Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 12 Bible Online

II Vakolintu 12 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 12

¹Ininguvaikila ngulyumye shumbi. Ata ikava kenga haipali paida, ndauka napane ndavalanganga dindoti na maono aalakéla kumwe UMU.

²Nimmanya munu nkati mumwe Klistu, vyaka kumi na nsheshe vipitíle kunyuma, andítanduligwa mpaka kuwa kwantatu, kwali aukile na mili kwali haukile na mili hangumanyite, ámanya ni Nnungu.

³Nangu ndimanya doni munu kenga aju, kwali aukile na mili kwali haukile na mili hangumanyite ámanya ni Nnungu,

⁴nae andítanduligwa mpaka kulyutu lyalipuwilo kutwala kwigwa malove apúnda shitangodi na alaéka munu kuvalanganga.

⁵Kwaupande wamunu kenga aju ndalyumidya shumbi kanji kwaupande wangu nangu nimwene, hangulyumidya paikava mukudabadabanga kwangu.

⁶Ata leka ngulyumidye shumbi hangunave ninjinga mwaa ndikatangwele vinu viu. Hangutamwa napane kutenda davo kwambangidya hanapagwe munu wakunguvikila namene nangu kupunda vyaona kwangu na vyaigwa kwangu.

⁷Napanelo kwamwaa waukumene wakupunda apo wamaono na pakulota nangu hangunalikwedye, vaningujaulila miva mumili mwangu, àvele múntenga wake Shatwani pakulota angutindinganiange kwambangidya dashi hangunalikwedye.

⁸Ninjugwangila UMU myanda mitatu pakulota angunyemye miva awo

⁹kutwala nae kungwaulila doni, “Umonyo wangu unditosha kwako mwaa dimongo dyangu diwikila popo nkati mukudabadabanga.”[17] Napavedoni ndyona kudyanga kulyumya shumbi mukudabadabanga kwangu kwambangidya dimongo dimwe Klistu ditulile pashanya pangu.

¹⁰Nadoni kwamwaa umwe Klistu, ninkupuwanga nkati mukudabadabanga, mukutukanigwa, mukuvauvanga, mukupapatigwa na mumatatisho. Mwaa panguva wakudabadabanga ni panguva wadimongo.

¹¹Ndilitenda kuva ninjinga kanji mwenu ni múnguungidile. Mwaa mwenu ni múkangutumbyenge nangu pakuva hangunava shinu nindikidiki kwavamyombe vakumene avalá ata ikava kenga nangu hangunava shinu.

¹²Kanji namwiu vimanyikilo vyaumyombe vinditandeka ngala pakati penu nkati mukulipililila uti, kwavimanyikilo, kwavyakutikinikanga na kwavyamakango.

¹³Da mushakwashi shamutanananigwe mwenu padyoko kuliko maganisha anji pandikavele nangu nimwene kuva ligogo kwenu? Likosha kenga ali ngulivaliva!

¹⁴Mwenu nguvelé tayali kwamwanda wantatu kwida nannola. Hanguva ligogo mwaa shangulota i vyenu kanji mwemwe mmene. Doni, vanamunu havanaungigwa shinu kuvavikila libadila vatatamunu kanji vatatamunu kwavanamunu.

¹⁵Nangu kwantima wambone ndajaanga na ndalijaangila uti kwamwaa waungumi wenu. Ikava kenga nangu ninkunnagwaledya namene mwenu, ndanagwaleka padyoko?

¹⁶Mwenu, mo mwailota kuvalela mo, nangu hanguvéle ligogo kwaupande wenu. Kanji pakuva nangu ninjanja, nimpata mwenu kwaujanja.

¹⁷Da kwaindila yamunu woewoe wanintumididye kwenu, nangu ninshonda mwenu?

¹⁸Ninnaililila Titu aide ako na nintumidya pamo namu nung'unumunu junji jo. Da doni po, Titu jo aninshonda? Da wetu hatunalangalalegwa shinu kwaimumu jumo jojo na hatunalivata shinu mumo momo?

¹⁹Da mwenu mwona kenga wakati uti wetu tunkulishililidya pamevo penu? Nkati mumwe Klistu pamevo pake Nnungu ni patutangola na uti vyatutenda mmakunagwaleka ni pakulota kunnonowanga mwenu.

²⁰Mwaa ninkujopa doni pangwida ako, nankodya mwenu i mwangulatela nangu, namomo nangu munangukodya i mwamulatela mwenu. Ninkujopa kupagwa pakati penu ding'ondo, ing'ou, shishimwashimwa, umongo, kunyambiyanga, kung'wenya, kulyona na upuju.

²¹Ninkujopa pangwida kavili po, Nnungu wangu kunguvika mudyoni pamevo penu na ndatangadikanga kwamwaa wa avalá vatagíle kala kutwala mene kulijugulanga kwaushapu, kwauwendi na kwakulauka kwavatandile.