Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 2 Bible Online

II Vakolintu 2 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 2

¹Nadoni ndyamuwa nene nimwene hangunaide kavili kwenu mwenu mushipalodi.

²Mwaa ikava kenga nantaa shipalodi, nyani álota kungupa lipuwilo pakavele aijá wanintaile shipalodi?

³Nimwandikila vyovyo vyo kwambangidya pangwida kwenu ko, hangunavenavo shipalodi kwa avalá ve vavaikidíle vangupe lipuwilo pakuva nangu ndivanavo likulupililo kwenu mwenu uti kenga lipuwilo lyangu ni lyenu mwenu uti.

⁴Mwaa kutunduvangila mmauvilo oe na ntima ushanona nimwandikila na myodi vyoe i pakulota kuntaa shipalodi kanji pakulota mumanye kuumbaligwa kwalinagwaledyo lyanguvenavo kwenu mwenu.

⁵Napanelo ikava kenga munu pakati penu atadidyé kupagwa shipalodi, hangutaile nangu kanji kwaupande unji nikanava wakukalipa namene, atadidyé kwenu mwenu uti.

⁶Kwamunu kenga aju, shaushanga shavampele vakwinjipa, shinditosha.

⁷Nadoni paikave davo po, indivaikila munnivalive na mumpambadyange munu ajo pakulota hanatitimile mushipalodi shakumamodya.

⁸Napavedoni ninkunnaililila mulodye linagwaledyo lyenu kwake nae.

⁹Ni kwashabaa ai, nimwandikila mwenu pakulota nintende nningo wakummanya kenga kwali muvinu uti, munkuva mmakwigwilila.

¹⁰Napane aijá wamunnivaliva mwenu kwashinu shoeshoe, nanangu momo nannivaliva. Mwaa shangulivalidile ikava kenga shipali shakulivaliva, asho ndilivaliva kwamwaa wenu pamevo pake Klistu

¹¹kwambangidya dashi, Shatwani hanatupate kwaujanja wake mwaa hatunatikinanga shinu milugu vyake.

¹²Mwenu, panguwikile ku Tolowashi pakulota nguvalangange ntenga wambone umwe Klistu, ata ikava kenga UMU aningushimulila nnango,

¹³muntima mwangu hanguvenavo unaiti mwaa palyutu alyo, haninkodídye nung'unumunu Titu. Nadoni ndikavalaila vanavo kutwala kuka ku Makedoniya.

¹⁴Napanelo lilambwalalelo lipagwe kwa Nnungu átulangalalela wetu ngwengwe mumandamano akutema nkati mumwe Klistu na áandadya momo mo kwaindila yetu wetu lyumba lyakunung'angila lyakummanya nae mumautu uti.

¹⁵Mwaa wetu ni lyumba lyakunung'angila limwe Klistu kwa Nnungu pakati pa avalá vaambolégwa na pa avalá vajaíka.

¹⁶Kwavanji tunkuva lyumba lyakupela kwakupela; kwavanji tunkuva lyumba lyashingumi kwashingumi. Napane, wakwashi ávenavo lyululilo lyavinu avi?

¹⁷Wetu hatunava shinu kenga voe vatandéla nshulusho lilove lyake Nnungu kanji kenga tuvanu vaumwiu, kenga tuvanu twaloka kwa Nnungu, pamevo pake Nnungu na nkati mumwe Klistu, tunkutangola.