Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 3 Bible Online

II Vakolintu 3 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 3

¹Da doni po tunkutunduvanga kavili kulitumbyanga wewe tuvene? Kwali kenga vanji tunkulota ibalugwa yamalailililo kwenu kwali kwaloka kwenu?

²Mwemwe mmene ni ibalugwa yamalailililo etu yandikígwe mmitima vyetu imanyíka na ishomégwa na vanu uti

³mulilodya kuva ibalugwa imwe Klistu ipalakadígwe namu wetu na yandikígwe i kwawinu kanji kwa Imumu wake Nnungu mumi, i mmabau amajanga[2] kanji mmabau ammitima vyavanu.[3]

⁴Napanelo ni kwaindila imwe Klistu yatuvenavo likulupililo kenga ali kwa Nnungu.

⁵I do, tunkuvanavo lyululilo wewe tuvene lyakukumbukila shinu shoeshoe kenga shinkwalakela kwetu kanji lyululilo lyetu linkwalakela kwa Nnungu.

⁶Nae ni átupele lyululilo lyakuva wetu tuvatumika vaimbodi yaambi i imbodi yalutembo kanji ya Imumu mwaa lutembo lunkubyaa kanji Imumu ankwing'a shingumi.

⁷Kanji napane ikava kenga utumika widínavo kupela vàvangile dinembo mmajanga undiidanavo lishangelo ata mpaka kuvatadya vanaishilaeli havanaulule kwona ing'ope imwe Musha kwamwaa wakushenga shenye shake kushenga ko kúshilambaleka,

⁸da napane utumika wa Imumu wo, haumamodya lishangelo lyoe?

⁹Doni, ikava kenga utumika widínavo ukumu uvénavo lishangelo, kushi utumika wídanavo ishaliya wo, hauumbaligwa lishangelo!

¹⁰Namwiu kwaing'ano ai ashilá she shivénavo lishangelo hashive lishangelo kwamwaa walishangelo alilá likumene limpundíle.

¹¹Mwaa ikava kenga ashilá shíshilambaleka shivénavo lishangelo, kushi ashilá shíkamalilika sho, hashuumbaligwa lishangelo!

¹²Napavedoni pakuva tunkuvanavo lilindilililo ali, tunkuvanavo ntima shii.

¹³Hatunava shinu kenga Musha áshiinikidya inguvo ing'ope yake pakulota vanaishilaeli havanone ata kumwisho kwakushenga akulá kúshilambaleka.

¹⁴Kanji ding'anong'ano dyave dindinanapegwa mwaa ata mpaka nelo inguvo yoyo inkupagwa paishomegwa imbodi yakala. Yanavo indáushika bai nkati mumwe Klistu.

¹⁵Napane mpaka nelo pavashomya vimwe Musha, inguvo inkudivilikidya mitima vyave.

¹⁶Kanji akapagwa jumo ánshinjiulila UMU ntima wake, bai inguvo ayo indaushika.

¹⁷Mwenu, UMU ni Imumu na pashinu papagwite Imumu wake UMU, apo upali unaiti.

¹⁸Nadoni wetu uti kwading'ope dyavakatwinikididye twaneka lishangelo lyake UMU, tunkujaluwangigwa kwaing'ope yoyo kwalishangelo kuka kulishangelo, kujaluwangigwa kwalakéla kumwe UMU àvele Imumu.