Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 4 Bible Online

II Vakolintu 4 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 4

¹Napavedoni, pakuva tunkuvanavo utumika au watupatile kwashididi shake, havinatudidima mitima.

²Leka apo, tundita uti vyashipii na vyadyoni patukanama muvyaushwang'a kwali patukaashadyanga lilove lyake Nnungu kanji kwaindila yakuvalanganga ngala umwiu, tunkulitumbyanga mmakumbukililo amuntima vyavanu uti pamevo pake Nnungu.

³Kanji ata ikava kenga ntenga wambone wetu undiinikiligwa, winikiligwé bai kwa avalá vajaíka.

⁴Kwavanavo, nnungu wawakati au andivaputadya ding'anong'ano dyavakakulupila kwambangidya havanone lilangadyo lyantenga wambone walishangelo lyake Klistu ávele ing'ope yake Nnungu.

⁵Mwaa hatunalivalanganga wewe tuvene kanji tummalanganga Yesu Klistu kuva UMU kutwala wetu kuva tuvatumwa venu kwamwaa umwe Yesu.

⁶Doni, Nnungu átangwele, “Kushii lipagwe lilangadyo,”[4] ni jojo álangadidye mmitima vyetu pakulota kutwing'a lilangadyo lyalimanyilo lyalishangelo lyake Nnungu mwing'ope imwe Klistu.

⁷Wetu napane tunkuvanavo mali ala muvyombo vyaulongo pakulota yaneke kenga dimongo dipunda apo ni dya Nnungu i dyetu wetu.

⁸Kula upande tunkwikaliligwa kanji hatunakandigwa shinu; tunkwambambidyanga kanji hatunajaa lilindilililo;

⁹tunkupapatigwa kanji hatunaambukangigwa shinu; tunkuligwanga kanji hatunabamalegwa shinu,

¹⁰ngwengwe tunyukata kupela kumwe UMU wetu Yesu Klistu mumili pakulota shingumi shake Yesu shililodye momo mumili vyetu.

¹¹Doni, wetu túpagwite mushingumi ngwengwe tunkujauligwa tupele kwamwaa umwe Yesu kwambangidya shingumi shake Yesu shililodye momo mumili vyetu vipéla.

¹²Nadoni kupela ankukola madengo nkati mwetu kanji shingumi shinkukola madengo nkati mwenu.

¹³Napanelo pakuva tunkuvanavo imumu imo yoyo yalikulupililo kenga mwavandikidile, “Ndikulupila napane nditangola,” nawetu momo tundikulupila napane tunditangola

¹⁴tumanya kenga aijá ándyuwidye UMU Yesu, andatudyuwa nawetu momo pamo namu nae kutwala kutuukanavo pamo namu mwenu pamevo pake.

¹⁵Mwaa uti avi ni kwapaida yenu mmene kwambangidya umonyo uvawikíla kula wakati vanu voe utadye lilambwalalelo lyanjadyeke kwalishangelo lyake Nnungu.

¹⁶Napavedoni havinatudidima mitima. Ata ikava kenga umunu wetu wapanda unkunda kanji umunu wetu wankati unkutandegwa waambi kula liduva.

¹⁷Mwaa mauvilo awakati au, maangolo na akupita, anavo ankwidanavo kwetu wetu lishangelo líkamalilika liidópa namene kupunda uti

¹⁸akuno tulola vinu i vyanéka kanji víkaaneka. Mwaa vyanéka, vyakupita kanji víkaaneka ni víkamalilika.