Kanji ikava kenga mwiu munangwona kuva ninjinga, ngupwashalela kenga mwamukampwashaladíle njinga kwambangidya nanangu momo ngupate kulyumya shumbi ata padyoko vela!

¹⁷Shangutangola mukulishiya kwakulyumya shumbi aku, hangunatangola shinu nimwoda UMU kanji kenga ninjinga.

¹⁸Pakuva voe vankulyumya shumbi kwodananavo shimunumunu, nanangu momo ndalyumya.

¹⁹Mwaa mwenu kwoda muvenavo ding'ano dyoe, munkulipililila kwavajinga.

²⁰Mwenu munkulipililila ata mpaka munu akamuukanavo muutumwa, kwali akanshonda, kwali akankangola, kwali akankoma malatuma.

²¹Kwadyoni dyangu ninkushidoni, kwavinu avi wetu tundidabadabanga namene! Ashilá shavalota kulyalaveka vanji kulyumidya shumbi, ngutangola kenga ninjinga, nanangu momo ndalyalaveka.

²²Da vanavo vo, vabalaniya? Nanangu momo. Vanavo vo, vanaishilaeli? Nanangu momo. Vanavo vo, udukulu umwe Abulaamu? Nanangu momo.

²³Da vanavo vo, vatumika vamwe Klistu? Nangu po ndimamodya, ngutangola kenga nimunu wakudulumbuka, mushimadengo shoe, mukungwa myanda vyoe, mukushapigwa viboko myanda vyoe, muvijoidyo vyakulota kupela myanda vyoe.

²⁴Myanda mwanu vayuda vangushapa viboko alubaini kusha shimo.

²⁵Myanda mitatu ngukanyalegwa ding'ong'o, mwanda umo ngwamangigwa majanga, myanda mitatu ngutitimila mwimanga, mwanda unji wo shilo uti na mui ngwalela lela-lela-lela shing'ati imanga.

²⁶Ngwengwe nguvé mushimwanda, muvijoidyo vyadyundi, muvijoidyo vyamajambashi, muvijoidyo vyavakwetu, muvijoidyo vyavamidi, muvijoidyo munjini, muvijoidyo kushimbweshe, muvijoidyo mudimanga na muvijoidyo pakati pavanung'unumunu vakushang'apa,

²⁷mushimadengo shakupwateka, shilo myanda vyoe bila lwono, mwindala na mwinyota, mukwova shakulya myanda vyoe, mukudidima imepo na muwou.

²⁸Leka vyapanda avi, kunkupagwa kula liduva kwidopa kwamangaikangilo angu kwamaganisha uti.

²⁹Wakwashi ádabadabenge pandikadabadabenge nangu? Wakwashi wavantadidye agwe paikangupwateke nangu muntima?

³⁰Ikava kenga indivaikila ngulyumye shumbi, ndalyumidya muvinu vilódya kudabadabanga kwangu.

³¹Nnungu umwe UMU wetu Yesu Klistu, jo Tatamunu wake nae, átumbyangilika ngwengwe ankumanya kenga hangunashang'apa shinu.

³²Ku Damashiko, gavana ávele mwina mumwe umu Aleta, andívavika vakulaledya milango vyanjini vyavadamashiko pakulota vangukamule.

³³Kanji kupitila palidilisha lyalingongo, vaníngushuluwa ngùvele mulitenga kutwala kupalanyoka mmakono mwake.