Read Ibibiliya mu Shimakonde Imbodi Yaambi na dimbande dya Imbodi Yakala Vagalata 1 Bible Online

Vagalata 1 - Ibibiliya mu Shimakonde Imbodi Yaambi na dimbande dya Imbodi Yakala bible

Vagalata 1

¹Nangu Paulu, myombe kanji níkaalakadile kwavanu na ata i kwaindila yavanu ila kwaindila imwe Yesu Klistu pamo na Nnungu Atata ándyuwidye Yesu pakati pavakupela,[1]

²nene pamo na vanung'unumunu uti vapagwíte namu nangu akuno tunkwandikila kwamaganisha a ku Galata ko.

³Kwenu mwenu, umonyo[2] na amani yakwalakela kwa Tatagwetu Nnungu pamo namu UMU Yesu Klistu

⁴ályumidye jo mwene kwamwaa wamadambi etu pakulota atuposhe muwakati au wakunyata[3] kwodananavo malotelo atatagwetu Nnungu.[4]

⁵Kwake nae, lipagwe lishangelo ngwengwe ngwengwe. Ame.

⁶Napanelo nangu ninkunshanga mwenu mwaa muwakati ungwipi tu mundimwambukanga aijá ánshamile mupagwe muumonyo[5] wake Klistu kutwa kwoda ntenga wambone unji.[6]

⁷Kwakutangola mwiu haunava unji ila vapali vanji valota kuntindinganianga na kuvilinganianga ntenga wambone aulá umwe Klistu.

⁸Napane ata ikava kenga wetu kwali njelo wakwalakela kuwa ammalangangidile ntenga wambone uvilinganénge na watummalangangidile, munu ajo aavenavo dilana.

⁹Nadoni tunkuujila kavili kutangola tuushidoni, ikava kenga munu woewoe anammalangila ntenga wambone uvilinganánga na aulá wamupatile, munu ajo aavenavo dilana!

¹⁰Da mwenu mwona kenga ambi apa ngulota ndivashombe vanu kwali Nnungu? Kwali ngulota ivanagwele vanu? Leka ìvele yakuvanagwela vanu mpaka ambi apa, bai nangu hangunave nintumwa wake Klistu.[7]

¹¹Mmanung'unumunu, ninkulota mumanye doni ntenga wambone wanguvalanganga haunava shinu washimunu.

¹²Hangupatile kwamunu na ata havangupundishidye ila ntenga wo ndipata kwaindila yamaono akungulodya Yesu Klistu.[8]

¹³Mwenu mundigwa shana mavalelo angu panguvéle nkati mwidini yashiyuda; mwashi mwangushipapatila liganisha lyake Nnungu na mwangushitandela ing'ondo.

¹⁴Nangu mwidini yashiyuda mo, ngushindavapunda vavangu vaulinga wangu nguvikila namene dukuduku dijadi dyavanyakala vetu.

¹⁵Kanji napanelo Nnungu aningutandola tangu kala nikanava kuvalekwa na aningushema kwaindila yaumonyo wake.

¹⁶Jojo jo, painnagwadile kunnodya mwanagwe nkati mwangu nangu pakulota nimmalangange kwavamidi, hangulambadile maoni kwamunu

¹⁷na ata hanguujidile ku Yelusalemu kwa avalá vamyombe vatandi ila nguumidinneu kuka ku Alabiya kutwala kuujila kavili ku Damashiko.[9]

¹⁸Napanelo vikapite vyaka vitatu, ndyúka ku Yelusalemu nannola Kepashi[10] kutwa kwikanavo maduva kumi na tano.

¹⁹Koko ko, handivagwene vamyombe vanji ila Tiyagu nung'une UMU.

²⁰Mwenu! Vyandimwandikila avi, vìu. Pamevo pake Nnungu, nashang'apa shinu.

²¹Badae nindyúka disemu dya ku Shiliya na dya ku Kilikiya.

²²Nangu muwakati awo hangushimanyika mumaganisha a ku Yudeya avéle nkati mumwe Klistu.

²³Ila koko ko vashiigwanga vila doni, “Aijá áshitupapata, ambi apa ankuvalanganga likulupililo lyolyo lyashitenda ing'ondo kunantandi.”

²⁴Nadoni vashindamupa lishangelo Nnungu kwamwaa wangu nangu.