Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 13 Bible Online

II Vakolintu 13 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 13

¹Au ni mwanda wantatu wangwida kwenu. “Kwaushuda wavanu vavili kwali vatatu, kula lilove lyakikishigwe.”[18]

²Nangu ndivamanyiya kaladavo avalá vatagíle pamo na vanji uti namomo ninkuvamanyiya ambi apa pándikapagwite kenga mo mwandivamanyiídye mumwanda wambili pangupagwíte doni pangwida po, hanimpambedya munu

³pakuva mwenu munkulambela nningo wakutangola Klistu kwaindila yangu. Nae kwenu mwenu hanava shinu wakudabadabanga kanji ni wadimongo pakati penu.

⁴Mwaa mwiu vaninkamalela panshalaba mukudabadabanga kanji ankunama kwadimongo dyake Nnungu. Nawetu momo tunkuva vakudabadabanga nkati mwake kanji kwenu mwenu tundanama namu nae kwadimongo dyake Nnungu.

⁵Lilalyange mwemwe mmene pakulota mumanye ikava kenga munkupagwa mulikulupililo. Litende nningo mwemwe mmene. Kwali hamunalimanya shinu kenga Klistu Yesu ankupagwa nkati mwenu? Kwali ikava kenga nningo wo, hamukawidye.

⁶Ninkulindila doni, mwenu po mundamanya kenga wetu nningo hatukawidye.

⁷Tunkushwali Nnungu napane kwambangidya dashi, mwenu hamunatende wakunyata woewoe i pakulota twaneke kenga tukubaligwe kanji kwambangidya mwenu mutandedye wambone ata ikava kenga wetu tunkwaneka kenga túkakubaligwe.

⁸Mwaa hatuulula kutenda shoeshoe shipingánanavo umwiu kanji tunkutenda uti kwaupande waumwiu.

⁹Mwenu, tunkupuwanga patudabadabanga, mwenu muvanavo dimongo. Kushwali kwetu ni kulota mwenu mudyuwangigwe.

¹⁰Napavedoni, ninkumwandikila vinu avi ndikapali namu mwenu kwambangidya pangupagwa namu mwenu po, hangunatumile na dimongo madalaka angupele UMU kwakundenga i kwakumbamola.

¹¹Kumwisho akuno mmanung'unumunu puwanga, dyuwangika, avanavo ntima shii, kumbukilila momo, nama kwaamani na Nnungu walinagwaledyo na waamani andapagwa namu mwenu.

¹²Udyanianga kwashimanyikilo shalinagwaledyo.

¹³Vakwilimyanga uti, vankumupa nandele.

¹⁴Umonyo umwe UMU Yesu Klistu, linagwaledyo lyake Nnungu na upamo wa Imumu Wanashwe vipagwe namu mwenu uti.