Read Ibibiliya mu Shimakonde Imbodi Yaambi na dimbande dya Imbodi Yakala II Vakolintu 9 Bible Online

II Vakolintu 9 - Ibibiliya mu Shimakonde Imbodi Yaambi na dimbande dya Imbodi Yakala bible

II Vakolintu 9

¹Mwenu, kwaing'ano yakuvatumika vakwilimyanga haivakidile nimwandikile.

²Mwaa ndimanya kutumbama kwenu, shinu shangulyumidya shumbi kwavamakedoniya ndivaulila doni, tangu mwaka upitíle vaakaya vanavo vavelé tayali na dukuduku yenu inkuvaimulanga voe.

³Kanji napane ndivatumidya vanung'unumunu ava pakulota kulyumya kwetu shumbi yenu mwenu hakunagalukange kwamwaa au kanji kwambangidya muve mmakulipanganianga kenga mwangutangaladile.

⁴Ikanavadavo, vamakedoniya ikava kenga vandaida pamo namu nangu kutwala kunkodya mwenu mukalipanganienge, wetu tundapata dyoni patukatangola dyoni dyamulota kupata mwemwe mmene kwamwaa walikulupililo likumene ali.

⁵Napavedoni ndyona kudyanga ndivalaililile vanung'unumunu valangalele pakulota vapangange kaladavo shadaka shamulivikidile kunantandi kwambangidya dashi, shanavo shive tayali kenga shadaka shamuumidye kwalilotelo lyenu i kwakumuungila.

⁶Nidoni, ápanda padyoko, andapuna padyoko; ápanda poe, andapuna poe.[14]

⁷Kula munu aumye amulá mwamulidile muntima mwake i kwashipalodi kwali kwakumuungila mwaa Nnungu ankunnagwaledya nkúmya walipuwilo.

⁸Nnungu napane ankuulula kutadya umonyo uti uumbaligwe kwenu mwenu pakulota muuti na muwakati uti, muvanavo uti vitósha, muumbaligwidye mushimadengo uti shambone.

⁹Kenga indyandikigwa, “Andimwadila kuvapa vákave pashinu; ishaliya yake inkupagwa ngwengwe.”[15]

¹⁰Mwenu, Nnungu ájaula imbeju kwankúlima na ligung'u pakulota tulye, jojo jo andamupa na anaanjadyedya imbeju yenu na andatadya ainjipike mapuno aishaliya yenu.

¹¹Mwenu mundatajilika mudinamuna uti mpaka mwinjile mukujaulanga, ko kutadya kwaindila yetu wetu lilambwalalelo lipagwe kumwe Nnungu.

¹²Doni, utumika wamutenda au, haunava shinu wakuvapa gweka avilá vivóva vakwilimyanga kanji namomo, unkupakatika mulilambwalalelo lyoe kumwe Nnungu.

¹³Kwaindila yakulilodya ngala utumika au, vanavo vandamupa lishangelo Nnungu kwamwaa wakwigwilila kwenu kwalakéla mukulyaula kwenu nkati muntenga wambone umwe Klistu na kwamwaa wakujaulanga kwenu munshango kwavanavo na kwavanu uti.

¹⁴Mukushwali kwave yenu mwenu vanavo vankuvanavo mweshe woe kwenu kwamwaa waumonyo wakupunda apo wampele mwenu Nnungu.

¹⁵Lilambwalalelo lipagwe kumwe Nnungu kwamwaa wainudyo yake íkaulukika kutadolya.