Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 8 Bible Online

II Vakolintu 8 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 8

¹Tunkummanyiya napane mmanung'unumunu umonyo umwe Nnungu upatikanénge mumaganisha a ku Makedoniya.

²Doni, nkati mumauvilo oe, kuumbaligwa kwalipuwilo lyave na ungave-pashinu wakumamodya wave, undipakatika utajili wakujaula kwaupande wave.

³Mwaa ninkumya ushuda kenga vanavo kwamalotelo avo vo vene, vandyumya kwodananavo lyululilo lyave na ata mpaka kupunda apo

⁴vatujugwangila kwakutukanyalidya vapate paida yakuliinjidyanga[11] mukuvapwashela vakwilimyanga.

⁵Namomo havatandile gweka vyatushilindila wetu kanji shitandi vandilyumya vo vene kumwe UMU kutwala kulyumya kwetu wetu kwamalotelo ake Nnungu.

⁶Nadoni tuninnaililila Titu doni, mo mwatunduvangidile, amalilile momo shimadengo ashi shaumonyo pakati penu.

⁷Napanelo kenga mo mwamuumbaligwididye nkati muuti; mulikulupililo, mukutangola, mulimanyilo, mukutumbama kwiu na mulinagwaledyo lyetu nkati mwenu, namomo likanyalidye muumbaligwe na umonyo wowo au.

⁸Avi ninkutangola i kenga lilamulo kanji pakulota ninninge ngulinganianga na kutumbama kwavanji kenga linagwaledyo lyenu lyaumwiu.

⁹Mwaa mwenu mundimanya umonyo umwe UMU wetu Yesu Klistu doni, àvele avi ntajili kwakunnagwaledya mwenu nae andilitenda kuva ákave pashinu kwambangidya kwaindila yaungave-pashinu wake, antadye mwenu muke mukave mmatajili.

¹⁰Ala napane ni maoni angu: shitendo ashi ni kwapaida yenu mwenu mwemwe mútunduvenge mwaka upitíle i gweka mukutenda kanji namomo mukunagwaledya.

¹¹Kanji napane malila ashilá shamutunduvenge kwambangidya dashi, kenga mo mwaipagwididye dukuduku yakunagwaledya namomo kupagwe kukumalilila nkati muvinu vyamuvenavo.

¹²Mwaa ikapagwa dukuduku, nshango unkukubaligwa kwodananavo ashilá shavenavo munu i shakavenavo.

¹³Malotelo etu i do vanji vapate kugalukigwa, mwenu mwidopelwe kanji pakulota kupagwe kulinganana.

¹⁴Muwakati au kuumbaligwa kwenu mwenu kundadiva lyutu lya avalá vákavenavo pakulota namomo kuumbaligwa kwavanavo ko, kudive lyutu lyenu mwenu kwambangidya kupagwe kulinganana.

¹⁵Kenga indyandikigwa, “Aijá álakwete oe havenavo libadila na aijá álakwete padyoko, halamwovite.”[12]

¹⁶Napanelo lilambwalalelo lipagwe kwa Nnungu ávikile kutumbama koko kwanguvenavo kwenu mwenu muntima mumwe Titu.

¹⁷Mwaa Titu haigwilidile gweka lijugwangilo lyetu kanji àvenavo kutumbama kwoe, ankwida kwenu mwenu kwamalotelo ake jo mwene.

¹⁸Namu nae wetu tunkuntumidya nung'unumunu, jojo jo, shimbili shakuvalanganga ntenga wambone shindyandavala mmaganisha uti.

¹⁹I gweka asho kanji namomo anditandalegwa na maganisha pakulota atupalakele patukola shimadengo ashi shaumonyo shatutumikila kwalishangelo lyake jo mwene UMU na kwambangidya kulodya malotelo etu ambone.

²⁰Tunkulinyemya doni kwambangidya munu hanatushashulange kwamwaa wanshango ukumene watutumikila.

²¹Mwaa tunkwangaikangila ashilá shashalowa i gweka pamevo pamwe UMU kanji namomo pamevo pavanu.[13]

²²Tunkuntumidya napane pamo na vanavo nung'unumunu junji, jojo jo, myanda vyoe na kwadinamuna dyoe tunintenda nningo kutwala kumwona kuva munu átumbama namene kanji napane ankuvanavo dukuduku yoe kwamwaa walikulupililo lyavenavo kwenu mwenu.

²³Kwaupande umwe Titu, nae po ni nyangu na mmádengomwangu kwamwaa wenu mwenu. Kwaupande wavanung'unumunu vanji vo, vanavo ni vakutumigwa vamaganisha, àvele lishangelo lyake Klistu.

²⁴Napavedoni pamevo pamaganisha, valodye umwiu walinagwaledyo lyenu na shabaa yatulyumidya wetu shumbi kwenu mwenu.